ބޯކޮށް ވާރޭވެހި ވައިގަދަވާނެ ކަމަށް ލަފާކޮށް، މުޅި ރާއްޖެއަށް ހުދު ސަމާލު ނެރެފި

ބޯކޮށް ވާރޭވެހި ވައިގަދަވާނެ ކަމަށް ލަފާކޮށް، މޫސުމާ ބެހޭ ގައުމީ އިދާރާއިން މުޅި ރާއްޖެއަށް ހުދު ސަމާލު ނެރެފިއެވެ.

މެޓް އޮފީހުން މި ސަމާލު ނެރެފައިވަނީ، މިރޭ 22:00 އާ ހަމައަށެވެ. މެޓް އޮފީހުން ބުނީ ހުދު ސަމާލް ނެރެފައިވާ ވަގުތުތަކުގެ ތެރޭގައި ރާއްޖޭގެ އެކި ސަރަހައްދުތަކަށް ބޯކޮށް ވާރެވެހި، ވިލާގަނޑުގައި ގަޑިއަކު 35 މޭލަށް ވައިގަދަވާނެ ކަމަށް ލަފާކުރެވޭ ކަމަށެވެ.

ރާއްޖެއަށް މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ބާރުގަދަވުމުގެ ސަބަބުން ކުރަމުންދާ ވިއްސާރެއެކެވެ. އެގޮތުން، މި މަހުގެ 7 ވަނަ ދުވަހުން ފެށިގެން 11 ވަނަ ދުވަހާ ހަމައަށް މޫސުން ވަރަށް ބޮޑަށް ގޮސްވާނެ ކަމަށް ލަފާކުރެވޭތީ، ރާއްޖޭގެ އެކި ކަންކޮޅުތަކުގައި ފެންބޮޑުވުމުގެ ހާދިސާތައް ހިނގުން އެކެށީގެންވާ ކަމަށް ކަމާބެހޭ އިދާރާތަކުން ވަނީ އިންޒާރުދީފައެވެ.

މީގެ އިތުރުން، ބޯކޮށް ވާރޭވެހުމުގެ ސަބަބުން މަގުތަކުގައި ފެންބޮޑުވެ، ގެދޮރުތަކަށް ފެންވަނުމުގެ ފުރުސަތު ބޮޑުކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ފާހަގަކޮށްފައިވެއެވެ. އެހެންކަމުން، ރައްޔިތުން ރައްކާތެރިވުމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން ވަނީ ބާރުއަޅާފައެވެ. އޭގެ ތެރޭގައި، ގޭގޭގެ ފެންވަންނަ ދޮރުމަތީގައި ވެލިބަސްތާ ޖެހުމާއި، ކަރަންޓު ސާމާނު ފެން ނުޖެހޭފަދަ އުސްތަންތަނަށް ބަދަލުކުރުން ފަދަ ކަންކަން ހިމެނެއެވެ.

މި މޫސުމުގައި ކަނޑުދަތުރުކުރާ ފަރާތްތަކުންވެސް ސަމާލުވުމަށް ވަނީ އިރުޝާދުދީފައެވެ. އެގޮތުން، ދަތުރުކުރުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށާއި، އުޅަނދުފަހަރުގައި ސަލާމަތީ ވަސީލަތްތައް ފުރިހަމައަށް ހުރިކަން ކަށަވަރުކުރުމަށް އެދިފައިވެއެވެ. އަދި ކޮންމެހެން ކުރަންޖެހޭ ދަތުރެއް ފިޔަވައި، މި މޫސުމުގައި ކަނޑުދަތުރުތައް ނުކުރުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.

މެޓް އޮފީހުން އާންމުކޮށްފައިވާ ތަފާސްހިސާބުތަކަށް ބަލާއިރު، ވޭތުވެދިޔަ 24 ގަޑިއިރުގެ ތެރޭގައި ރާއްޖެއިން އެންމެ ގިނައިން ވާރޭވެހިފައިވަނީ ހުވަދު އަތޮޅަށެވެ. އެގޮތުން، އެ އަތޮޅުގެ ފަރެސްމާތޮޑާއަށް 104.4 މިލިލީޓަރުގެ ވާރޭވެހިފައިވާ ކަމަށް ރެކޯޑުކުރެވިފައިވާއިރު، ހަމަ އެ އަތޮޅު ކާޑެއްދޫއަށް 63 މިލިލީޓަރުގެ ވާރޭވެހިފައިވާ ކަމަށް މެޓް އޮފީހުގެ ހިސާބުތަކުން ދައްކައެވެ.

ގއ. ކޮލަމާފުއްޓަށްވެސް ބޯކޮށް ވާރޭވެހި މުޅި ރަށުގައި ފެންބޮޑުވެ ކަރަންޓުގެ ހިދުމަތް ވަނީ އިއްޔެ މެދުކެނޑިފައެވެ.