އުފެއްދުންތެރިކަމުގެ މައުރަޒުގައި ސަރުކާރު ކުންފުނިތަކުގެ އެއްވަނަ އެޗްޑީސީއަށް

ދިވެހީންގެ އުފެއްދުންތެރިކަމުގެ މައުރަޒުގައި ސަރުކާރު ކުންފުނިތަކުގެ ކެޓަގަރީން އެއްވަނަ ހައުސިން ޑިވެލޮޕްމަންޓް ކޯޕަރޭޝަނަށް ލިބިއްޖެއެވެ.

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މި ކާމިޔާބީ ހޯދީ ރާއްޖޭގެ 30 އަށްވުރެ ގިނަ ސަރުކާރު ކުންފުނިތަކާ ވާދަކޮށްގެންނެވެ.

މި އެވޯޑާ އެޗްޑީސީގެ ފަރާތުން ހަވާލުވެޑައިގަތީ އެ ކުންފުނީގެ މާކެޓިން އެސިސްޓެންޓް ޑިރެކްޓަރު މަލްޝާ ޝަރީފު އެވެ. އެވޯޑް ހަވާލުކޮށްދެއްވީ ފަސްޓް ލޭޑީ ސާޖިދާ މުހައްމަދު އެވެ.

މި ފަހަރުގެ ގައުމީ އުފެއްދުންތެރިކަމުގެ އެވޯޑުގައި ޖުމްލަ 298 އެވޯޑެއް ދީފައިވެއެވެ. އެކި ދާއިރާތަކުން އެއްވަނައަށް 116 ފަރާތެއް ހޮވިފައިވާއިރު، ދެވަނައަށް 95 ފަރާތެއް ހޮވިފައިވެއެވެ. ތިންވަނައަށް ހޮވިފައިވަނީ 82 ފަރާތެކެވެ. މީގެ އިތުރުން، އެންމެ މަތީ ޝަރަފު ކަމުގައިވާ "ރަން" ވެސް ފަސް ފަރާތަކަށް ލިބިފައިވެއެވެ.

ބައެއް ބައިވެރިންނަށް އެކި ފަންތިތަކުން އެއް އެވޯޑަށްވުރެ ގިނަ އެވޯޑު ލިބިފައިވާއިރު، ވަނަތައް ހާސިލްކުރި ފަރާތްތަކުގެ ޖުމްލަ އަދަދަކީ 134 އެވެ.

ޚާއްޞަ އެވޯޑެއްގެ ގޮތުން، ނުކުޅެދުންތެރިކަން ހުންނަ ފަރާތްތަކުގެ ކެޓަގަރީގައި 14 ބައިވެރިއަކަށް 76 އެވޯޑެއް ވެސް ދީފައިވެއެވެ.