ރާއްޖޭގައި ޤަވާއިދާއި ޚިލާފަށް އުޅޭ ބިދޭސީން ޤަވާއިދަށް ފެއްތުމުގެ މަސައްކަތް ކުރަނީ!

ދިވެހިރާއްޖޭގައި ޤަވާއިދާއި ޚިލާފަށް އުޅޭ ބިދޭސީ ޤަވާއިދުގެ މިންގަނޑަށް ފެއްތުމަށް ޕްރޮގްރާމެއް ފެށުމަށް ހަމަޖެހިފައިވާ ކަމަށް މޯލްޑިވްސް އިމިގްރޭޝަން އިން ބުނެފިއެވެ.

އިމިގްރޭޝަނުން ނެރެފައިވާ އިޢްލާނެއްގައި ބުނެފައިވަނީ ރާއްޖޭގައި ޤަވާއިދާއި ޚިލާފަށް ދިރިއުޅެމުންދާ ބިދޭސީންގެ މައްސަލައަށް އަވަސް ހައްލެއް ހޯދުމުގެ ގޮތުން އެއިދާރާއިން ޚާއްސަ އޮޕަރޭޝަންތަކެއް ކުރިއަށް ގެންދިޔުމަށް ނިންމައިފައި ވާކަމަށެވެ.

މިއޮޕަރޭޝަން ތަކުގައި ވިދޭސީންގެ އައިޑެންޓިޓީ އާއި ވީޒާ ޗެކް ކުރުމަށްފަހު އިމިގްރޭޝަން ޤަވާއިދާއި ޚިލާފުވާ ބިދޭސީންނަށް ފިޔަވަޅު އެޅުމާއި، އަދި ބިދޭސީން ޤަވާއިދުގެ ތެރެއަށް ފެއްތުމުގެ އެންމެހާ މަސައްކަތް ކުރެވިގެންދާނެ ކަމަށެވެ.

މިގެ އިތުރުން އިމިގްރޭޝަން އިން ބުނެފައިވަނީ އެ އިދާރާއިން ކުރިއަށް ގެންދާ އެއޮޕަރޭޝަން ކުރިއަށް ގެންދިޔުމުގެ މަޤްސަދަކީ ރާއްޖޭގައި ޤާވާއިދާއި ޚިލާފަށް އުޅެމުންދާ ބިދޭސީން މަދުކުރުމަށް މަސައްކަތްކުރުމަށް ރާއްޖޭގައި ދިރިއުޅޭ ބިދޭސީންގެ ކަންކަން ޤަވާއިދާއި އެއްގޮތައް ބައްޓަން ކުރުން ކަމަށެވެ.

މީގެއިތުރުން މަސައްކަތްތަކުގައި ބިދޭސީން ގެންގުޅޭ ފަރާތްތަކާއި، ސަރުކާރުގެ ވުޒާރާތަކާއި، ބޭރުގެ އެމްބަސީތަކާއި، ރައްޔިތުންނާއި އަދި މިކަމާއި ގުޅުންހުރި އެންމެހާ ފަރާތްތައް ޝާމިލްކޮށްގެން ހަރުދަނާ ފިޔަވަޅުތަކެއް އެޅުންކަމަށެވެ.

”މި ޚާއްސަ އޮޕަރޭޝަން ކުރިއަށްދާއިރު، އިމިގްރޭޝަންގެ ޤާނޫނާ ޚިލާފަށް ރާއްޖޭގައި މަސައްކަތް ކުރަމުންދާ ފަރާތްތަކާއި، ސައްޙަ ހުއްދައެއް ނެތް ރާއްޖޭގައި ދިރިއުޅެމުންދާ ފަރާތްތަކުގެ މައްޗަށް އިމިގްރޭޝަންގެ ޤާނޫނު ތަންފީޒު ކުރަމުންދާނެ ކަމުގައި ދަންނަވަމެވެ،" އިމިގްރޭޝަންގެ ބަޔާނުގައި ވެއެވެ.

ރާއްޖޭގައި މަސައްކަތް ކުރުމަށް އެކި ޤައުމުތަކުގެ ބިދޭސީން އުޅޭއިރު، ޤަވާއިދާއި ޚިލާފަށް އުޅޭ ގިނަ ޢަދަދެއްގެ ބަޔަކު އުޅެއެވެ. މިފަދަ މީހުންގެ މައްސަލަތައް ހައްލުނުކުރެވި އިތުރު އެހެން މައްސަލަތައް ދަނީ އުފެދެމުންނެވެ. ބިދޭސީންގެ ތެރޭގައި ބޮޑެތި ކުށްތަކަށް އަރައި ގަންނަމުންދާ މީހުންވެސް އަންނަނީ ގިނަވަމުންނެވެ.