ކުރީގެ ނޫސްވެރިޔާ، ޝާން ހުޅުމާލެ މެދުދާއިރާއަށް ވާދަކުރައްވަނީ!

ކުރީގެ ނޫސްވެރިޔާ މުޙައްމަދު ޝާން ޢަބުދުالله، (ކުޑޭ) ރައްޔިތުންގެ މަޖިލީހުގެ ހުޅުމާލެ މެދު ދާއިރާއަށް އެމްޑީޕީގެ ފަރާތުން ވާދަކުރާނެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރައްވަން ނިންމަވައި ކެމްޕޭން ފައްޓަވައިފިއެވެ.

ޝާން ވިދާޅުވީ، ރައްޔިތުންގެ މަޖިލީހުގެ ހުޅުމާލެ މެދު ދާއިރާ ޚިޔާރު ކުރެއްވީ އޭނާއަކީ، ހުޅުމާލޭގެ އެންމެ ފުރަތަމަ ވަޒަންވެރީންގެ ގޮތުގައި މިހާތަނަށްވެސް ހުޅުމާލޭގައި ދިރިއުޅެމުން އަންނަ ފަރާތަކަށް ވާތީ ކަމަށެވެ.

އަދި ހުޅުމާލޭގެ ރައްޔިތުންނާއި ޒުވާނުންނަން އެންމެ ބޭނުންވެފައިވާ ކަންކަން އޭނާއަށް އެނގި، ފެނި އަދި އިޙްސާސްކުރެއްވިފައިވާ ކަމަށާ، ހުޅުމާލޭގެ ރައްޔިތުންގެ ދިރިއުޅުމާއި ކުރިއެރުމަށް އަދި ޒުވާނުން އެދޭފަދަ ޒުވާނުންގެ ޝަހަރަކަށް ހެދުމަށް ވަރަށް ގިނަ ކަންކަން ކުރަން ނިންމަވާފައިވާ ކަމަށް ޝާން ވިދާޅުވި އެވެ.

ޝާން މަސައްކަތުގެ ޢަމަލީ މައިދާނުގައި އެންމެ ގިނަ ދުވަހު މަސައްކަތް ކުރެއްވީ ނޫސްވެރިކަމުގައެވެ. ޚާއްޞަކޮށް ކުޅިވަރު ނޫސްވެރިކަމުގައި ޝާން އަކީ ފާހަގަކޮށްލެވޭ ބޭފުޅެކެވެ. މިގޮތުން ވީމީޑިއާ، ރާއްޖެ އޮންލައިން، އަދި ސަން އޮންލައިންއާ ކުރީގެ ހާމަނޫހުގައިވެސް ޝާން ވަނީ މަސައްކަތް ކުރައްވާފައެވެ.

ސިޔާސީ މަސައްކަތަށް ޝާން ޢަމަލީ ގޮތުން ނުކުންނެވީ، 2018 ވަނަ އަހަރު އެމްޑީޕީގެ ސަރުކާރު އުފެދުމަށްފަހުގައެވެ. މިގޮތުން ޑިފެންސް މިނިސްޓަރު މާރިޔާ އަހްމަދު ދީދީގެ ޕާސަނަލް އެސިސްޓެންޓްގެ މަޤާމާއި އަދި އެމިނިސްޓްރީގެ ސިނިއާ އެގްޒެކްޓިވް ޑިރެކްޓަރގެ މަޤާމުވެސް ޝާން ވަނީ ފުރުއްވާފައެވެ.

ޝާންގެ ކެމްޕޭން ޝިއާރެއްގެ ގޮތުގައި ހަމަޖައްސަވާފައި ވަނީ "މިޖީލުގެ އަޑު މަޖިލީހަށް" އެވެ.

ޝާން ވިދާޅުވީ ރާއްޖޭގެ ސިޔާސީ މަޝްރަޙުން ޚާއްސަކޮށް ރައްޔިތުންގެ މަޖިލީހުން ޒުވާނުންނަށް ފުރުޞަތު ލިބެންޖެހޭ ކަމަށާ އެ ދާއިރާގެ ރައްޔިތުންނާއި އެކަން ބޭނުންވާ ކަމަށެވެ.