އެމްޑީޕީ ހަރުގެ ޑިމޮކްރަޓްސްއަށް ބަދަލުކޮށް އަލުން ހުޅުވައިފި

އެމްޑީޕީ ހަރުގެ ދަ ޑިމޮކްރަޓްސްއަށް ބަދަލުކޮށް އަލުން ހުޅުވައިފިއެވެ.

ބޮޑުތަކުރުފާނު މަގުގައި، އާޓިފިޝަލް ބީޗު ކުރިމަތީގައި ހުންނަ ހަރުގެ އެމްޑީޕީ އަތުން އަތުލައި، ބިމުގެ ވެރިފަރާތުން ދަ ޑިމޮކްރެސްޓްއާ ހަވާލު ކޮށްފައިވަނީ މިދިޔަ މަހުގެ ފަހުކޮޅުއެވެ.

އެޔާއެކު ތަނުގައި ހުރި ރީނދޫ ކުލައިގެ ބަދަލުގައި ހުދުކުލަ ލައި، ތަނބުތަކުގައި ނޫކުލަ ލުމަށްފަހު ޑިމޮކްރެޓްސްއިން ވަނީ ރޭ އެތަން ރަސްމީކޮށް ހުޅުވައި ހަރަކާތްތައް ފަށާފައެވެ.

ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވައިގެން އުފައްދާފައިވާ "ދަ ޑިމޮކްރެޓްސް" އުފެއްދުމަށް އެމްޑީޕީގެ ކުރީގެ ޗެއާޕާސަން ޙަސަން ލަޠީފަށް އީސީން ހުއްދަ ދިނީ މިދިޔަ މަހުގެ 24 ވަނަ ދުވަހުއެވެ.

އެ ޕާޓީން ވަނީ ހަފްތާއެއްގެ ތެރޭގައި ޖުމުލަ 3,560 މީހުންގެ ފޯމު އިލެކްޝަންސް ކޮމިޝަނާއި ހަވާކޮށްފައެވެ.

މިކަމާއި ގުޅިގެން ދަ ޑިމޮކްރެޓްސް އިން ބުނީ، އިލެކްޝަންސް ޕާޓީ ރެޖިސްޓާ ކުރުމުގެ މަރުހަލާގައި ބަލާނީ ހަމައެކަނި ސައްޙަ 3000 ފޯމުކަމަށްް އިލެކްޝަންސް ކޮމިޝަނުން މަޢުލޫމާތު ދީފައިވާ ކަމަށެވެ. އަދި 3000 ހަމަވުމުން ދެންް ހުންނަ ފޯމުތައް އެެ މަރުހަލާގައި  ނުކުރާނެ ކަމަށާއި، އިތުރަށް 560 ފޯމު ލާފައިވަނީ 3000 ފޯމުުގެ ބެކަޕްއަށް ކަމަށެވެ. 3000 ހަމަވެފައި ދެން އިތުރުވާ ފޯމުތައް، ޕާޓީ ރެޖިސްޓްރީ ކުރުމަށްފަހު ދަފްތަރުގައި ހިމަނާނެކަމަށްވެސް އެ ކޮމިޝަނުން ފާހަގަކޮށްފައިވާ ކަމަށް ދަ ޑިމޮކްރެޓްސް އިން ބުނެއެވެ.

އަދި ފޯމުތައް ވެރިފައިކޮށް އީސީއިން ހުއްދަ ދިނުމާއިއެކު އެ ޕާޓީއަށް މެމްބަރުން އިތުރު ކުރުމަށް އެކި ރަށްރަށަށް ދަތުރު ފަށާނެ ކަމަށާ ރިޔާސީ އިންތިހާބަށް ޑިމޮކްރެޓްސްގެ ފަރާތުން ކެމްޕެއިން ވެސް ފަށާނެ ކަމަށް އޭނާ ވިދާޅުވިއެވެ.

އެ ޕާޓީން މިއަހަރުގެ ރިޔާސީ އިންތިހާބުގައި ވާދަ ކުރާނެ ކަމަށް ވަނީ އިއުލާނު ކޮށްފައެވެ.