ޑިމޮކްރެޓްސްގެ ރައީސް ކަމަށް ކުރިމަތިލީ 5 އަހަރު ތެރޭ ޕާޓީ ވެރިކަމާ ހަމަޔަށް ގެނައުމުގެ ތަސައްވަރާއެކު: އަމްރު

‏ދަ ޑިމޮކްރެޓްސްގެ ރައީސްކަމަށް ވާދަކުރައްވަނީ ކުރިއަށް އޮތް ފަސް އަހަރު ތެރޭ ދަ ޑޮމޮކްރެޓްސް ވެރިކަމާ ހަމަޔަށް ގެނައުމުގެ ތަސައްވަރާއެކު ކަމަށް އެ ޕާޓީގެ ރައީސް ކަމަށް ވާދަކުރައްވާ އެސްޓީއޯގެ ކުރީގެ އެމްޑީ ހުސައިން އަމްރު ވިދާޅުވެއްޖެއެވެ.

އަމްރު އިއްޔެ ކުރެއްވި ޓްވީޓެއްގައި ވިދާޅުވީ އޭނާ ޑިމޮކްރެޓްސް ގެ ރައީސް ކަމަށް ވާދަކުރައްވަނީ އެ ޕާޓީއަކީ ރާއްޖޭގެ ސިޔާސީ މަޝްރަހު ބަދަލުކުރާނެ ޕާޓީއަށް ހަދާ، އަދި އެންމެ ވަރުގަދަ، ހަރުދަނާ، އުއްމީދީ ޕާޓީއަކަށް ހެދުމަށް ކަމަށެވެ.

އަދި ކުރިއަށް އޮތް ފަސް އަހަރު ތެރޭ ދަ ޑޮމޮކްރެޓްސް ވެރިކަމާ ހަމަޔަށް ގެނައުމުގެ ތަސައްވަރާއެކު އާ ޖީލަކަށް ފުރުސަތުތައް ހޯދާދެވޭނެ ވިސްނުމާއެކު ކަމަށް އޭނާ ވިދާޅުވި އެވެ.

މި މަޤްސަދު ހާސިލްކުރުމަށްޓަކައި ޕާޓީގެ ރައީސް ކަމަށް އިންތިޚާބު ކުރައްވައިފި ނަމަ އޭނާ ކުރައްވާނެ ގިނަ ކަންކަން އަމްރު ވަނީ ފާހަގަކުރައްވާފައެވެ.

އެގޮތުން ފާހަގަކުރެއްވި ކަންކަމަކީ؛

• ދަ ޑިމޮކްރެޓްސްގެ 5 އަހަރުގެ އެކްޝަން ޕްލޭނެއް އެކުލަވާލާ، އެއަށް ބިނާކޮށް ކޮންމެ އަހަރަކަށް ޕާޓީގެ މައިގަނޑު ހަރަކާތްތަކުގެ ކަލަންޑަރެއް އެކުލަވާލާ، ޕާޓީގެ ހަރަކާތްތައް ގަވާއިދުން ހިންގުން ޔަގީންކުރުން. މިއެކްޝަން ޕްލޭނާ ކަލަންޑަރުގެ ހަރަކާތްތަކުގެ ތަސައްވަރަކީ 5 އަހަރު ތެރޭ ދަ ޑިމޮކްރެޓްސް ރާއްޖޭގެ ވެރިކަމަށް ގެނައުން.

• އަދުގެ އަދި މުސްތަގުބަލުގެ ރާއްޖެއަށް އެންމެ އެކަށޭނެ ދާއިރާތަކުން ކޮމިޓީތައް އެކުލަވާލާ، ގަވާއިދުން ކޮމިޓީ ބައްދަލުވުން ބާއްވާ، ކޮމިޓީތަކުގެ ފަރާތުން އެދާއިރާގެ މާހިރުންނާ ހިއްސާދާރުންނާ ގަވާއިދުން ބައްދަލުކޮށް، ދިރާސާކޮށް ކަރުދާސް ހުށަހަޅަމުން ގެންދިއުން.

އަޅުގަނޑު ދެކޭ ގޮތުގާ މެނިފެސްޓޯއެއް އެކުލަވާލަން ޖެހޭނީ އިންތިހާބެއް ބޯމަތިވުމުންނެއް ނޫން. ޕާޓީގެ ސިޔާސަތުތައް ކަނޑައެޅި، އަންނަމުންދާ ބަދަލުތަކާ އެކު ސިޔާސަތުތައް ވެސް ފުރިހަމަވަމުން ދާންޖެހޭ. މިސާލަކަށް، މަސްވެރިކަމާ ގުޅޭ ކޮމިޓީއިން މަސްވެރިންނާ ބައްދަލުކުރަމުންދާން ޖެހޭ. ފަތުރުވެރިކަމުގެ ކޮމިޓީއިން ފަތުރުވެރިކަމުގެ ދާއިރާގެ ހުރިހާ ފަށަލައެއްގެ ފަރާތްތަކާ މަޝްވަރާކުރަމުން ދާންޖެހޭ. އީޖާދީނުވަތަ އިނޮވޭޝަން އެންޑް ޓެކްނޮލޮޖީ ކޮމިޓީއިން ދުނިޔެއަށް އަންނަމުންދާ ޓެކް ކުރިއެރުންތަކާ ގުޅޭ މައުލޫމާތު އެއްކޮށް، ރާއްޖޭގައި އެކަންކަން ހެޔޮ ގޮތުގަ ބޭނުންކުރެވޭނެ ގޮތް ހޯދަމުން ދާންޖެހޭ. މިކޮމިޓީތަކުގެ ހަރަކާތްތަކުގެ މައުލޫމާތު ގަވާއިދުން ހާމަކުރަމުން ގެންދެވޭނެ.

ހުސައިން އަމްރު

‏• ސިޔާސީ ފަރާތްތަކާ މެދު ރައްޔިތުންގެ އެންމެ ބޮޑު އެއް ޝަކުވާއަކަށް ވަނީ ގުޅުން ކުޑަވުމާ، ދޮރުން ދޮރަކީ ހަމައެކަނި އިންތިހާބުގެ ތާރީހު ކަނޑައެޅުމުން ހިނގާ ކަމަކަށް ވުން.

"އަޅުގަނޑުގެ ވިސްނުމަކީ ދޮރުން ދޮރަށް ހިނގުމަކީ ގަވާއިދުން އެކި ދާއިރާތަކަށް ބަހާލައިގެން ހިނގަމުންދާ ހަރަކާތަކަށް ހެދުން. ސަރވޭ އާ ޕޯލްތައް މެދުވެރިކޮށް ގިނަގިނައިން ރައްޔިތުންގެ ހިޔާލު ހޯދަމުން ގެންދިއުން. ވީހާވެސް ގިނަ ޕްލެޓްފޯމެއް ބޭނުންކޮށްގެން ޕާޓީގެ ސިޔާސަތުތައް ހާމަކޮށް ކިޔައިދިނުމާ، އޭގެ އިތުރުން ސިޔާސަތުތަކާ މެދު އާއްމުކޮށް މަޝްވަރާކޮށް ހިޔާލު ހޯދަމުން ގެންދިއުން." އަމްރު ވިދާޅުވި އެވެ.

‏• ދަ ޑިމޮކްރެޓްސް ލީޑަރޝިޕް އެކަޑެމީ ގާއިމްކުރުން. މި ޕްރޮގްރާމަކީ ސިޔާސީ މަސައްކަތަށް އަލަށް ނުކުންނަ ފަރާތްތައް މެންޓަރކޮށްދީ، މުހިއްމު އެކި ހުނަރު ތަރައްގީކުރުމަށް ތަފާތު ތަމްރީންތައް ހިންގުމަށް ފެށޭނެ ޕްރޮގްރާމެއް. މިއެކަޑެމީގެ ސެޝަންތަކާ، މަސައްކަތު ބައްދަލުވުންތައް ރާއްޖޭގެ އެކި ސަރަހައްދުގަ ކުރިއަށް ގެންދިޔުން.

• ޕާޓީގެ ރެކްރޫޓްމަންޓާ މެމްބަރޝިޕް ޑްރައިވްތަކަކީ ޕާޓީގެ ހުރިހާ މައިގަނޑު ހަރަކާތެއްހެން، އަހަރުގެ ޕާޓީގެ ކަލަންޑަރަށް ބަހާލެވި ގަވާއިދުން ހިނގަމުންދާ ހަރަކާތްތައް ކަމުގައި ޔަގީންކުރުން.

‏• ޒުވާނުންނާ އަންހެނުންގެ ދައުރު ސިޔާސީ ހަރަކާތުގައާ ނިންމުންތައް ނިންމާ މަރުހަލާތަކުގައި އިތުރުކުރުމަށް ޕާޓީގެ ގުނަންތަކާއެކު މަސައްކަތްކުރުމާ، ގަވާއިދުން ހަރަކާތްތައް ހިންގާ ކޮންމެ 4 މަހަކުން މިހަރަކާތްތަކުގެ ރިޕޯޓެއް އެކުލަވާލެވި ހާމަކުރުން.

‏• ދަ ޑިމޮކްރެޓްސްގެ ސިޔާސީ އަދި ފަންނީ ގާބިލްކަން އިތުރުކުރުމަށް ވީހާވެސް ގިނަ ބޭރުގެ ކަމާގުޅޭ ޖަމިއްޔާ ޖަމާއަތްތަކާ ގުޅުން ބަދަހިކޮށް، އެކި ސަރަހައްދީ އަދި ބައިނަލް އަގްވާމީ ނެޓްވަރކްތަކުން ފުރުސަތުހޯދާ ބައިވެރިވެ، މެންބަރުންނަށް ރާޢްޖޭން ބޭރުން ތަމްރީން ޕްރޮގްރާމާ ‏ތަޖުރިބާ ދަތުރުގެ ފުރުސަތު ހޯދަދިނުން

•ރާއްޖޭގަ އަދި ދުނިޔޭގަ ހިނގާ މުހިއްމު ކަންތައްތަކާމެދު އަބަދުވެސް ފާރަވެރިވެ، ހަލުވި ފިޔަވަޅު އަޅާ، މިޕާޓީއަކީ އަބަދުވެސް މާތްވެގެންވާ އިސްލާމްދީނާ، ޑިމޮކްރަސީއާ، އިންސާނީ ހައްގާ ކަރާމަތާ، ހެޔޮވެރިކަމާ ހެޔޮ ހިންގުމާ، ޖަވާބުދާރީވުން އިސްކޮށް ދިފާއުކުރާނެ ޕާޓީއެއްކަން ޔަގީންކުރުން.