ޖޭއެސްސީ އަށް އަލީ އަބްދުއްލަތީފް އިންތިހާބުކޮށްފި

ޖޭއެސްސީއަށް ވަކީލުންގެ ތެރެއިން އަލީ އަބްދުލް ލަތީފް އިންތިހާބުކޮށްފިއެވެ.

ޖޭއެސްސީ އަށް ގާނޫނީ ވަކީލަކު އިންތިހާބުކުރުމަށް އިއްޔެ ބޭއްވި އިންތިހާބު އަލީ އަބްދުއްލަތީފް ކާމިޔާބުކުރައްވައިފައިވަނީ، އިންތިހާބުގައި ވޯޓުލީ 443 ވަކީލުންގެ ތެރެއިން 275 ވަކީލުންގެ ވޯޓު ލިބިވަޑައިގެންނެވެ.

މި އިންތިހާބަށް ކުރިމަތިލެއްވީ އަލީ އަބްދުއްލަތީފް އެކަނި ކަމުން ނެގީ ފެންނަ ނުފެންނަ ވޯޓެކެވެ.

ރާއްޖޭގެ ކޯޓުތަކަށް ގާޒީންނާއި، ފަނޑިޔާރުން އައްޔަން ކުރުމާއި ވަކިކުރުމާއި މަގާމުގެ ކުރިއެރުންތައް ދިނުމުގެ ބާރުތަކާއި، ކޯޓުތަކުގެ ގާބިލްކަމާއި، ފެންވަރާއި، ސުލޫކު ކަށަވަރުކުރުމަށް، ގާނޫނު އަސާސީގެ ދަށުން އެކުލަވާލާފައިވާ މިނިވަން މުއައްސަސާގެ އިންތިހާބު ބާއްވައިދިނީ ބާ ކައުންސިލުންނެވެ.

ޖޭއެސްސީގެ މެމްބަރުކަމުގެ މަސްއޫލިއްޔަތާ އަލީ އަބްދުއްލަތީފް ހަވާލުވެވަޑައިގެންވާނީ ރައީސުލްޖުމްހޫރިއްޔާގެ ކުރިފުޅުމަތީގައި، މަގާމުގެ ހުވާ ކުރެއްވުމަށް ފަހުއެވެ.

އަލީ އަބްދުއްލަތީފަކީ، 2018 ވަނަ އަހަރުގެ ފެބްރުއަރީ މަހު އޭރުގެ ރައީސް ޔާމީންގެ އޯޑަރަށް ސުޕްރީމް ކޯޓުގެ ފަނޑިޔާރުން ހައްޔުރުކުރުމުން، އޭގެ ތެރެއިން ފަނޑިޔާރު އަލީ ހަމީދުގެ ވަކީލުކަން ކުރެއްވި ވަކީލެކެވެ. އަލީ އަބްދުލްލަތީފް ވަނީ ދިވެހިރާއްޖޭގެ އިސްލާމީ ޔުނިވާސިޓިން ލޯ ޑިގްރީ ހާސިލްކުރައްވައިފައެވެ.