މިދިޔަ އަހަރު އެންމެ ދެފުށް ހަމާވާ ގޮތަށް ހިންގާފައިވަނީ އެސްޓީއޯ

ސަރުކާރު ހިއްސާވާ ކުންފުނިތަކުގެ ތެރެއިން މިދިޔަ އަހަރު އެންމެ ދެފުށް ހަމާވާ ގޮތަށް ހިންގާފައިވަނީ އެސްޓީއޯ ކަމަށް ޓްރާންސްޕޭރެންސީ މޯލްޑިވިސް އިން ބުނެފިއެވެ.

ޓްރާސްޕޭރެންސީ މޯލްޑިވްސް އިން ސަރުކާރު ހިއްސާވާ 32 ކުންފުންޏާ ބެހޭގޮތުން ހާމަކުރި 2023 ވަނަ އަހަރުގެ ކޯޕަރޭޓް ގަވަނެންސް ޓްރާންސްޕޭރެންސީ އިންޑެކްސް ގައި އެ އިދާރާއިން ވަނީ  އޯނަޝިޕް ޕޮލިސީ އާއި ކުންފުނީގެ މަގުސަދުތަކާއި އޯގަނައިޒޭޝަން، އޮޕަރޭޝަންތައް އަދި ޕާފޮމެންސާއި ކުންފުންޏާއި ދައުލަތާއި ދެމެދު ކޮށްފައި ހުރި މުއާމަލާތްތަކުގައި އެ ކުންފުނިތަކު ގެ ދެފުށް ފެންނަ މިންވަރު ބަލާފައެވެ.

އެ ރިޕޯޓުން ދައްކާގޮތުގައި އެކުންފުނިތަކުގެ ތެރެއިން ފާއިތުވެ ދިޔަ އަހަރު އެންމެ ދެފުށް ފެންނަގޮތަށް ހިންގާފައިވަނީ އެސްޓީއޯއެވެ. މިގޮތުން އެސްޓީއޯއަށް 67 އިންސައްތް ލިބިފައިވާއިރު، 66 އިންސައްތަ އާއި އެކު ދެވަނަ ލިބިފައިވަނީ ދިރާގަށެވެ.

މި ދެ ކުންފުނީގެ އިތުރުން، ދެފުށް ރަނގަޅަށް ހާމަކޮށްފައިވާ ކުންފުނިތަކުގެ ތެރޭގައި ދެން ހިމެނެނީ ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) އާއި ބޭންކް އޮފް މޯލްޑިވްސް (ބީއެމްއެލް) އާއި އެމްޓީސީސީ ގެ އިތުރުން މޯލްޑިވްސް އިސްލާމިކް ބޭންކް (އެމްއައިބީ) އެވެ.

ޕްރައިވެޓް ސެކްޓާއާ ކުންފުންޏާ ދެމެދު ކުރާ މުއާމަލާތްތަކާއި ސީއެސްއާރު، އިންޓާނަލް ކޮންޓްރޯލް އަދި ކޯޕަރޭޓް އިންޓެގްރިޓީ އާއި ޑިރެކްޓަރުގެ ބޯޑުގެ ދެފުށް ފެންނަ މިންވަރު ވެސް މި ރިޕޯޓްގައި ހިމަނާފައިވާއިރު، މި ރިޕޯޓްގެ އެސެސްމަންޓް އާއި ހަމައަށް 2022 ވަނަ އަހަރުގެ އަހަރީ ރިޕޯޓް ހުށަހަޅާފައިވަނީ 32 ކުންފުނީގެ ތެރެއިން 11 ކުންފުނިކަން އެއިދާރާއިން ވަނީ ފާހަގަކޮށްފައެވެ.

މި ރިޕޯޓަށް މައުލޫމާތު އެއްކޮށްފައިވަނީ، މިދިޔަ އަހަރުގެ އޮގަސްޓް މަހުގެ 14 ވަނަ ދުވަހުން ފެށިގެން ސެޕްޓެމްބަރު މަހުގެ 3 ވަނަ ދުވަހާއި ހަމައަށެވެ.