މިއަހަރުގެ ހޮޓެލް އޭޝިއާ އެގްޒިބިޝަންގައިވެސް އެސްޓީއޯ

ރާއްޖޭގެ ފަތުރުވެރިކަމާއި ވިޔަފާރީގެ ދާއިރާގައި ބާއްވާ އެންމެ ބޮޑު އެއް ހަރަކާތް ކަމަށްވާ މިއަހަރުގެ "ހޮޓެލް އޭޝިއާ އެގްޒިބިޝަން" ގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ބައިވެރިވެއްޖެއެވެ.

މި އެގްޒިބިޝަން ކުރިއަށްދަނީ މި މަހުގެ 28 އިން ފެށިގެން 30 ގެ ނިޔަލަށް ހުޅުމާލޭ ސިންތެޓިކް ޓްރެކްގައެވެ.

މިފަހަރުގެ އެގްޒިބިޝަންގައި އެސްޓީއޯގެ ސްޓޯލް ޚާއްސަކޮށްފައިވަނީ އެ ކުންފުނީގެ ޖެނެރަލް ޓްރޭޑިންގ، އެސްޓީއޯ ޕީޕަލްސް ޗޮއިސް އަދި އެސްޓީއޯ އެނާރޖީގެ ޚިދުމަތްތަކަށެވެ. އެގޮތުން އެސްޓީއޯ ސްޓޯލްގައި އަސާސީ ކާބޯތަކެތީގެ ގޮތުގައި ލިސްޓްކުރެވިފައިވާ ބާވަތްތަކާއި އެސްޓީއޯ އިލެކްޓްރޯނިކްސްގެ ބައެއް އުފެއްދުންތައް ވަނީ ދައްކާލާފައެވެ. އަދި އެ ކުންފުނިން ރާއްޖެ އެތެރެކުރާ ތަފާތު ޕްރޮޑަކްޓްތަކާ ބެހޭ މައުލޫމާތުވެސް މި ސްޓޯލުން ފޯރުކޮށްދެމުންދާނެއެވެ.

އެސްޓީއޯއިން ބުނީ އެކުންފުނީގެ ސްޓޯލަށް ޒިޔާރަތްކުރާ ފަރާތްތަކަށް ޚާއްސަކޮށްގެން، އެސްޓީއޯ ސުޕަމާކެޓުން ލިބެންހުންނަ ތަކެތި ބޭނުންކޮށްގެން ވަގުތުން ލުއިކާނާ ތައްޔާރުކޮށްދޭ ސްޓޭޝަނެއް ވަނީ ގާއިމުކޮށްފައިވާކަމަށެވެ. މީގެ އިތުރުން، އެގްޒިބިޝަން ކުރިއަށްދާ 3 ދުވަހުވެސް ކޮފީސްޓޭޓްގެ ވަކި ބުއިންތަކެއް ހިލޭ ލިބޭނެ އިންތިޒާމު ވަނީ ހަމަޖައްސާފައެވެ. އަދި މާދަމާގެ ވަގުތެއްގައި އެސްޓީއޯ އިން މުޅިން އައު ބްރޭންޑެއް ތައާރަފްކުރުމަށް ހަމަޖެހިފައިވާއިރު، އެ ބްރޭންޑްގެ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނިކާތަކެތީގެ ރަހަ ބަލާލުމުގެ ފުރުސަތުވެސް ޒިޔާރަތްކުރާ ފަރާތްތަކަށް ލިބިގެންދާނެއެވެ.

މި އެގްޒިބިޝަންގައި އެސްޓީއޯ އެނާރޖީގެ ފަރާތުން މިއަހަރު ހާއްސަ އިސްކަމެއް ދީފައިވަނީ ރިޒޯޓު ކަސްޓަމަރުންނަށެވެ. އެގޮތުން ތެޔޮ އުފުލައިދިނުމުގައި އެސްޓީއޯއިން ފޯރުކޮށްދޭ ޚިދުމަތްތަކުގެ މައުލޫމާތު ހިއްސާކުރުމާއި، މި މާކެޓުގައި ކަސްޓަމަރުންގެ ޑިމާންޑްތައް ހުރިނެތްގޮތް ދެނެގަތުމުގެ މަސައްކަތް ކުރިއަށްދާނެއެވެ.

އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް އަގުހުރި އިނާމުތަކެއް ލިބޭ ޕްރޮމޯޝަނަލް ހަރަކާތްތަކެއްވެސް ވަނީ ރާވާފައެވެ. އެގޮތުން "ރެޖިސްޓަރ އެންޑް ވިން" ހަރަކާތުގެ ދަށުން ސްޓޯލްގައި ރަޖިސްޓްރީކުރާ ފަރާތްތަކުގެ މެދުގައި ނަގާ ގުރުއަތުން، ކޮންމެ ދުވަހަކުވެސް ނަސީބުވެރި އެއް ފަރާތް ހޮވައި އިނާމު ދިނުމަށް ވަނީ ހަމަޖެހިފައެވެ. މީގެ އިތުރުން "ފޮލޯ އެންޑް ވިން" ހަރަކާތުގައި ބައިވެރިވެ އެސްޓީއޯ ޕީޕަލްސް ޗޮއިސް ޕޭޖް ފޮލޯކުރާ ފަރާތްތަކުގެ ތެރެއިން ހޮވޭ ނަސީބުވެރި ފަރާތަކަށް ޑިޝްވޮޝަރ އެއް ލިބުމުގެ ފުރުސަތުވެސް ވަނީ ހުޅުވާލާފައެވެ.