ކަރަންޓުގެ ދަތިތަކާ ހުރެ ކަޝްމީރު ޕާކިސްތާނު ފަޅީގައި މުޒާހަރާ ކުރަނީ

ކަރަންޓު ލިބުމުގައި ކުރިމަތިވަމުންދާ ދަތިތަކާއި ގުޅިގެން، ކަޝްމީރުގެ ޕާކިސްތާނު ފަޅީގައި ރައްޔިތުން މުޒާހަރާއަށް ނިކުމެއްޖެއެވެ.

ކަރަންޓުގެ އަގު ބޮޑުވެ، ގިނަ ވަގުތުތަކުގައި ކަރަންޓު ކަނޑާލާފައި ހުރުމުގެ ސަބަބުން އެސަރަހައްދުގެ ރައްޔިތުންގެ އާއްމު ދިރިއުޅުމަށްވަނީ ބޮޑެތި ބުރޫތަކެއް އަރާފައެވެ. ދާދި ފަހުން ކަޝްމީރުގެ ކަމާ ބެހޭ ފަރާތްތަކުން ކަރަންޓުގެ މައްސަލަ ހައްލުކުރުމަށް ފިޔަވަޅުތަކެއް އަޅާކަން އިއުލާންކުރިނަމަވެސް، އެއީ ހަމައެކަނި ރައްޔިތުން ގުނބޯ ހައްދަން ދެއްވި ވާހަކަތަކެއް ކަމަށް ބައެއް މީހުން ސިފަކުރެއެވެ. ކަރަންޓުގެ އަގު ހެޔޮކުރާނެކަމަށް ބުނެ ސަރަހައްދީ ސަރުކާރުން ކުރި ކަމަކީ ކަރަންޓުގެ ވޮލްޓޭޖް ދަށްކުރުމާއި، ދޭތެރެ ދޭތެރެއިން ކަރަންޓު ކަނޑާލުމެވެ. މިހެން ހެދުމުންވެސް ކަރަންޓުގެ އަގު މާބޮޑަށް ހެޔޮ ނުވިތަނުގައި، ރައްޔިތުންނަށް އުފުލަން ޖެހުނީ އިތުރު ބުރައެކެވެ. އެގޮތުން ވިޔަފާރިތަކާއި، ސިއްހީ ހިދުމަތްދޭ ތަންތަނާއި އަދި މަދަރުސާތަކަށް މިކަމުގެ ސަބަބުން އުފުލަން ޖެހޭ ތަކުލީފު ވަނީ ބޮޑުވެފައެވެ.

ކަޝްމީރުގެ ގިނަ ބަޔަކު ދަނީ ޕާކިސްތާނުގެ މައި ސަރުކާރުން އެސަރަހައްދަށް އެކަށީގެންވާ އަޅާލުމެއް ނުދޭކަމަށް ބުނެ ޝަކުވާކުރަމުންނެވެ. އިންޑިއާއާއި ޕާކިސްތާނާއި ދެމެދު މިލްކުވެރިކަމާއިމެދު ޚިލާފު އުފެދިފައިވާ ކަޝްމީރަކީ އިންތިހާއަށް ޤުދުރަތީ ރީތިކަން ލިބިގެންވާ ސަރަހައްދެކެވެ. ކަޝްމީރުގެ އިންޑިއާ ފަޅީގައި އިންޑިއާއިން ފަތުރުވެރިކަން ފުޅާކޮށް، އާމްދަނީ ހޯދިނަމަވެސް، ކަޝްމީރުގެ ޕާކިސްތާނު ފަޅީގައި އިގްތިސާދީ ހަރަކާތްތައް އެކަށީގެންވާ ގޮތެއްގައި ނުހިންގެއެވެ