މި އަހަރުގެ ފުރަތަމަ 9 މަސްދުވަހު ޕާކިސްތާނުގައި 1,200 އަށްވުރެ ގިނަ ހަމަލާ؛ ސަލާމަތީ ނުރައްކާ ބޮޑުވަނީ

މި އަހަރުގެ ފުރަތަމަ ނުވަ މަސްދުވަހުގެ ތެރޭގައި ޕާކިސްތާނުގެ ހަނގުރާމަވެރި ޖަމާއަތްތަކުން 1,232 ހަމަލާއެއް ދީ، އެގައުމުގެ މަސްރަހު ނުރައްކަލުގެ ތެރެއަށް ވައްޓާލައިފިކަމަށް ތަފާސްހިސާބުތަކުން ދައްކައިފިއެވެ.

ޕާކިސްތާނުގެ އިސްލާމާމާބާދުގައި ގާއިމްކޮށްފައިވާ ރިސާޗް އޯގަނައިޒޭޝަނެއް ކަމަށްވާ ޕާކިސްތާން އިންސްޓިޓިއުޓް ފޯ ކޮންފްލިކްޓް އެންޑް ސެކިއުރިޓީ ސްޓަޑީޒް އިން ނެރުނު ރިޕޯޓެއްގައި ބުނާ ގޮތުގައި، މިއީ އެ ގައުމުގެ ސަލާމަތީ ނުރައްކާތެރިކަން ވަރަށް ބޮޑަށް އިތުރުވަމުންދާ ކަމުގެ ނިޝާނެކެވެ.

މި ރިޕޯޓުގައިވާ ގޮތުން، ނިމިދިޔަ ސެޕްޓެމްބަރު މަހަކީ ފާއިތުވި 12 އަހަރުގެ ތެރޭގައި އެންމެ ގިނައިން ހަމަލާތައް ދިން މަހެވެ. އެގޮތުން އެ މަހު އެކަނިވެސް 225 ހަމަލާއެއް ދީފައިވާއިރު، އެ ހަމަލާތަކުގައި 545 މީހުން ވަނީ މަރުވެފައެވެ. މީގެ ތެރެއިން އެންމެ ގިނައިން މަރުވެފައިވަނީ ފުލުހުންނާއި ސިފައިންނެވެ.

މި ހަމަލާތައް ދެމުންދަނީ ތަހްރީކޭ ތާލިބާން ޕާކިސްތާން (ޓީޓީޕީ)، ބަލޮޗިސްތާން ލިބަރޭޝަން އާމީ، ބަލޫޗިސްތާން ލިބަރޭޝަން ފްރަންޓް އަދި އިއްތިހާދު މުޖާހިދީން ޕާކިސްތާން ފަދަ ޖަމާއަތްތަކުންނެވެ. މީގެ ތެރެއިން އިއްތިހާދު މުޖާހިދީން ޕާކިސްތާން އަކީ 2025 ވަނަ އަހަރު އުފެއްދި، ހާފިޒް ގުލް ބަހާދުރީ ގްރޫޕާއި، ލަޝްކަރޭ އިސްލާމް އަދި ހަރަކާތު އިންކިލާބޭ އިސްލާމީ ޕާކިސްތާން ގުޅިގެން އުފައްދާފައިވާ އާ އިއްތިހާދެކެވެ.

މި ހަމަލާތައް އެންމެ ގިނައިން ދީފައިވަނީ ބަލޫޗިސްތާން، ޚައިބަރު ޕަޚްތޫންޚުވާ އަދި ކުރީގެ ގަބީލާ ސަރަހައްދުތަކުގައެވެ. އެގޮތުން ސެޕްޓެމްބަރު މަހު ދިން ހަމަލާތަކުގެ ދެބައިކުޅައެއްބަޔަށްވުރެ ގިނަ ހަމަލާ ދީފައިވަނީ ބަލޫޗިސްތާނުގައެވެ.

ޕާކިސްތާނުން ތުހުމަތުކުރާ ގޮތުގައި އަފްޣާނިސްތާނުގެ ތާލިބާން ސަރުކާރުން ދަނީ ޕާކިސްތާނުގެ ތާލިބާނުންނަށް ރައްކާތެރިކަމާއި ހިޔާވަހިކަން ފޯރުކޮށްދެމުންނެވެ. މީގެ ސަބަބުން އިސްލާމާމާބާދާއި ކާބުލްއާ ދެމެދު އޮތް ގުޅުންވެސް ވަނީ ވަރަށް ބޮޑަށް ގޯސްވެފައެވެ.