ސިއްހީ ތައުލީމު ކުރިއެރުވުމަށް އެމްއެންޔޫއިން ޕާކިސްތާނުގެ ޔުނިވާސިޓީއަކާ ގުޅިގެން ކޮންފަރެންސެއް ބާއްވައިފި

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއި ޕާކިސްތާނުގެ ރިފާހު އިންޓަރނޭޝަނަލް ޔުނިވަރސިޓީ ގުޅިގެން، ސިއްހީ ތައުލީމުގެ ދާއިރާއަށް ޚާއްޞަކޮށްގެން ހައިބްރިޑް ބުޓީކް ބައިނަލްއަޤްވާމީ ކޮންފަރެންސެއް ރާއްޖޭގައި ފަށައިފިއެވެ.

މި ކޮންފަރެންސުގައި ދުނިޔޭގެ އެކި ކަންކޮޅުތަކުން ސިއްހީ ދާއިރާގެ މުދައްރިސުންނާއި، ދިރާސާކުރާ ފަރާތްތަކާއި، ސިއްހީ ޚިދުމަތްތެރިންނާއި އަދި ސިޔާސަތު ކަނޑައަޅާ ފަރާތްތައް ވަނީ ބައިވެރިވެފައެވެ.

މި ކޮންފަރެންސް ރަސްމީކޮށް އިފްތިތާޙު ކޮށްދެއްވީ މިނިސްޓަރ އޮފް ހެލްތު، ފެމިލީ އެންޑް ވެލްފެއަރ، ގީލާ ޢަލީއެވެ. މި ރަސްމިއްޔާތުގައި ޕާކިސްތާނުން ދިވެހިރާއްޖެއަށް ކަނޑައަޅާފައި ހުންނަވާ ހައި ކޮމިޝަނަރ، ވައިސް އެޑްމިރަލް ފައިޞަލް ރަސޫލް ލޯދީ ވެސް ބައިވެރިވިއެވެ. މި ބައްދަލުވުމުން ދެ ޤައުމުގެ ދެމެދުގައި ތައުލީމީ ގުޅުން ބަދަހިކޮށް، އެކެޑެމިކް ދާއިރާއިން އެއްބާރުލުން ދިނުމުގެ މުހިންމުކަން ވަނީ ފާހަގަކޮށްފައެވެ.

"ޝޭޕިންގ ދަ ފިއުޗަރ އޮފް ހެލްތު ޕްރޮފެޝަންސް އެޑިޔުކޭޝަން: އިނޮވޭޝަން، ލީޑަރޝިޕް އެންޑް އެކްސެލެންސް" މި މައުޟޫގެ މައްޗަށް ބިނާކޮށް ކުރިއަށްދިޔަ މި ކޮންފަރެންސްގެ މައިގަނޑު މަޤުޞަދަކީ، ބަދަލުވަމުންދާ ސިއްހީ ނިޒާމުތަކުގެ ބޭނުންތަކަށް ފެތޭގޮތަށް މުސްތަޤުބަލުގެ ސިއްހީ ޚިދުމަތްތެރިން ތައްޔާރުކުރުމެވެ. މީގެއިތުރުން ޒަމާނީ ޓެކްނޮލޮޖީއާއި އީޖާދީ އުސްލޫބުތައް ބޭނުންކޮށްގެން ކިޔަވައިދިނުން ހަރުދަނާކުރުމާ ގުޅޭގޮތުން ވެސް ވަނީ މަޝްވަރާކޮށްފައެވެ.

ކޮންފަރެންސްގައި ވާހަކަފުޅުދައްކަވަމުން އެމް.އެން.ޔޫގެ ވައިސް ޗާންސެލަރު ވިދާޅުވީ، ސިއްހީ ތައުލީމުގައި ސައިންސުގެ އިލްމުގެ އިތުރުން މުޖުތަމައުގެ އިޖުތިމާއީ އަދި ސަގާފީ ހާލަތްތަކަށް ރިއާޔަތްކުރުމަކީ ނުހަނު ބޭނުންތެރިކަމެއް ކަމަށެވެ. ރަނގަޅު ސިއްހީ ޚިދުމަތްތެރިއަކު ވުމަށްޓަކައި، ބޭސްވެރިކަމުގެ ސައިންސުގެ އިތުރުން އެ ޚިދުމަތް ދެވޭ މުޖުތަމައުގެ ޙާލަތު ދެނެގަންނަންޖެހޭނެ ކަމަށް ވިދާޅުވެފައިވެއެވެ. މިއީ ދިވެހިރާއްޖޭގެ އެކި ކަންކޮޅުތަކުގެ ތަފާތު ބޭނުންތަކަށް ފެތޭ، އަޅައިލުން ބޮޑު، ބަލިމީހުންނަށް އިސްކަންދޭ ފެންވަރުގެ ޚިދުމަތްތަކެއް ފޯރުކޮށްދިނުމަށް މަގުފަހިކޮށްދޭނެ ކަމެކެވެ.

މިކޮންފަރެންސްގެ ޕްރޮގްރާމްގައި ކަރިކިއުލަމް ތަރައްގީކުރުމާއި، އާޓިފިޝަލް އިންޓެލިޖެންސް (އޭ.އައި) ހިމެނޭހެން ޓެކްނޮލޮޖީގެ އެހީގައި ކިޔަވައިދިނުމާއި، ލީޑަރޝިޕް އަދި ޕްރޮފެޝަނަލިޒަމް ފަދަ މުހިންމު ދާއިރާތަކަށް ވަނީ އަލިއަޅުވާލާފައެވެ. މި ހައިބްރިޑް ބުޓީކް ކޮންފަރެންސް ކާމިޔާބުކަމާއެކު ކުރިއަށްގެންދިއުމަށް ޖޭ.އޭ.އެމް ވެބް ސާވިސަސް އިން ވަނީ ސްޕޮންސަރ ކޮށްފައެވެ.

މިފަދަ ހަރަކާތްތަކުގެ ސަބަބުން ރާއްޖޭގެ ސިއްހީ ތައުލީމީ ފެންވަރު މަތިވެ، ބައިނަލްއަޤްވާމީ ގުޅުންތައް އިތުރަށް ބަދަހިވެގެންދާނެއެވެ.