ތާލިބާނުންގެ ނިންމުމަކާ ގުޅިގެން އަފްޣާނިސްތާނުގައި ލޮލުގެ ކޯނިއާ ބަދަލުކުރުން ހުއްޓުމަކަށް
ލޮލުގެ ފެނުން އަނބުރާ ހޯދައިދިނުމަށް ކުރާ ކޯނިއާ ބަދަލުކުރުގެ ސާޖަރީތަކަކީ އިސްލާމީ އުސޫލުތަކާ ޚިލާފު ކަމެއް ކަމަށް ކަނޑައަޅައި، އެފަދަ އޮޕަރޭޝަންތައް ކުރުން ތާލިބާނުން މަނާކޮށްފިއެވެ.
ޕާކިސްތާނުގެ ޑޮކްޓަރުންގެ ޖަމިއްޔާއެއް ކަމަށްވާ 'އެޕްނާ' އިން ހިލޭ ކޯނިއާ ހަދިޔާކޮށްގެން ކުރިއަށްގެންދިޔަ އިންސާނީ މި އެހީގެ މަޝްރޫއު ހުއްޓާލުމަށް ތާލިބާނުން އަންގާފައިވާކަމަށް މީޑިއާގެ ރިޕޯޓްތައް ބުނެއެވެ. މި ނިންމުމާ ގުޅިގެން ކާބުލް އާއި ޖަލާލުއާބާދުގެ ހޮސްޕިޓަލްތަކުން ވަނީ އޮޕަރޭޝަންތައް މެދުކަނޑާލައި، ފަރުވާއަށް އިންތިޒާރު ކުރަމުންދިޔަ އެތައް ސަތޭކަ ބަލިމީހުން އަނބުރާ ފޮނުވާލާފައެވެ.
މި މަޝްރޫއުގެ ދަށުން މިހާތަނަށް 150 އަށްވުރެ ގިނަ އަފްޣާން ރައްޔިތުންނަށް ލޮލުގެ ފެނުން އަނބުރާ ލިބިފައިވާއިރު، 'އެޕްނާ' ޖަމިއްޔާއިން އަންނަނީ 2017 ވަނަ އަހަރުން ފެށިގެން މިފަދަ އެތައް ހާސް އެހީތަކެއް ފޯރުކޮށްދެމުންނެވެ. ނަމަވެސް، ތާލިބާނުންގެ މި ހަރުކަށި ނިންމުމުގެ ސަބަބުން، ފަރުވާ ދެވޭނެ ފަދަ ބަލިތަކުގައި ލޮލުގެ ފެނުމުން މަހްރޫމްވެފައިވާ ގިނަ ބައެއްގެ އުންމީދުތައް ވަނީ ގެއްލިފައެވެ.
ސިއްހީ މާހިރުން ފާހަގަކުރާ ގޮތުގައި، މިއީ އަފްޣާނިސްތާނުގެ ބަލިކަށިވަމުންދާ ސިއްހީ ނިޒާމަށް ކުރިމަތިވި އިތުރު ގޮންޖެހުމެކެވެ. އަދި ދީނީ މާނަކުރުންތަކުގެ ތެރެއިން ޒަމާނީ ސިއްހީ ފަރުވާތަކަށް ހުރަސް އެޅުމަކީ އާންމު ރައްޔިތުންގެ ދިރިއުޅުމަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމެއް ކަމަށް ވެސް އެ ފަރާތްތަކުން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
