ޕީއައިއޭގެ ފްލީޓް ބޮޑުކޮށް ރާއްޖެއަށް ސީދާ ދަތުރުތައް ފެށުމަށް ނިންމައިފި
ޕާކިސްތާންގެ ޤައުމީ އެއާލައިންސް (ޕީއައިއޭ) އިން އެ ކުންފުންޏަށް އާ މަތިންދާބޯޓުތައް ހޯދައި ރާއްޖެއާއި ޕާކިސްތާނާ ދެމެދު ސީދާ ދަތުރުތައް ފެށުމަށް ނިންމައިފިއެވެ.
މި ކަން ހާމަކޮށްފައިވަނީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ޕާކިސްތާނަށް ކުރައްވަމުން ގެންދަވާ ރަސްމީ ދަތުރުފުޅުގައި ޕީއައިއޭގެ ހެޑް އޮފީހުގައި އެ ކުންފުނީގެ އިސްވެރިންނާ ކުރެއްވި ބައްދަލުވުމެއްގައެވެ. އެ ބައްދަލުވުމުގައި ޕީއައިއޭގެ ސީއީއޯ އެއާ ވައިސް މާޝަލް މުހައްމަދު އާމިރު ހަޔާތު ވިދާޅުވީ، ފްލީޓަށް ބޯޓުތައް ލިބުނުހާ އަވަހަކަށް ރާއްޖެއަށް ސީދާ ދަތުރުތައް ފެށޭނެ ކަމަށެވެ. މިވަގުތު ޕާކިސްތާނާ ރާއްޖެއާ ދެމެދު ސީދާ ދަތުރުތައް ނޯވެއެވެ.
ޕީއައިއޭއިން ނެރެފައިވާ ބަޔާނުގައި ފާހަގަކޮށްފައިވާ ގޮތުގައި ސީދާ ދަތުރުތައް ފެށިއްޖެ ނަމަ ފަތުރުވެރިކަމާއި ވިޔަފާރީގެ ދާއިރާއިން ދެ ޤައުމުގެ ގުޅުން އިތުރަށް ވަރުގަދަވާނެއެވެ. ދިވެހި ވަފްދާއެކު ބޭއްވި ބައްދަލުވުމުގައި ވައިގެ ދަތުރުފަތުރު ބަދަހިކުރެވޭނެ ގޮތްތަކާ ގުޅޭ ގޮތުން ފުޅާ ދާއިރާއެއްގައި ވަނީ މަޝްވަރާކޮށްފައެވެ.
ރައްޔިތުން މަޖިލީހުގެ ރައީސް އަބްދުއްރަހީމް ވިދާޅުވީ ރާއްޖެ އާއި ޕާކިސްތާނުގެ ވައިގެ ގުޅުން ރަނގަޅުވެއްޖެ ނަމަ، ދެ ޤައުމުގެ ދެމެދުގައި ވިޔަފާރިއާއި ފަތުރުވެރިކަމަށް ބޮޑު ކުރިއެރުމެއް ލިބޭނެ ކަމަށެވެ. އެމަނިކުފާނު ވިދާޅުވި ގޮތުގައި ސީދާ ދަތުރުތައް ފެށުމުން ދެ ޤައުމުގެ ދެމެދުގައި އޮތް އަޚުވަންތަ ގުޅުން އިތުރަށް ބަދަހިވެގެންދާނެ ކަމަށެވެ.
ޕީއައިއޭގެ ފްލީޓް ޒަމާނީ ކުރުމުގެ ގޮތުން ޕާކިސްތާނުގެ މާލީ ވަޒީރު މުހައްމަދު އައުރަންގްޒޭބް ވަނީ ބޮއިންގް ގްލޯބަލްގެ ރައީސް ޑރ. ބްރެންޑަން ނެލްސަންއާ ބައްދަލުކުރައްވައި އާ ބޯޓުތައް ހޯދުމާ ގުޅޭ ގޮތުން މަޝްވަރާ ކުރައްވައިފައެވެ.
މި އަހަރުގެ ފަހު ކުއާޓަރުގައި ބައިނަލްއަޤުވާމީ ހަތް އެއާލައިނަކުން ރާއްޖެއަށް އަލަށް ދަތުރުތައް ފެށުމަށް ހަމަޖެހިފައިވާ ކަމަށް ފަތުރުވެރިކަމާ ބެހޭ ވުޒާރާއިން ހާމަކޮށްފައިވެއެވެ. އޭގެ ތެރޭގައި ރަޝިޔާ ބަލްގޭރިއާ ވިއެޓްނާމް އަދި އާމީނިއާގެ އެއާލައިންތަކާއި އިތިއޯޕިއަން އެއާލައިންސާއި ފްރެންޗް ބީ އަދި ކުވައިތު އެއާވޭސް ހިމެނެއެވެ. މި އަހަރުގެ ސެޕްޓެމްބަރު ނިޔަލަށް 1.49 މިލިއަން ފަތުރުވެރިން ރާއްޖެ ޒިޔާރަތްކޮށްފައިވާއިރު ފަތުރުވެރިކަމުގެ ޕީކް ސީޒަނުގައި އެ ޢަދަދު ބޮޑުތަނުން އިތުރުވާނެ ކަމަށް ސަރުކާރުން ލަފާކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
