މެޗް ފިކްސިން މައްސަލާގައި ފީފާއިން ވެލެންސިއާއަށް އެންގީ، އޭއެފްސީ މެދުވެރިކޮށް ކުރިއަށްދިއުމަށް

ނިއުރޭޑިއަންޓާ ދެކޮޅަށް ކުޅެންއޮތް މެޗް ގްރީން ސްޓްރީޓްސް އިން ދޫކޮށްލި މައްސަލާގައި ވެލެންސިއާއިން ތުހުމަތުކުރާ މެޗް ފިކްސިން މައްސަލަ އޭއެފްސީ އަށް ހުށަހަޅައިގެން ކުރިއަށްގެންދިއުމަށް ފީފާއިން ވެލެންސިއާއަށް އަންގައިފިއެވެ.

ގްރީން ސްޓްރީޓްސްއިން މެޗް ދޫކޮށްލިކަމަށް ބުނާ މައްސަލާ ވެލެންސިއާއިން މިދިޔަ މަހުގެ އަށްވަނަ ދުުވަހު ވަނީ, މި މައްސަލަ ފީފާ އަދި އޭއެފްސިއަށް ހުށަހަޅާނޭކަމަށް ބުނެފައެވެ. އޭގެ ކުރިން އެފްއޭއެމުން ވަނީ މި މައްސަލާގައި އެ އިދާރާގެ ނިންމުން ހިއްސާކޮށްފައެވެ. ވެލެންސިއާއިން މި މައްސަލަ ފީފާ އަދި އޭއެފްސިއަށް ހުށަހެޅުމަށް ނިންމީ މައްސަލާފައި އެފްއޭއެމްގެ ނިންމުން ޤަބޫލު ނުކުރެވިގެންނެވެ.

ވެެލެންސިއާއިން މިއަދު ނެރުނު ބަޔާނުގައި ބުނެފައިވަނީ ފީފާއަށް މައްސަލަ ހުށަހެޅުމުން އޭއެފްސީ މެދުވެރިކޮށް މައްސަލާގައި ކުރިއަށްދިއުމަށް އެ ކްލަބަށް އަންގާފައިވާކަމަށެވެ. ވެލެންސިއާއިން ރޭ ނެރުނު ބަޔާނުގައިވެސް އެ ކުލަބުން ވަނީ މި މައްސަލާގައި އެފްއޭއެމުން ކަންކަން ކޮށްފައިވަނީ އުސޫލުން ބޭރުންކަން ފާހަގަކޮށްފައެވެ.

އެގޮތުން އިސްތިއުނާފް ކުރުމުގެ ހައްޤު ގްރީން ސްޓްރީޓްސްއަށް ދީ ވެލެންސިއާށް އެ ފުރުސަތު ނުދިނުމާއި، މެޗް ރެފްރީ ރިޕޯޓާއި މެޗް ކޮމިޝަނަރުގެ ރިޕޯޓްގެ އިތުރުން އެފްއޭއެމްގެ އެޕީލް ކޯޑުވެސް ދީފައި ނުވާކަމަށް ވެލެންސިއާއިން ވަނީ ތުހުމަތުކޮށްފައެވެ. މީގެ އިތުރުން މައްސަލާގައި ކުރިއަށްދިއުމަށް އެފްއޭއެމުްނ ވެލެންސިއާއަށް ފޯރުކޮށްދޭންޖެހޭ އަސާސީ މައުލޫމާތުތައް ފޯރުކޮށްދިނުމުގައި އިހުމާލުވެފައިވާކަން ވަނީ ފާހަގަކޮށްފައެވެ.

ގްރީން ސްޓްރީޓްސް މެޗް ދޫކޮށްލި މައްސަލާގައި ވެލެންސިއާއިން ރުޅިގަދަވެފައިވަނީ، މައްސަލައިގެ ބާވަތުން ގްރީން ސްޓްރީޓަށް ދިން އަދަބު ކުޑަވުމާއި، އެ ކްލަބަށް ދޭން ނިންމި އަދަބު ކުޑަވުމުންނެވެ. ވެލެންސިއާއިން ބުނީ ގްރީން ސްޓްރީޓުގެ އެ އަމަލަކީ ނިއުރޭޑިއަންޓާއި، އެހެން ކްލަބްތަކާއި އެ ކްލަބްތަކުގެ ކުޅުންތެރިންގެވެސް ހައްޤު ގެއްލިގެންދާނޭ ކަމެއްކަމަށެވެ. މެޗް ފިކްސިންގެ އަމަލަކީ ކުޅިވަރުގެ އަހްލާގާއި، ބައިނަލްއަޤްވާމީ ފެންވަރުގައިވެސް އެންމެބޮޑު އަދަބު ދޭ ކަންކަމުގެ ތެރޭގައި ހިމެނޭ މުހިންމު އަމަލެއްކަމަށް ވެެލެންސިއާއިން ވަނީ ފާހަގަކޮށްފައެވެ.