އިންފަންޓީނޯ އުޅެނީ އަމިއްލަ ޖީބު ބޮޑުކުރުމަށް؛ ވަގުތުން ވަގުތައް އިސްތިއުފާ ދޭންޖެހޭ: ލުއިސް ފީގޯ

ދުނިޔޭގެ ފުޓުބޯޅައިގެ މައި އިދާރާ، ފީފާގެ ރައީސް ޖިއާނީ އިންފަންޓީނޯ މަގާމުން އިސްތިއުފާ ދެއްވުމަށް ފުޓުބޯޅަ ލެޖެންޑް ލުއިސް ފީގޯ ގޮވާލައިފިއެވެ. ޕޯޗުގަލްގެ ކުރީގެ ތަރި މިކަމަށް ގޮވާލާފައިވަނީ ފީފާގެ ރައީސްގެ އިތުބާރު ގެއްލިފައިވާކަމަށް ބުނެ ނެރުނު ބަޔާނެއްގައެވެ.

ފީގޯ ބުނި ގޮތުގައި އިންފަންޓީނޯ ވަނީ އޭނާ ހަވާލުވި މަތިވެރި މަގާމުގެ އަގު ވައްޓާލާފައެވެ. އަދި އަމިއްލަ މަންފާއަށްޓަކައި ދޮގުހަދައި، ފުޓުބޯޅައިގެ ކުރިއެރުމަށްވުރެ ބޮޑަށް އަމިއްލަ ޖީބު ބޮޑުކުރުމަށް އިންފަންޓީނޯ މަސައްކަތް ކޮށްފައިވާ ކަމަށް ފީގޯ ތުހުމަތު ކުރިއެވެ.

"އިންފަންޓީނޯ ވަނީ އޭނާގެ ސީނިއާ މުވައްޒަފުންނާއި، ގާތް މުޝީރުން އަދި ފުޓުބޯޅައަށްޓަކައި މުޅި އުމުރު ހޭދަކުރަމުންދާ ގިނަ ބައެއްގެ ތާއީދު ގެއްލުވާލާފައި. އޭނާގެ އަމިއްލަ ގަދަރު ސަލާމަތް ކުރަން މިހާރު މާ ލަސްވެއްޖެ. އެކަމަކު ފުޓުބޯޅަ ސަލާމަތް ކުރަން އަދި ވަގުތު އެބައޮތް. އޭނާ މިހާރުން މިހާރަށް އިސްތިއުފާ ދޭންޖެހޭ،" ފީގޯގެ ބަޔާނުގައިވެއެވެ.

ފީގޯ އިތުރަށް ފާހަގަކުރި ގޮތުގައި، ފާއިތުވި 10 ދުވަހުގެ ތެރޭގައި ފީފާގެ ތެރެއިން ފެނިގެންދިޔަ ކަންކަމަކީ އޭނާގެ 20 އަހަރުގެ ފުޓުބޯޅަ ކެރިއަރުގައިވެސް ދެކެފައިނުވާ ފަދަ ދަށު ދަރަޖައިގެ، މަކަރުވެރި އަމަލުތަކެކެވެ. ވަކި ބަޔަކަށް މަންފާ ހޯދައިދިނުމަށްޓަކައި ވޯލްޑް ކަޕް ފަދަ ބޮޑެތި މުބާރާތްތަކުގެ އޮނިގަނޑަށް ބަދަލު ގެންނަން އުޅުމަކީ ގަބޫލުކުރެވޭނެ ކަމެއް ނޫން ކަމަށް އޭނާ ބުންޏެވެ.

މީގެ އިތުރުން، އިންފަންޓީނޯ ގެންނަން އުޅޭ ބަދަލުތަކުގެ ސަބަބުން އަހަރަކު 30 މިލިއަން ޑޮލަރުގެ މުސާރައެއް އޭނާއަށް ލިބޭނެ މަގު ފަހިވާކަން ސިއްރުކޮށްފައިވާ ކަމަށާއި، މިކަމުގައި އެއްވެސް ދެފުށް ފެންނަ ސިޔާސަތެއް ނެތް ކަމަށް ފީގޯ ތުހުމަތު ކުރެއެވެ. އަދި އުރުދުންގެ ފުޓުބޯޅަ އެސޯސިއޭޝަނުގެ ރައީސް ޕްރިންސް އަލީ ފާހަގަކުރެއްވި ފަދައިން، ފީފާގެ ތެރޭގައި "މޮބް" އެއްގެ އުސޫލުން ކަންކަން ހިންގަމުންދާ ކަމަށްވެސް ފީގޯ ބުންޏެވެ.

ފީގޯގެ ބަޔާން ނިންމާލަމުން ބުނެފައިވަނީ، ފުޓުބޯޅައިގެ ފައިސާ ހޭދަކުރަންޖެހެނީ އިންވެސްޓަރުންނަށް ނުވަތަ އިދާރީ މީހުންގެ ބޮޑު މުސާރައަށް ނޫން ކަމަށެވެ. އޭގެ ބަދަލުގައި އެ ފައިސާ ހޭދަކުރަންޖެހެނީ ދުނިޔޭގެ ކޮންމެ ކުއްޖަކަށްވެސް ފުޓުބޯޅަ ކުޅުމުގެ ފުރުސަތު ހޯދައިދިނުމަށްޓަކައި ދަނޑުތައް ބިނާކުރުމާއި ކޯޗުން ތަމްރީނު ކުރުމަށް ކަމަށް އޭނާ ބުންޏެވެ. ފީފާގެ ރިޒާވްގައި ހުރި 5 ބިލިއަން ޑޮލަރު މިކަންކަމަށް ބޭނުންކުރެވޭނެ ކަމަށްވެސް އޭނާ ފާހަގަކުރިއެވެ.