ކޮބާ ތައްޔާރުތަ! 101 އިނާމާއެކު ސަލަފުގެ ރޯދަ ހަދިޔާ އިވެންޓް މިރޭ

ޖަމްޢިއްޔަތުއްސަލަފުގެ ފަރާތުން ކުރިއަށް ގެންދާ "ސަލަފު ރޯދަ ހަދިޔާ" ހަރަކާތް މިރޭ ބޭއްވުމަށް ނިންމައިފި އެވެ.

މި ޙަރަކާތަކީ ރަމަޟާންމަހަށް ތައްޔާރުވުމުގެ ގޮތުން، އެ މަހާގުޅޭ ތަފާތު މަޢުލޫމާތުތައް ފޯރުކޮށްދިނުމަށްޓަކައި ހިންގޭ ސިލްސިލާ ޕްރަގްރާމްތަކުގެ ތެރޭގައި ހިމެނޭ އިވެންޓެކެވެ. ސަލަފުގެ ފަރާތުން ބާއްވާ މި އިވެންޓް އޮންނާނީ މިރޭ 8:30 ގައި ހުޅުމާލޭ ސެންޓްރަލް ޕާކުގައެވެ. މި އިވެންޓް ގައި ގުރުއަތުން ހޮވޭ ފަރާތްތަކަށް 101 އިނާމު ދިނުމަށް ވަނީ ހަމަޖެހިފައެވެ. މި އިނާމުތަކަށް ކޫޕަން ދޫކުރުން ހަމަޖެހިފައިވަނީ މިރޭ 8:15 އިން 9:15 އަށް ހުޅުމާލޭ ސެންޓްރަލް ޕާކުގައެވެ.

މިރޭގެ އިވެންޓް ގައި ދެވޭ 101 އިނާމުގެ ތެރޭގައި އަގުހުރި ތަފާތު އެތައް އިނާމެއް ވެއެވެ. އެލިއާއިން ހަދިޔާކޮށްފައިވާ ސައިކަލަކާއި، އެސްޓީއޯ އިންހަދިޔާކޮށްފައިވާ ފުރިޖަކާއި އަވަނަކާއި ބްލެންޑަރއަކާއި، އެލްވަން ހާޑްވެއާ އިން ހަދިޔާކޮށްފައިވާ ދޮންނަ މެޝިނަކަށާއި، ޢުމުރާ ދަތުރަކާއި، އިސާހުއަޙްމަދުޑޮޓްކޮމް އިން ހަދިޔާކޮށްފައިވާ ލެޕްޓޮޕަކާއި، މެރިން އިކުއިޕްމަންޓްސް އިންހަދިޔާކޮށްފައިވާ 12 ހާސް ބީޓީޔޫގެ އެއާކޯން އަކާއި، ރެޑްވޭވުން ހަދިޔާކޮށްފައިވާސޯފާއަކާއި، ފަރުމާ ފަރުނީޗަރސް އިން ހަދިޔާކޮށްފައިވާ އެނދެއް ހިމެނެއެވެ.

މި ހަރަކާތަށް ހާޒިރުވާ މީހުންނަށް ދެވޭ 101 އިނާމުގެ އިތުރުން، އޮންލައިންކޮށް މި ހަރަކާތް ބަލާ މީހުންނަށް ހާއްސަ އިނާމުތަކެއް ދޭގޮތަށް ވަނީ ހަމަޖެހިފައެވެ. އެހެންކަމުން، ވީހާވެސް ގިނަ ބަޔަކު މި ޙަރަކާތުގައި ބައިވެރިވެ، ރޯދަމަހާގުޅޭ ދީނީ މަޢުލޫމާތުތައް މުއްސަނދިކޮށްލުމަކީ ޖަމްޢިއްޔަތުއްސަލަފުގެ އެދުމެއް ކަމަށް އެ ޖަމިއްޔާ އިން ބުންޏެވެ.

މި ހަރަކާތުގެ އިތުރުން، ޖަމްޢިއްޔަތުއްސަލަފުގެ ފަރާތުން ރަމަޟާންމަހަށް އިސްތިގު ބާލުކުރުމުގެ ގޮތުން، ދީނީ ތަފާތު އެކިޙަރަކާތްތައް ރާއްޖޭގެ އެކި ހިސާބުތަކުގައި އަންނަނީ ކުރިއަށް ގެންދަމުންނެވެ. އޭގެ ތެރޭގައި ރަމަޟާންމަހަށް ތައްޔާރުވުމާގުޅޭ ދަރުސްތަކާއި، ވޯކްޝޮޕްތަކާއި، ޓީވީޕްރޮގްރާމްތައް ހިމެނެއެވެ. އަދި ރޯދަމަހުގެ ކޮންމެ ދުވަހެއްގައި ކުރިއަށް ގެންދާ މިސްކިތު ދަރުސް ޕްރޮގްރާމްތަކާއި، ހޮސްޕިޓަލްތަކުގައި ތިބޭ ބަލިމީހުންނަށާއި އެހީތެރިންނަށާއި ހޮސްޕިޓަލްތަކުގެ ސްޓާފުންނަށް ރޯދަ ވިއްލުމަށްދޭ ހަދިޔާ ދިނުމަށް އަންނަނީ ތައްޔާރު ވަމުންނެވެ.