އެސްޓީއޯއިން އަނެއްކާވެސް ކާށި ޝިޕްމަންޓެއް ގެނެސް ބާޒާރަށް ނެރެފި

ބާޒާރުގައި ކާށީގެ އަގުތައް ނިހާޔަތަށް މައްޗަށްދާން ފެށުމާއެކު އެސްޓީއޯއިން އަނެއްކާވެސް ކާށި ޝިޕްމަންޓެއް ގެނެސް ވިއްކަން ފަށައިފިއެވެ.

އެސްޓީއޯއިން ބުނީ ކާށީގެ އިތުރު ޝިޕްމަންޓެއް ގެނެސްބާޒާރަށް ނެރެފައިވާކަމަށެވެ. އެސްޓީއޯއިން މިފަހަރު ކާށި ވިއްކަނީ ކިލޯއެއް 20 ރުފިޔާގެ މަގުންނެވެ. ރޯދަމަސް ފެށުނުއިރު ކާށީގެ އަގު އުފުލުމާއެކު އެސްޓީއޯއިން ވަނީ ކާށީގެ ޝިޕްމަންޓެއް ގެނެސް ވިއްކާފައެވެ. އެފަހަރު ކާށި ވިއްކާފައިވަނީ، ކާއްޓެއް 5 ރުފިޔާގެ މަގުންނެވެ. އޭރު ބާޒާރުގައި ކާށީގެ އަގުހުރީ 10 ރުފިޔާއިން މަތީގައެވެ.

ދަތުރުވެރިންގެ މާރުކޭޓުގައި މިހާރުވެސް އަގުތައް އެންމެ ބޮޑު އެއްޗެހީގެ ތެރޭގައި ކާށި ހިމެނެއެވެ. ހުނިގޮނޑިތިލައަށް ނުވަންނަވަރުގެ ކާއްޓެއް 10 ރުފިޔާގައި ހުރިއިރު، ހެޔޮވަރު ސައިޒެއްގެ ބޮޑު ކާއްޓެއްގެ އަގު މިހާރު ހުރީ 40 ރުފިޔާއިން މަތީގައެވެ

ރާއްޖޭގެ ބާޒާރުގައި ކާށީގެ އަގު މައްޗަށްދިއުމާ ގުޅިގެން މީގެ ކުރިންވެސް އެހެން ޤައުމުތަކުން ކާށި ގެނެސް ވިއްކާފައި އެބަހުއްޓެވެ. މިގޮތުން މީގެ ކުރިން އިންޑިއާ، ލަންކާ އަދި އިންޑޮނޭޝިއާއިންވެސް ކާށި ގެނެސްފައި އެބަހުއްޓެވެ. ނަމަވެސް އެންމެ ގިނައިން ކާށި ގެންނަނީ އިންޑިއާއިންނެވެ.