ތަހުޒީބީ ސިޔާސީ ހަރަކާތް!

ދެހާހުގެ އަހަރުތަކުގެ ތެރޭގައި ދިވެހިރާއްޖޭގައި ޑިމޮކްރަސީ، މި ބަސް ވައިގައި ހިފައި، މީހުންގެ ދުލުކުރިއަށް އަންނަން ފެށިއެވެ. ސިކުނޑިތަކުގެ ވިސްނުންތަކާއި، އަތުގެ ލިޔުންތަކާއި އަދި ބުއްދީގެ ފިކުރުތަކުގައި އެޅިފައިވާާ ކަސްތޮޅުތަކުން މިންޖުވެ، ޒަމާނީ ވިސްނުންތަކާއި ސިޔާސީ ފިކުރުތަކަށް ދިވެހިން މިސްރާބު ޖަހަން ފެށިއެވެ. އާ އުސްމިންތަކަށް ދިވެހިން ގޮސް، އަނެއް ދިވެހިރާއްޖެއަށް ދިވެހިން ފޯރިއެވެ.

ނަމަވެސް މުޖުތަމައުގެ އާންމުންގެ ފަރުދުންގެ މެދުގައި ސިޔާސީ ހަރަކާތްތަކާއި އެކު، މިނިވަންކަން ލިބުނަސް، އިޖްތިމާއީ ގޮތުން ދިވެހި މުޖުތަމައު ކިލަނބުވަމުންދިޔަކަމުގެ ވިސްނުން ދިޔައީ އަންނަމުންނެވެ. ސިޔާސީ ބައިބައިވުންތަކާއި، ހަމަނުޖެހުން އިތުރުވެ، ދިވެހިންގެ އަސްލު ދިވެހި ވަންތަކަން ގެއްލެމުން ދިޔަ މަންޒަރު ހިނގަމުންދިޔައީ އެންމެންގެ ލޮލުގެ ކުރިމަތީގައެވެ. މަދު ބަޔަކު ނަމަވެސް މިކަމާއި މެދު ފިކުރުކޮށް، ކަންބޮޑުވަމުން ދިޔަ އިރު، އަނެއްބަޔަކު ތިބީ ވަމުންދާ ކަން ނޭނގި ޣާފިލްކަންމަތީގައެވެ.

ދިވެހިރާއްޖޭގެ އާ ގާނޫނު އަސާސީގެ ދަށުން އެންމެ ހަމަނުޖެހުން ބޮޑު އެއް އަހަރަކަށް ވާނީ މި ހިނގާ ދެހާސް އަށާރައެވެ. ކޯޓުތަކުން އެތަކެއް ބައިވަރު ހުކުމްތައް ނެރެ، ސިޔާސީ ކުޅިވަރުގެ އަތްބައި ރަނގަޅަށް އަތުރާލި އަހަރަކަށެވެ. ސިޔާސީ ހަމަނުޖެހުމާއި ހާސްކަމެއްގެ ތެރޭގައި ގައުމު އޮއްވާ، ރިޔާސީ އިންތިހާބެއް ބާއްވައި، އެ ރިޔާސީ އިންތިހާބުން ދިވެހިން ނިންމީ ގައުމުގެ މިސްރާބު ޖަޒީރާވަންތަކަމާއި ދިމާލަށް އަނބުރާލުމަށެވެ.

އިއްޔެ ވެގެންދިޔައީ ޖަޒީރާ ރާއްޖެއަށް އައި ބޮޑު އީދަކަށެވެ. ތިން އަހަރެއްހާ ދުވަހު ރާއްޖެއިން ބޭރުގައި އަރުވާލެވިގެން ހުންނެވުމަށްފަހު ކުރީގެ ރައީސް މުހައްމަދު ނަޝީދު، މާލެ ވަޑައިގެންނެވި ދުވަހަށެވެ. އެއްބަޔަކު އުފަލުން ރޮވުނު އިރު، އަނެއްބަޔަކަށް އެއީ ކަރުނައިގެ ކޯރެއްގައި ފަތަން ޖެހުނު ދުވަހެކެވެ.

ކޮންމެ ގޮތަކަށްވިޔަސް އިއްޔެ، މާލޭގެ މަގުމައްޗަށް އެއްވި އެތައް ހާސް ބަޔަކު ދިޔައީ އެމަނިކުފާނަށް މަރުހަބާ ކިޔައި، މަލާއި ކަރުދާސް ކޮންފެޓީ ފަދަ ތަކެތި އުކަމުންނެވެ. މުޅި މާލޭގެ މަޖީދީމަގުގެ މަތިންނާއި، ތިރިންނާއި އަޑިންވެސް އޮތީ ހަމަ ހުސް ރީނދުލެވެ.

އިއްޔެގެ ފޯރިގަދަ ހަރަކާތްތައް ނިންމާާލި ވަގުތު މަޖީދީމަގުގެ ބޮޑު ސަރަހައްދަކަށް ތިބީ ކަރުދާހާއި ފުޅިިޔާއި އޭތި މީތި އަަޅާފައެވެ. ވީހާލެއްގައި އެތަކެތިވެސް ވާންށެވެ. ނަމަވެސް އިއްޔެ ހަވީރު ސޯޝަލް މީޑިޔާއިން ފެނިގެން ދިޔައީ އާދަޔާ ޚިލާފު މަންޒަރެކެވެ. ރައީސް ނަޝީދަށް މަރުހަބާ ކިޔުމަށް ބޭނުންކުރި ކަރުދާސް ކޮންފެޓީތަކާައި އެއްވެ ތިބި މީހުން ބުއި ފެންފުޅިތައް މަގުތަކުން ނަގައި ސާފުކުރިތަނެވެ.

އިއްޔެ، މަޝްހޫރު ފިލްމް ޑައިރެކްޓަރ ޓެޑްރީ ކުރި ޓްވީޓެއްގައި އޭނާާގެ ގެއިން ކަރުދާސް ކޮންފެޓީ ދޫކުރުމުން، އެގޭގެ ކުދިންވެގެން ހަމަ އެ ކޮންފެޓީތައް ސާފުކުރިތަން ފެނުނެވެ. މި މަންޒަރާއި މިފަދަ އެތައް މަންޒަރަކަށް ގިނަ ބަޔަކު ތައުރީފު ކުރިއިރު، މިއީ ފަަހަކަށް އައިސް މަދުން ނޫނީ ފެންނަކަމެއް ނޫނެވެ.

މިހެން ދަންނަވާލަން މި ޖެހުނީ ކުރިން ލޮލުކޮޅަށް ފެނިފައިވާާ މަންޒަރުތަކުންނެވެ. މީގެ ކުރިން ސިޔާސީ ހަރަކާތްތަކާއި މުޒާހަރާތައް ހިންގުމަށްފަހު، މަދުން މެނުވީ މަގުމަތި ސާފުކޮށްލާތަނެއް ނުފެނެއެވެ. އެއްބުރުން ފުޅިތައް މަގުތަކަށް އުކާާލުމަށްފަހު، އަމިއްލަ ކަންކަމާއިގެން އެނބުރި ދާ ހިނދު، ގިނަ ފަރާތްތަކުން އޭގެ ސަބަބުން ވެށީގެ ރީތިކަމަށް ކުރާ އަސަރާއި މެދު ވިސްނާާ ނުލާކަން ފާހަގަކޮށްލެވެއެވެ.

މިއީ ޒިންމާދާރު ސިޔާސީ ހަރަކާތެއްގެ ކުލަވަރުކަމަށް ގިނަ ފަރާތްތަކުން ބުނެއެވެ. ސިޔާސީ ހަރަކާތްތައްވެސް އެންމެ ފަހުން ތަހުޒީބާއި، ދިވެހިންގެ ދިވެހިވަންތަކަމާއި ދިމާލަށް މިސްރާބު ޖަހަންފެށީ ކަމަށް ބުނެވިދާނެއެވެ. އެމްޑީޕީ އަދި ރައީސް ނަޝީދަށް ތާާއިދުކުރައްވާ ފަރާތްތަކުން އިއްޔެ ދެއްކި މިސާލު ކިތަންމެހާާވެސް ނަލައެވެ. ލައްކަ ޖަޒީރާ ވަންތައެވެ. އެ މިސާލު، އަބަދުމެ ދެމި ހުންނާނެކަމަށް އުއްމީދު ކުރަމާ ހެއްޔެވެ؟