ރޮނާލްޑޯގެ ދިފާއުގައި އޮޒިލް ނުކުމެއްޖެ

ޕޯޗުގަލްގެ ހުނަރުވެރި ކުޅުންތެރިޔާ ކްރިސްޓިއާނޯ ރޮނާލްޑޯ، އާއި ގުޅިގެން މީޑިއާތަކުން ފަތުރަމުންދާ ޚަބަރުތަކާއި ގުޅިގެން އޭނާގެ ދިފާއުގައި، ޖަރުމަނުގެ ގައުމީ ޓީމަށް ކުރިން ކުޅެފައިވާ ތަޖުރިބާކާރު މިޑްފީލްޑަރު މެސުޓް އޮޒިލް ނުކުމެއްޖެއެވެ.

މިހާރު ކުރިއަށްދާ ފީފާ ވޯލްޑް ކަޕްގެ ދެވަނަ ބުރުގައި، 1-6 އިން ސްވިޒަލެންޑް ބަލިކޮށް ޕޯޗުގަލް ކުއާޓާ ފައިނަލުން ޖާގަ ހޯދި މެޗުގައި ރޮނާލްޑޯ ބެންޗުގައި، ބެއިންދުމާއި ގުޅިގެންނާއި، އަދި އޭނާ އާއި ކޯޗާއި ދެމެދު އުފެދުނު މައްސަލަ އަކާއި ގުޅިގެން ވޯލްޑްކަޕު ދޫކޮށް ދިއުމަށް އޭނާ މަސައްކަތް ކުރި ކަމަށް ބޭރުގެ މީޑިއާ ތަކުން ވަނީ ޚަބަރު ފަތުރާފައެވެ.

އަދި އޭގެ އިތުރުން ރޮނާލްޑޯ އަށް އޭނާ ކުރިން ދައްކަމުން ދިޔަ ހުނަރުވެރި ކުޅުން މިހާރު ނުދެއްކޭ ކަމަށާ، އެނާގެ ބަދަލުގައި ޒުވާން ކުޅުންތެރިންނަށް ޖާގަދޭންޖެހޭ ކަމަށްވެސް ބައެއް ފަރާތްތަކުން އަންނަނީ ބުނަމުންނެވެ.

މިކަމާއި ގުޅިގެން މީގެ ކުރިން ރޮނަލްޑޯ އާއި އެކު ރެއާލް މެޑްރިޑް ގައިވެސް ކުޅެފައިވާ އޮޒިލް ކޮށްފައި ޓުވީޓެއްގައި ވަނީ، ނޫސްވެރިން ރޮނާލްޑޯ އާއިމެދު އަބަދު ނައްސި ވާހަކަތައް ހޯދާ ތަނެއް އޭނާއަށް ނޭނގޭކަމަށް ބުނެފައެވެ. އަދި މީޑިއާއިން އެފަދައިން ކަންކުރަމުން އެދަނީ ސަމާލުކަން ހޯދަން ކަމަށާ، ތަޖުރިބާ ކާރުންގެ ނަމުގައި، ކުރާނެ ކަމެއް ނެތިފައި ތިބޭ މީހުން އެފަދަ ޚަބަރުތައް ފަތުރަނީ ރޮނާލްޑޯ ގެ ނަން ބޭނުންކޮށްގެން، މީހުންގެ ސަމާލުކަން ހޯދައި، ރޮނަލްޑޯ އަކީ ނުބައި މީހެއް ކަމަށް ދައްކަން ކަމަށްވެސް އޮޒިލް ބުނެފައިވެއެވެ.

"އޭނާ އަކީ މިހާރު 38 އަހަރުގެ މީހެއް. އެހެންވީމާ ކޮންމެ ސީޒަނެއްގައި 50 ގޯލު އޭނާ މިހާރު ނުޖަހާތީ އެކަމުގައި ހައިރާންވާންޖެހޭ ކަމަކީ ކޮބާ؟ ފުޓުބޯޅަ އަށް ލޯބި ކުރާ އެންމެންވެސް، 20 އަހަރު ވަންދެން ރޮނާލްޑޯ އެ ދައްކަމުންދާ ހުނަރުވެރި 'ވޯލްޑް ކްލާސް' ކުޅުން ފެންނަ ކަމަށްޓަކައި އުފާކުރަންޖެހޭ."

މިއާއެކު އޮޒިލްވަނީ، އަރަމުންމިދާ ޖީލުގެ އެކެއް ވެސް ރޮނާލްޑޯ އާއި އެއްވަރަށް ކާމިޔާބީ ހޯދާނެ ކަމަށް އޭނާ އަށް ހީނުވާ ކަމަށާ، އެއީ ކުޅިވަރުގެ ތާރީޚު ދުށް އެންމެ ހުނަރުވެރި އެއް ކުޅުންތެރިޔާ ކަމަށް ބުނެފައެވެ. އަދި އެކަމަށްޓަކައި އެންމެންވެސް އޭނާއަށް އިހްތިރާމް ކުރަންޖެހޭނެ ކަމަށްވެސް އޮޒިލް ބުނެފައިވެއެވެ.