މޭރީގެ މަރުގެ މައްސަލަ: ލަމްހާ ދޫކޮށްލި މައްސަލަ އަށް ވަކީލަކު ހޯދަން އެއް ދުވަސް

އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް ގެ މައްސަލައިގައި ޝާމިލް ވާ ދިވެހި ނަރުސް ހަލީމަތު ލަމްހާ ތިން މަސް ދުވަހަށް ގެއަށް ދޫކޮށްލި މައްސަލައިގައި ވަކީލަކު ހޯދުމަށް އޭނާ އަށް އެއްދުވަސް ދީފިއެވެ.

މޭރީގެ މަރުގެ މައްސަލައިގައި ޝާމިލްވާ ލަމްހާ ތިން މަސް ދުވަހަށް ގެއަށް ދޫކޮށްލަން ކްރިމިނަލް ކޯޓުން ޙުކުމް ކުރީ އޭނަގެ ބަލިހާލަތު ހުރި ގޮތުންނެވެ. އެއީ މިދިޔަ މަހުގެ 23 ވަނަ ދުވަހުއެވެ.

އެއާއި އެކް ޕީޖީ އޮފީހުން މިވަނީ އެމައްސަލަ ހައިކޯޓުގައި އިސްތިއުނާފް ކޮށްފައެވެ.

އެ މައްސަލައިގެ ޝަރީއަތް މިއަދު ފަށާފައިވާއިރު، ހައިކޯޓުގައި މިއަދު ބޭއްވި އަޑުއެހުމުގައި ލަމްހާ ވަނީ ވަކީލަކު ހަމަޖެއްސުމަށް 3 ދުވަހުގެ މުއްދަތެއް ދިނުމަށް އެދިފައެވެ. ނަމަވެސް ހައިކޯޓުން ނިންމާފައިވަނީ ވަކީލަކު ހަމަޖެއްސުމަށް 1 ދުވަސް އޭނާއަށް ދިނުމަށެވެ.

މޭރީ މަރުގެ މައްސަލައިގައި ބަންދުގައި ހުރި ލަމްހާ ގޭބަންދަށް ބަދަލު ކުރުމަށް ކްރިމިނަލް ކޯޓުން އަމުރު ނެރެފައިވަނީ ޝަރުތުތަކެއް ކޮށްފައެވެ.

އެގޮތުން ކޮންމެ ދުވަހެއްގެ ރޭގަނޑު 10:00 އިން ހެނދުނު 6:00 އަށް ގެއިން ބޭރަށް ނުނުކުތުމަށާއި މާލޭން ބޭރަށްދާނަމަ ކޯޓުގެ ހުއްދަ ހޯދުމަށް ޝަރުތުކޮށްފައިވެއެވެ.

ނަރުސް މޭރީ ގްރޭސްގެ މަރުގެ މައްސަލައިގައި މޭރީ މަރާލިކަމުގެ ދައުވާ އުފުލައިފައިވަނީ މޭރީ އެކޭ އެއްފަދައިން އައިޖީއެމް ހޮސްޕިޓަލްގައި ނަރުހެއްގެ ގޮތުގައި މަސައްކަތް ކުރި އޭނާގެ ފިރިމީހާ މާވިން އެސްވައި ވާގަސްގެ މައްޗަށެވެ. އަދި އެކަމުގައި ބައިވެރިވި ކަމުގެ ދައުވާ އުފުލާފައިވަނީ ލަމްހާގެ މައްޗަށެވެ. ލަމްހާ އަކީވެސް އެހޮސްޕިޓަލްގައި ނަރުހެއްގެ ގޮތުގައި މަސައްކަތް ކުރި މީހެކެވެ.

2021 ވަނަ އަހަރުގެ އޮކްޓޫބަރު 19 ވަނަ ދުވަހު މޭރީ އަމިއްލައަށް ދަން ޖެހިގެން މަރުވި ކަމަށް ބުނެ މާވިން ފުލުހުންނަށް ރިޕޯޓް ކުރި ނަމަވެސް، އެކަމުގައި ޝައްކު ކުރެވޭ ކަންތައް ތަކެއް ހުރުމުން ފުލުހުން ވަނީ އެކަން އިތުރަށް ތަހްޤީޤު ކޮށްފައެވެ.

އެގޮތުން މޭރީގެ ހަށިގަނޑުގެ އެޓޮޕްސީ ހެދުމުން މޭރީ މަރާލައިފައިވަނީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަން ވަނީ އެނގިފައެވެ.

މޭރީގެ މަރުގެ މައްސަލައިގައި ބަންދުގައި ހުރި ލަމްހާގެ ވަކީލުންގެ ފަރާތުން ލަމްހާގެ ފައިގައި ޓެގް އެޅުވުމަސްފަހު ދޫކޮށްލުމަށް ވަނީ ކޯޓުގައި އެދިފައެވެ. ނަމަވެސް އޭރު ކޯޓުން ނިންމައިފައިވަނި ނިންމާފައިވަނީ ލަމްހާ ބަންދު ދެމެހެއްޓުމަށެވެ.

މޭރީގެ މަރުގެ މައްސަލައިގައި ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.