ވީއައިއޭގެ އައު މެނޭޖްމަންޓުން ދިން ލުޔާއެކު ދެން ޑޮމެސްޓިކް ޓާމިނަލްގެ ދޮރާ ހަމައަށް ޓެކްސީގައި ދެވޭނެ!
ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ދާ ޓެކްސީތަކާއި ކާރުތަކަށް ޑޮމެސްޓިކް ޓާމިނަލާ ހަމައަށް މަޑުކުރެވޭ ގޮތް ހަދައިފިއެވެ.
މީގެ ކުރިން މާލެއާއި ހުޅުމާލެއިން އެއާޕޯޓަށް ދާ ޓެކްސީ މަޑުކުރަނީ އިންޓަނޭޝަނަލް ޓާމިނަލް ކައިރިއަށެވެ. އެހިސާބުން، ލަގޭޖް ތަކާއި ހުރިހާ ތަކެއްޗެއް ހިފައިގެން ޑޮމެސްޓިކް ޓާމިނަލާ ހަމައަށް ދާން ޖެހެނީ ހިނގާފައެވެ.
އޭގެ ސަބަބުން އެއާޕޯޓް ގެ ބޭނުން ކުރާ ފަރާތްތަކަށް ބޮޑެތި ދަތިތަކާއި ކުރިމަތިލާންޖެހި އެކަމުގެ ޝަކުވާތައް ކުރެއެވެ. ޚާއްސަކޮށް ވިއްސާރަ ދުވަސްތަކުގައި އޭގެ ސަބަބުން ފަސިންޖަރުންނަށް ބޮޑެތި އުނދަގޫ ތަކާއި ކުރިމަތިލާން ޖެހެއެވެ.
ނަމަވެސް ވީއައިއޭ ހިންގަމުން އަންނަ އެމްއޭސީއެލްގެ އައު މެނޭޖްމަންޓުން ވަނީ ޑޮމެސްޓިކް ޓާމިނަލްގެ އުތުރުކަންމަތިން ކާރުތަކަށް މަޑު ކުރެވޭނެ ޖާގަ ހަދައިފައެވެ. އެގޮތުން މިހާރު އެ ޓާމިނަލަށް ފަހަރަކު ތިން ކާރަށް މަޑުކުރެވޭއިރު، ޓްރެފިކް ބަލަހައްޓަން މީހުންވެސް ތިބެއެވެ.
މިކަން ރޭވިފައިވަނީ ވީއައިޕީ ކާރުކޮޅުތަކަށްވެސް ދަތިނުވާނެ ގޮތަށް ކަމަށް އެމްއޭސީއެލް އިން މައުލޫމާތު ދެއެވެ.
މި ދެވުނު ލުޔާއި ގުޅިގެން ނޫސްވެރިންނަށް މައުލޫމާތު ދެއްވަމުން އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު މުހައްމަދު ވިދާޅުވީ، އެބޭފުޅާއަށް މަގާމު ހަވާލުކުރައްވައި ރައީސް ޑރ. މުހައްމަދު މުއިއްޒު ވަނީ ފަސިންޖަރުންނަށް ދަތިކޮށްހުރި ހުރިހާކަމެއް މިވަގުތުން ވަގުތަށް ހައްލު ކޮށްދެއްވުމަށް އެދިވަޑައިގެފައިކަމަށެވެ.
އަދި ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އެއާޕޯޓަށް ހިދުމަތް ހޯދުމަށް އަަންނަ ފަރާތްތަކަށް ފަސޭހަ ގޮތްތަކެއް ހަމަޖެއްސުމަށް ކުންފުނިން މަސައްކަތްތައް ކުރައްވަމުންދާނެ ކަމަށްވެސް ޝަރީފް ވިދާޅުވި އެވެ.
"މިއީ ވީއައިއޭއިން ހިދުމަތް ހޯދާ ވަރަށް މުހިންމު ބައެއް ކަމަށްވާ ޑޮމެސްޓިކް ޑިޕާޗާ ފަސިންޖަރުންނަށް ލުއި ފަސޭހަ ހޯދައިދޭން ގެންނަ ބަދަލެއް ފެށުން. މި މަސައްކަތް ކުރަނީ އެމްއޭސީއެލްގައި ހުރި ދަތިިތަކާއެކު ހުރިހާ ޑިޕާޓްމަންޓުތަކާއި އޭވިއޭޝަން ޕޮލިސްގެ އެއްބާރުލުމާއެކު،"
އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު މުހައްމަދު
ޝަރީފް އިތުރަށް ވިދާޅުވީ، މުސްތަގުބަލުގައި ވީއައިއޭއަށް ފުރަން އަންނަ މީހުންގެ އިތުރުން ވީއައިއޭއަށް އަންނަ ފަސިންޖަރުންނަށްވެސް މި ސަރަހައްދުން ކާރު ނެގޭނެ ގޮތް ހަމަޖެހިގެންދާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
