ރަޝިޔާއިން ޔޫކުރެއިންގެ ވެރިރަށް ކީވްއަށް ޑުރޯން ހަމަލާތަކެއްދީފި

ރަޝިޔާއިން ޔޫކުރެއިންގެ ވެރިރަށް ކަމަށްވާ ކީވްއަށް އަނެއްކާ ވެސް ވަރުގަދަ ޑްރޯން ހަމަލާތަކެއް ދީފިއެވެ.

މިކަމާއި ގުޅިގެން ކީވްގެ މިލިޓަރީ އެޑްމިނިސްޓުރޭޝަންގެ އިސްފަރާތެއް ކަމަށްވާ ޓިމޫރް ޓްކަޗެންކޯ ބުނެފައިވަނީ ރަޝިޔާގެ އަސްކަރިއްޔާއިން ހުއްޓުމެއްނެތި ޔޫކްރެއިންނަށް ދެމުންދާ ހަމަލާތަކުގެ ސަބަބުން އެތަކެއް އިމާރާތްތަކެއް ސުންނާފަތި ވެ، އަލިފާނުގެ އެތަކެއް ހާދިސާތަކެއް ހިނގަމުން އަންނަ ކަމަށެވެ.

މީގެއިތުރުން ޔޫކްރެއިންގެ އޮޑެސާގެ ގަވަރުނަރު އޮލެހް ކިޕަރ ބުނެފައިވާ ގޮތުގައި ރަޝިޔާއިން އޮޑެސާގެ ސަރަހައްދަކަށް ދިން ޑްރޯން ހަމަލާތަކުގައި ކުއްލި ހާލަތުގައި ސިއްޙީ ފަރުވާދޭ ތަނަކާއި މެޓަރނިޓީ ވަރޑެއްގެ އިތުރުން މީހުން ދިރިއުޅެމުން އަންނަ އެޕާޓްމެންޓް ތަކެއް ބިމާއި ހަމަވެފައިވާކަމަށެވެ. މީގެ އިތުރުން 59 އަހަރުގެ ފިރިހެނަކު މިހަމަލާގައި މަރުވެފައިވާ ކަމަށާއި މީގެ އިތުރުން 4 މީހަކު ޒަހަމްވެފައިވާކަމަށް އޭނާ ބުނެފައިވެއެވެ.

މިދިޔަ ހޯމަ ދުވަހު ރަޝިޔާގެ އެއާ ޑިފެންސް ސިސްޓަމްތަކުންވަނީ ޔޫކްރެއިންގެ 76 ޑްރޯން އެންމެ ދެ ގަޑިއިރު ތެރޭގައި ވައްޓާލާފާކަަމަށް ރަޝިޔާގެ މީޑިޔާތަކުގައި ވަނީ ރިޕޯޓްކޮށްފައެވެ. މިއީ ރަޝިޔާގެ އަސްކަރިއްޔާއަށް ލިބުނު ކާމިޔާބީއެއްކަމަށާއި ކުރިޔަށް އޮތްތަނުގައި ޔޫކްރެއިންގެ ބިންތަކަށް މިހާރަށްވުރެ ބޮޑަށް ވެރިވެ ގަންނާނެކަމަށް ރަޝިޔާއިން ދަނީ ބުނަމުންނެވެ.

ރަޝިޔާއިން މިހެން ބުނެފައި މިވަނީ ޔޫކްރެއިންގެ ދްނީޕްރޯޕެތުރޯވްސްކް ސަރަހައްދަށް އަތްގަދަ ކުރުމުގެގޮތުން ރަޝިއާއިން ވަރުގަދަ އަސްކަރީ އޮޕަރޭޝަނެއް ފަށާފައިވާ ދަނޑިވަޅެއްގައިކަން ފާހަގަކޮށްލަން ޖެހެއެވެ.

ރަޝިޔާއާއި ޔޫކުރެއިން އިން ހަނގުރާމަ ހުއްޓާލުމުގެ އެއްބަސްވުންތަކާއި ހަމައަށް އާދެވިފައިވީ ނަމަވެސް އެމަޝްވަރާތަށް ވަނީ ވަގުތީ ގޮތުން މެދުކެނޑިފައިކަން ފާހަގަކޮށްލަން ޖެހެއެވެ.