މިއަދާއި މާދަމާވެސް ޕާސްޕޯޓުގެ ޚިދުމަތް ލިބޭނެ: އިމިގްރޭޝަން

ޖުމްހޫރީ ދުވަހާ ގުޅިގެން ސަރުކާރު ބަންދު ނަމަވެސް، މިއަދާއި މާދަމާވެސް މާލެ، ހުޅުމާލެ އަދި އައްޑޫގައި ހުންނަ އިމިގްރޭޝަން އޮފީސްތަކުން ޕާސްޕޯޓުގެ ޚިދުމަތް ލިބޭނެ ކަމަށް މޯލްޑިވްސް އިމިގްރޭޝަނުން ބުނެފިއެވެ.

އެ އިދާރާއިން ބުނި ގޮތުގައި، އިމުގާ ޕޯޓަލް މެދުވެރިކޮށް 24 ގަޑިއިރު ޕާސްޕޯޓަށް އެދި އޮންލައިންކޮށް ހުށަހެޅޭނެއެވެ. މާލޭ އިމިގްރޭޝަން އޮފީހުން ޕާސްޕޯޓާ ހަވާލުވާން ނަންބަރު ދޫކުރާ ގަޑިއަކީ ހެނދުނު 9:00 އިން މެންދުރުފަހު 16:00 އަށެވެ.

ހުޅުމާލެ ފޭސް 1 އަދި ފޭސް 2 ގެ އޮފީސްތަކުން ނަންބަރު ދޫކުރާނީ ހެނދުނު 08:30 އިން މެންދުރުފަހު 16:00 އަށެވެ. އައްޑޫ އޮފީހުން ނަންބަރު ދޫކުރާ ވަގުތަކީ ހެނދުނު 08:30 އިން ހަވީރު 17:00 އަށެވެ.

ސިއްޙީ ކުއްލި ފަރުވާ ފަދަ މެޑިކަލް އެމަޖެންސީ ޙާލަތެއް ދިމާވެއްޖެ ނަމަ 9555333 އަށް ގުޅައިގެން ޚިދުމަތް ހޯދެވޭނެ ކަމަށް ވެސް އިމިގްރޭޝަނުން ބުނެފައިވެއެވެ.