ރިއަލް އެސްޓޭޓް މަޝްރޫޢުތައް އަމާޒުކުރަންވާނީ ބޭރު މީހުން ދިގު މުއްދަތަށް ވަޒަންވެރިވުމުގެ ބަދަލުގައި "ހޮލިޑޭ ހޯމްސް" އަށް: އަދާލަތު ޕާޓީ
ދިވެހިރާއްޖޭގައި ބޭރުގެ ފަރާތްތައް ދިގު މުއްދަތަކަށް ދިރިއުޅޭ ވަކި ޚާއްޞަ ސަރަޙައްދުތަކެއް އުފެއްދުމުގެ ބަދަލުގައި، އިންޓަރނޭޝަނަލް ރިއަލް އެސްޓޭޓް މަޝްރޫޢުތައް އަމާޒުކުރަންވާނީ ޗުއްޓީ ހޭދަކުރުމަށް ބޭނުންކުރާ "ހޮލިޑޭ ހޯމްސް" ފަދަ ވަސީލަތްތައް ތަރައްޤީކުރުމަށް ކަމަށް ޢަދާލަތު ޕާޓީން ބުނެފިއެވެ.
ޢަދާލަތު ޕާޓީން މިހެން ބުނެފައިވަނީ ރަސްމާލެ ތަރައްޤީ ކުރަން އީގަލް ހިލްސްއަށް ދިނުމުން އެކަމާ ގުޅިގެން އެ ޕާޓީން ނެރުނު ޤަރާރެއްގައެވެ.
އަދާލަތު ޕާޓީގެ ގަރާރުގައި ބުނެފައިވާ ގޮތުގައި، ބޭރުގެ ފަރާތްތަކަށް ދިގު މުއްދަތަކަށް ރާއްޖޭގައި ދިރިއުޅެވޭނެ ވަކި ޚާއްޞަ ސަރަޙައްދުތަކެއް އުފެދިގެންދާ ގޮތަށް މިފަދަ މަޝްރޫޢުތައް ކުރިއަށްގެންދިއުމަކީ ރާއްޖޭގެ ދީނީ އެއްބައިވަންތަކަމަށާއި، ޢާއްމު މަސްލަޙަތުގެ އިތުރުން ދިވެހި ޘަޤާފަތާއި ޤައުމީ ސަލާމަތާއި ރައްކާތެރިކަމަށް ނުރައްކާވެ، ބޮޑެތި ގޮންޖެހުންތަކެއް ކުރިމަތިވެދާނެ ކަމެކެވެ.
އެހެންކަމުން، މިފަދަ ގޮތަކަށް އެއްވެސް މަޝްރޫޢެއް ކުރިއަށް ނުގެންދެވުމަށް އެ ޕާޓީން ވަނީ ސަރުކާރަށް އިލްތިމާސްކޮށްފައެވެ.
އިންޓަރނޭޝަނަލް ރިއަލް އެސްޓޭޓް މަޝްރޫޢުތައް ކުރިއަށް ގެންދިއުމުގައި، އެ މަޝްރޫޢުތައް އަމާޒުކުރަންވާނީ، ބޭރުގެ ފަރާތްތައް ދިގު މުއްދަތަކަށް ދިރިއުޅޭ ވަކި ސަރަޙައްދުތަކެއް އުފެއްދުމުގެ ބަދަލުގައި، އެފަދަ ފަރާތްތަކުން ޗުއްޓީ ހޭދަކުރުމަށް ބޭނުންކުރާ ހޮލިޑޭ ހޯމްސްފަދަ ވަސީލަތްތައް ތަރައްޤީކުރުމަށް ކަމުގައި މި ޕާޓީއިން ޤަބޫލުކުރަމެވެ.
ހަމައެއާއެކު، އިސްލާމީ ރިވެތި އުސޫލުތަކާ އެއްގޮތްވާ ގޮތުގެ މަތިން އިންޓަރނޭޝަނަލް ރިއަލް އެސްޓޭޓް ނުވަތަ ހޮލިޑޭ ހޯމްސްގެ ޚިދުމަތްތައް ރާއްޖޭގައި ފުޅާކުރުމަކީ ރާއްޖޭގެ އިޤްތިޞާދު ސިންދަފާތުކޮށް، އިޤްތިޞާދީ ވިލުންތެރިކަން އިތުރުކުރުމަށް މަގުފަހިވެގެންދާނެ ކަމެއް ކަމަށްވެސް އެ ޕާޓީގެ ޤަރާރުގައި ބަޔާންކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
