ބަޖެޓުން ފުށިދިއްގަރު ފަޅު އުނި ކުރީ ގައުމީ ވިސްނުމެއްގައެއް ނޫން: އަހްމަދު ހަލީމް
ފުށި ދިއްގަރު ފަޅު ތަރައްގީކުރުމުގެ މަޝްރޫއަށް އަންނަ އަހަރަށް ލަފާ ކުރާ ދައުލަތުގެ ބަޖެޓްގައި ހިމެނި 400 މިލިއަން ރުފިޔާ ކޮމިޓީއިން އުނިކޮށް ބަޖެޓް ފާސްކުރަން ތަޅުމަށް ފޮނުވީ އިހުލާސްތެރި ވިސްނުމެއްގައި ނޫން ކަމަށް ރައްޔިތުގެ މަޖިލިހުގެ ބިލެތްދޫ ދާއިރާގެ މެންބަރު އަހުމަދު ހަލީމް (ދޮންބިލަތް ހަލީމް) މިއަދު ވިދާޅުވެއްޖެއެވެ.
މިއަދު މަޖިލީހުގައި ފެށި ބަޖެޓް ބަހުސްގައި ވާހަކަ ދައްކަވަމުން މެންބަރު އަހުމަދު ހަލީމް ވަނީ ފުށިދިއްގަރު މަޝްރޫއު ބަޖެޓުން އުނިކުރީ ރައްޔިތުން މަޖިލީހުގެ ނައިބު ރައީސް ކަމަށް އެމްޑީޕީގެ ލީޑަޝިޕުން ބޭނުންވާ ބަޔަކު ގެނައުމަށް މެންބަރުންތަކެއްގެ ވޯޓް ހޯދުމުގެ ބޭނުމުގައި ވިދާޅުވެ، ފުށިދިއްގަރު މަޝްރޫއު އުނިކޮށް އެ ފައިސާ ދާއިރާތަކުގެ ތަރައްގީއަށް ބަހާލާފައި ހުރީ ބޭއިންސާފުން ކަމުގައި ތުހުމަތު ކުރައްވައިފައެވެ.
އަލަށް ފަށާ 23 ޕްރޮޖެކްޓަކަށް އެބަ އޮތް މަތިވެރި ދާއިރާއަށް 18 މިލިއަން ޖަހާފައި. މިއީ ކޮން އުސޫލަކުން ކިހިނެތްކޮށްފައި އޮތް ކަމެއްތޯ؟ މި އޮތީ ވޯޓާ ގުޅިފައި. ނައިބު ރައީސްގެ ވޯޓާ ގުޅިފައި
އަހްމަދު ހަލީމް
މީގެ އިތުރުންވެސް ކޮމިޓީން ބަޖެޓް އިސްލާހުކުރި އިރު ބައެއް ރަށްރަށުގައި ބޮޑެތި މަޝްރޫއުތައް ނިމުމަކާ ކައިރިވެފައި ވަނިކޮށް އެ މަޝްރޫއުތައް ނިންމަން ބަޖެޓުގައި ފައިސާ ނުހިމަނާ އެހެން ބައެއް ރަށްރަށަށް މުޅިން އާ މަޝްރޫއުތަކަށް ފައިސާ ހިމަނާފައިވާ ކަމުގައި އަހްމަދު ހަލީމް ވިދާޅުވިއެވެ. އެގޮތުން ބަޖެޓުން ފުށިދިއްގަރު އުނިކޮށް ބައެއް މެންބަރުންގެ ދާއިރާތަކަށް 7 މިލިއަން ރުފިޔާ ކަނޑައެޅި ކަމަށްވެސް މިއަދު މަޖިލހުގައި ދެއްކެވި ވާހަކަ ފުޅުގައި އަހްމަދު ހަލީމް ވަނީ ތުހުމަތު ކުރައްވައިފައެވެ.
"މަގޫދޫގައި އެއާޕޯޓެްގެ %70 އަޅާފައި އޮއްވާ އެކަން ނުނިންމާ އަނެއްކާ 5 މިނެޓުން ދެވޭ އަނެއް ރަށުގައި 40 މިލިއަން ރުފިޔާ އެއާޕޯޓަށް މި އޮތީ ހިމަނާފައި... އެހެންވީމަ މިހިރަ ކަންކަން ހުރީމާ ފުށި ދިއްގަރުގެ [އުނިކުރުމަކީ] ވެސް އިހްލާސްތެރިކަމާއި އެކީ ކުރިކަމެއްގެ ގޮތުގައި އަޅުގަނޑަކަށް ނުފެނޭ. މިއީ ގައުމީ ވިސްނުމެއްގައި ކުރި ކަމެއް ނޫން،"
އަހުމަދު ހަލީމް (ދޮންބިލަތް ހަލީމް)
މިދިޔަ ބުރާސްފަތި ދުވަހުގެ ރޭ އެމްޑީޕީގެ މެޖޯރިޓީ އޮންނަ ބަޖެޓް ކޮމިޓީން ބަޖެޓް ފާސްކުރިއިރު މި ސަރުކާރުން ހިންގަން ރާވާފައިވާ އެންމެ ބޮޑު ބޯހިޔާވަހިކަމުގެ މަޝްރޫއުކަމަށްވާ ފުށިދިއްގަރު ފަޅު މަޝްރޫއު ބަޖެޓުން އުނިކުރީ އެ ފައިސާ އެހެން މަޝްރޫއުތަކަށް ކަނޑައެޅުމަށެވެ. އެގޮތުން އެ ބަޖެޓުގައި 200 މިލިއަން ރުފިޔާ ކަނޑައެޅީ އެމްޑީޕީ ސަރުކާރުން ގޯތިދީފައިވާ ހުޅުމާލެ، ގުޅިފަޅު އަދި ގިރާވަރު ފަޅުގެ ހިއްކާ ނިންމާ އަސާސީ ހިދުމަތްތައް ގާއިމްކުރުމަށެވެ. އަދި އަނެއް 200 މިލިއަން ކަނޑައެޅީ މެންބަރުންގެ ދާއިރާތަކަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
