ރ އަތޮޅު ކައުންސިލްގެ ރައީސް ޕީޕީއެމް އިން ވަކިވެވަޑައިގެންފި

ރ އަތޮޅު ކައުންސިލްގެ ރައީސް ހުސައިން ނާސިފް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ވަކިވެވަޑައިގެންފިއެވެ.

ނާސިފް ވަނީ ޕީޕީއެމް އިން ވަކިވެވަޑައިގެންނެވިކަން އަންގަވައި ޕީޕީއެމަށް ސިޓީއެއް ފޮނުއްވާފައެވެ.

ނާސިފް ފޮނުއްވި ސިޓީގައި ވިދާޅުވީ ރައްޔިތުން އިންތިހާބުކޮށްފައިވާ މަގާމެއްގައި ހުންނަވައިގެން ނޭއްދާރު ސިޔާސަތުތަކަށް އަމިއްލަފުޅު ނަފްސު ނިސްބަތްކުރައްވާ ހުންނެވުމަކީ ޤައުމަށް ގައްދާރުވުން ކަމަށް ގަބޫލުކުރައްވާ ކަމަށެވެ. އެހެންކަމުން ސިޔާސީ ހަޔާތް އެއްކޮށް އެ ޕާޓީއެއްގައި ހޭދަކުރައްވާ، އިހްލާސްތެރިކަމާއެކު އެތައް މަސައްކަތެއް ކޮށްދެއްވި ޕީޕީއެމްގެ ސެނެޓުގެ މެންބަރުކަމާއި ޕާޓީގެ މެންބަރުކަމުން އިސްދިއުފާ ދެއްވާ ކަމަށެވެ.

މީގެ އިތުރުން ނާސިފް ވިދާޅުވީ ޕީޕީއެމް މިހާރު ހިންގަމުން ދަނީ އަސާސީ ގަވާއިދާއި ހިލާފަށް ކަމަށާއި ޕީޕީއެމް ހިމެނޭ ކޯލިޝަނެއްގެ ވެރިކަމެއް ގެނައީ ރާއްޖެއަށް އިގްތިޞާދީ ކުރިއެރުމާއި ތަމައްދުނުގެ އުޖާލާ ޒަމާނެއް ގެނެސްދެއްވި ވެރިއަކު ހުރަގޭގައި ބާއްވައިގެން ކުރި އަނިޔާވެރި ވެރިކަމެއް ނިމުމަކަށް ގެނައުމުގެ ނިޔަތުގައި ކަމަށެވެ. އެހެންނަމަވެސް މިހާރު ފެނިގެން ދަނީ ތަފާތު ބަހަނާތައް އުފަންކޮށް ދިވެހި ރައްޔިތުން ކުރި އުންމީދުތަކަށް ފުރަގަސް ދެމުން ދާތަންކަމަށް ވެސް ނާސިފްގެ ފޮނުއްވި މި ސިޓީގައިވެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމާއި ހަވާލުވެވަޑައިގެންނެވިތާ ހަފްތާއެއް ވެސް ނުވަނީސް ޕީޕީއެމްގެ އެތެރޭގައި ޖެހުނު މައްސަލަތަކަާއި ގުޅިގެން ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވެސް ވަނީ އެ ޕާޓީއިން ވަކިވެވަޑައިގެން ޕީޕަލްސް ނޭޝަނަލް ފްރޮންޓް (ޕީއެންއެފް) ގެ ނަމުގައި އައު ސިޔާސީ ޕާޓީއެއް އުފައްދަވާފައެވެ.