މެންޗެސްޓާ ސިޓީ އަދި ޔުނައިޓެޑް އެފްއޭ ކަޕްގެ ފަސްވަނަ ބުރުން ޖާގަ ހޯދައިފި

އިނގިރޭސި އެފްއޭކަޕްގެ ފަސްވަނަ ބުރުން އެންމެ ފަހުގެ ޗެންޕިއަން މެންޗެސްޓާ ޔުނައިޓެޑް އަދި ރަނަރަޕް މެންޗެސްޓާ ސިޓީ ޖާގަ ހޯދައިފިއެވެ.

މުބާރާތުގެ ތިންވަނަ ބުރުގައި 2-1 ގެ ނަތީޖާއަކުން އަސެނަލް ބަލިކޮށް ހަތަރުވަނަ ބުރުން ޖާގަހޯދި ޔުނައިޓެޑް ފަސްވަނަ ބުރުން ޖާގަހޯދީ ހުކުރު ދުވަހުގެ ރޭ އަމިއްލަ ދަނޑުގައި 2-1 ގެ ނަތީޖައަކުން ލެސްޓާ ސިޓީ ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ލެސްޓާގެ މިޑްފީލްޑަރު ބޮބީ ޑެ ކޯޑުވާ ރެއިޑް ލަނޑެއް ކާމިޔާބުކޮށް މެޗުގެ ލީޑު ހޯދާފައި ވަނިކޮށް ދެވަނަ ހާފުގައި ޔުނައިޓެޑަށް މެޗުގެ ނަތީޖާ އެއްވަރުކޮށްދިނީ ޒުވާން ފޯވާޑް ޖޯޝުއާ ޒިކްޒީ އެވެ. އަދި މިމެޗުން ޔުނައިޓެޑް މޮޅުވި ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ޑިފެންޑަރު ހެރީ މެގުއާ އެވެ.

މުބާރާތުގެ ހަތަރުވަނަ ބުރުން މެންޗެސްޓާ ސިޓީ ޖާގަހޯދީ ތިންވަނަ ބުރުގައި އިނގިރޭސި ތިންވަނަ ޑިވިޝަންގެ ސަލްފޯޑް 8-0 ގެ ތަފާތުބޮޑު ނަތީޖާއަކުން ބަލިކުރުމަށްފަހު އެވެ. އަދި ހަތަރުވަނަ ބުރުގައި، ދެވަނަ ޑިވިޝަމްގެ ލޭޓަން އޮރިއެންޓާއި ދެކޮޅަށް ރަށުން ބޭރުގައި މެންޗެސްޓާ ސިޓީން މިރޭ ކުޅުނު މެޗުގައި ފުރަތަަމަ ލަނޑުޖަހައި ކުރިހޯދީ ލޭޓަން އިންނެވެ.

މިލަނޑަކީ މެޗުގެ 16 ވަނަ މިނެޓުގައި ލޭޓަންގެ ކުޅުންތެރިއަކު ސިޓީގެ ހާފު މެދެންހާ ހިސާބުހުރެ ގޯލަށް ފޮނުވާލި ހަމަލާއެއް ދިފާއުކުރަން އުޅުމުގެ ތެރޭގައި ސިޓީގެ ކީޕަރު ސްޓެފަން އޯޓޭގާ އަތުން ބައިކޮޅަށް ވަން ލަނޑެކެވެ.

ސިޓީ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 56 ވަނަ މިނެޓުގައި ކާމިޔާބުކޮށްދިނީ ފަހުހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޒުވާން ޑިފެންޑަރު އަބުދުކޯދިރު ޚުސާނޯވް އެވެ. އަދި އެޓީމު މިމެޗުން މޮޅުވި ލަނޑު 79 ވަނަ މިނެޓުގައި ކާމިޔާބުކޮށްދިނީ ތަޖުރިބާކާރު މިޑްފީލްޑަރު ކެވިން ޑެބްރޭނާ އެވެ.