ރޮނާލްޑޯގެ އަސަރުން ފުރިގެންވާ މެސެޖެއް: އަހަރެންގެ އެ ހުވަފެން ވަޅުޖެހިއްޖެ

މިހާރު ޤަތަރުގައި ކުރިއަށްދާ ވޯލްޑްކަޕް ގައި، ކުއާޓާ ފައިނަލުގައި މޮރޮކޯ އާއި ބައްދަލުކުރި މެޗުގައި 1-0 އިން ޕޯޗުގަލް ބަލިވުމާއިއެކު، މި އަހަރުގެ ވޯލްޑްކަޕް ގެ ތަށި ހޯދުމަށް އެ ޓީމުން ދެކެމުންއައި ހުވަފެން ނިމުމަކަށް ވަނީ އައިސްފައެވެ.

އެކަމާއި ގުޅިގެން، އެންމެ ބޮޑަށް ދެރަވެ ހިތާމަކުރި އެއް ކުޅުންތެރިއަކީ އެ ޓީމުގެ ހުނަރުވެރި އަދި ތަޖުރިބާކާރު ކުޅުންތެރިޔާ ކްރިސްޓިއާނޯ ރޮނާލްޑޯ އެވެ. އެކަން ދަނޑުމަތިން ވެސް އެންމެނަށް ފެނިގެން ދިޔައެވެ.

ކުއާޓާ ފައިނަލްގެ އެ މެޗުގެ ފުރަތަަމަ އެގާރައިން ރޮނާލްޑޯ އަށް ޖާގަ ލިބިފައި ނުވާއިރު، ދެވަނަ ހާފުގައި މެޗަށް އަރައިވެސް، މޮރޮކޯ ކޮޅަށް ގޯލެއް ޖަހައި، ޕޯޗުގަލް އަށް ކާމިޔާބީ ހޯދައިދެވޭ ގޮތެއް ރޮނާލްޑޯ އަކަށް ނުވިއެވެ. އެއާއެކު މެޗު ނިމިގެންވެސް ދިޔައީ 1-0 ގެ ނަތީޖާއިން މޮރޮކޯ ކުރީގައި އޮވެއެވެ.

މެޗުން ދަށް ވުމުން، ޕޯޗުގަލް ކުޅުންތެރިން ހިތާމަ ފާޅުކުރި އިރު، އެންމެ ގިނަ މީހުން ރޮއްވާލީ، ރޮނާލްޑޯ ރޮމުންދާ މަންޒަރު ފެނުމުންނެވެ. އުމުރުން ދޮށީ ވުމުގެ ސަބަބުން މިފަހަރު ގެ ވޯލްޑްކަޕު ގައިވެސް ބެންޗުގައި އިންނަން ޖެހިފައިވާއިރު، މިއީ އޭނާގެ އެންމެ ފަހު ވޯލްޑްކަޕް ކަމުން އޭނާ ގިނަ ހުވަފެންތަކެއް އައީ ދެކެމުންނެވެ. އެކަން ހާމަކޮށް އޭނާގެ ހުރިހާ އިހްސާސްތައް ބަނޑުންކޮށްލީ އިންސްޓަގްރާމް ގައި ކުރި އަސަރުގަދަ ޕޯސްޓަކުންނެވެ.

ރޮނާލްޑޯ ގެ އެ ޕޯސްޓުގައި ބުނީ، ޕޯޗުގަލްއާ އެކު ވޯލްޑް ކަޕް ކާމިޔާބު ކުރުމަކީ ކެރިއަރުގައި އެންމެ ބޭނުންވި ކަންތައް ކަމަށެވެ.

"ޕޯޗުގަލްއާ އެކު ވޯލްޑް ކަޕް ކާމިޔާބު ކުރުމަކީ ކެރިއަރުގައި އެންމެ ބޭނުންވި ކަންތައް. އަހަރެންނަށް ބައިނަލްއަގްވާމީ ތަށިތައް ލިބުނު. އެކަމަކު ޕޯޗުގަލްގެ ނަން ވޯލްޑް ކަޕްގެ ތަށީގައި ލިޔެލުމަކީ އަހަރެންގެ އެންމެ ބޮޑު ހުވަފެން" ސޯޝަލް މީޑިއާގައި މިއަދު ރޮނާލްޑޯ އާއްމުކުރި ބަޔާނުގައި ބުނެފައިވެ އެވެ.

"އެ ހުވަފެން ހަގީގަތަކަށް ހަދަން އަހަރެން ވަރަށް ބުރަކޮށް މަސައްކަތްކުރިން. ފަސް މުބާރާތުގައި ހޭދަވި 16 އަހަރު އަހަރެން ގޯލު ޖެހިން. އަހަރެންގެ ވަށައިގެން ތިބީ ޕޯޗުގަލްގެ މޮޅެތި ކުޅުންތެރިން. ޕޯޗުގަލްގެ އެތައް މިލިއަން ބަޔަކު އަހަރެންނަށް ސަޕޯޓް ދިން. ތަށި ހޯދުމަށްޓަކައި އަހަރެން ހުރިހާ އެއްޗެއް ދިނިން." ރޮނާލްޑޯ ބުންޏެވެ.

އެހެންނަމަވެސް މޮރޮކޯ އަތުން ބަލިވި މެޗާއި އެކު އެ ހުވަފެންވެސް ވަޅުޖެހިއްޖެ ކަމަށާ، އެ މެޗުން ބަލިވުމާއި ގުޅިގެން ތަފާތު ވާހަކަ ދެކެވުނަސް ހިތުގައި ގައުމަށް އޮތް ލޯބި ފަނޑުނުވާނެ ކަމަށެވެ.

ހިތާމައަކީ އަހަރެންގެ އެ ހުވަފެން (ވޯލްޑްކަޕު ތަށި ހޯދުމުގެ ހުވަފެން) ވަޅުޖެހުނުކަން. މީހުން ދައްކާ ވާހަކަ އަށް ރައްދު ދިނުމުގެ ބޭނުމެއްނެތް. އަހަރެން އެންމެނަށް ބުނެލަން އޮތީ، ވަރަށް ގިނަ ވާހަކަ ދައްކައިފި، ވަރަށް ގިނަ ވާހަކަ ލިޔެފިވެސް، ވަރަށް ގިނަ ވާހަކަ ފަތުރައިފި، އެކަމު ޓީމަށްޓަކައި އަހަރެންގެ ހިތުގައި އޮތް އިޚްލާޞްތެރިކަން އެންމެ ހިނދުކޮޅަކަށް ވެސް ކުޑައެއް ނުވޭ. އަހަރެން އަބަދުވެސް ދިޔައީ އަހަރެންގެ ލަނޑުދަނޑި ހާސިލް ކުރަން ހަނގުރާމަ ކުރަމުން، އަހަރެންގެ ގައުމާއި އަހަރެންގެ ޓީމުގެ ކުޅުންތެރިންނަށް ފުރަގަހެއް ނުދޭނަން. ރޮނާލްޑޯ ބުންޏެވެ.

މިއާއެކު އޭނާވަނީ ކުޅުންތެރިންނާއި، ޕޯޗުގަލް ގެ ސަޕޯޓަރުންނާއި ގަތަރަށްވެސް ޝުކުރު އަދާކޮށްފައެވެ.

މިފަހަރުގެ ވޯލްޑްކަޕްގައި ރޮނާލްޑޯ އަށް ޖެހުނީ އެންމެ ގޯލެކެވެ. އެއީ ގާނާ ކޮޅަށް ޖެހި ޕެނަލްޓީ އެކެވެ.