ގާނޫނު އޮތް ގޮތުން ތިނަދޫ ސިޓީއަކަށް ވިޔަސް އޮންނާނީ ރަށު ކައުންސިލެއް: ފިލްޒާ

ތިނަދޫއަކީ ސިޓީ އެއް ކަމުގައި ކަނޑައަޅާފައި އޮތް ނަމަވެސް މިހާރު ގާނޫނު އޮތް ގޮތުން އެ ސިޓީގެ ރަށު ކައުންސިލަށް ސިޓީ ކައުންސިލެއްގެ ދަރަޖަ ނުދެވޭނެކަމަށް ރައްޔިތުން މަޖިލީހުގެ ކައުސެލް ޖެނެރަލް ފާޠިމަތު ފިލްޒާ ލަފާ ދެއްވައިފިއެވެ.

ނިމިދިޔަ ރިޔާސީ އިންތިހާބުގެ ތެރޭގައި ކުރީގެ ރައީސް އިބްރާހިމް މުހައްމަދު ޞާލިހުގެ ގަރާރަކުން ތިނަދޫއަށް ވަނީ ސިޓީއެއްގެ ދަރަޖަ ދެއްވާފައެވެ.

އެހެންނަމަވެސް، އެ ކައުންސިލްގެ ހައިސިއްޔަތާ މެދު ކަންބޮޑުވުންތަކެއް އޮތުމުން އެ ކައުންސިލުން މަޖިލީހުގެ ލާމަރުކަޒީ ކޮމިޓީ އަށް ހުށަހެޅި އެވެ. އެގޮތުން 
އެ ކައުންސިލަށް އެކި އިދާރާތަކުން އެކި ގޮތްގޮތަށް އެޑްރެސް ކުރާ މައްސަލަ އާއި ބަޖެޓާއި މެންބަރުންގެ މުސާރައިގެ އިތުރުން ބައެއް ހިދުމަތްތައް ދިނުމުގައި އޮޅުން އަރާ ކަން ފާހަގަކޮށްފައި ވެއެވެ.

އެ މައްސަލާގައި ރައްޔިތުންގެ މަޖިލީހުގެ ލާމަރުކަޒީ ކޮމެޓީ އިން އިއްޔެ ވަނީ ތިނަދޫ އަކީ ސިޓީއެއް ކަމަށާއި އެ ރަށު ކައުންސިލަކީ ސިޓީ ކައުންސިލެއް ކަމަށާއި އަދި އެ ސިޓީގައި މޭޔަރެއް ހުންނަން ޖެހޭކަމަށް ނިންމާފައެވެ.

ނަމަވެސް، މަޖިލީހުގެ ކޮމިޓީން އެ ނިންމި ނިންމުމަކީ ގާނޫނީ ގޮތުން ބަލާއިރު ރަނގަޅު ނިންމުމެއް ނޫން ކަމަށް ވިދާޅުވެ، އެ ކޮމިޓީއަށް ކައުންސެލް ޖެނެރަލް ވަނީ ލަފާ އަރުއްވާފައެވެ.

އެގޮތުން، ފިލްޒާގެ ލަފާ، އެ ކޮމިޓީގައި މިއަދު އިއްވާފައިވާއިރު، އޭގައިވާގޮތުން، އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 51 ވަނަ މާއްދާ ގައިވާގޮތުން ކައުންސިލް މެންބަރުންގެ ދައުރު މެދުތެރެއިން ސިޓީއެއްގެ ދަރަޖަ ރަށަކަށް ހަމަޖައްސައިފިނަމަ، އެ މެންބަރުންގެ ދައުރު ނިމެންދެން އެ ކައުންސިލެއް ރަށު ކައުންސިލެއްގެ ދަރަޖާގައި ދެމިއޮންނާނެކަމެވެ.

އަދި ރަށު ކައުންސިލްގެ ދައުރުގެ ތެރެއިން ސިޓީއެއް އުފެދޭ ހާލަތުގައި އެ ސިޓީއަކަށް ސިޓީ ކައުންސިލެއް އުފައްދަން ގާނޫނު ލާޒިމް ނުކުރާ ކަމަށް ފިލްޒާ ވިދާޅުވި އެވެ.

"ސިޓީ ކައުންސިލް އުފައްދަން ގާނޫނުގައި އެއްވެސް މާއްދާއަކުން ލާޒިމްކޮށްފައި ނުވާތީ، އެ ގާނޫނުގެ އެއްވެސް މާއްދާއަކުން ތިނަދޫ ރަށު ކައުންސިލަށް ސިޓީ ކައުންސިލްގެ ދަރަޖަ ދެވިގެންދާނެ ކަމަށް ނުފެނޭ"

މަޖިލީހުގެ ކައުސިލް ޖެނެރަލް ފާޠިމަތު ފިލްޒާ

ނަމަވެސް، ސިޓީއަކުން ލިބެންޖެހޭ ހިދުމަތްތައް ރައްޔިތުންނަށް ފޯރުކޮށްދިނުމުގައި މެދުކެނޑުމެއް އަޔަނުދިނުމަށްޓަކައި ސިޓީ ކައުންސިލަށް ގާނޫނުން ލިބިދޭ ބާރުތަކާއި މަސްއޫލިއްޔަތުތައް މި ހާލަތުގައި ރަށު ކައުންސިލަށް ލިބިދޭ ކަމަށް ފިލްޒާ ވިދާޅުވެފައި ވެއެވެ.

އަދި ކައުންސިލް ރައީސް އާއި މެންބަރުން އެ މަގާމާއި ހަވާލުވެވަޑައިގެންނެވުމަށްޓަކައި ކުރެއްވި ހުވާ ކުރައްވައިގެން  ސިޓީ ކައުންސިލެއްގެ މޭޔަރު ކަމާއި މެންބަރުންގެ ހައިސިއްޔަތު ނުދެވޭނެ ކަމަށް ވެސް ވިދާޅުވި އެވެ.

ފިލްޒާގެ ލަފައާ ގުޅިގެން މަޝްވަރާ ކުރުމަށް ފަހު މިއަދު ލާމަރުކަޒީ ކޮމިޓީން ނިންމާފައިވަނީ ލާމަރުކަޒީ ގާނޫނަށް އިސްލާހު ގެނެސް ތިނަދޫ ކައުންސިލަށް ސިޓީ ކައުންސިލެއްގެ ދަރަޖަ ދޭން މަޖިލީހަށް ހުށަހަޅާށެވެ.