ވަރިވާން ދިޔަ އަންހެނަކަަށް ގުޅައި މެސެޖުކޮށް ހެދި ފަނޑިޔާރު މަޤާމުން ވަކިކޮށްފި

ވަރިވާން ކޯޓަށް ދިޔަ އަންހެނަކަށް ގުޅައި މެސެކް ކޮށް ހެދި ފަނޑިޔާރު މަޤާމުން ވަކިކޮށްފިއެވެ.

މިމައްސަލައިގައި މަޤާމުން ވަކިކޮށްފައިވަނީ ހދ. ޖުޑީޝަލް ދާއިރާގެ އިސްމެޖިސްޓްރޭޓް އަލީ އާދަމް އެވެ.

އޭނާ މަޤާމުން ވަކިކުރުމަށް ނިންމައިފައިވަނީ ރައްޔިތުންގެ މަޖިލީހުންނެވެ.

ފަނޑިޔާރު އަލީ އާދަމްގެ މަޤާމުން ވަކިކުރަމަށް 46 މެމްބަރަކު ވަނީ ވޯޓު ދެއްވައިފައެވެ.

އަލީ އާދަމް މެޖިސްޓްރޭޓް ކަމުން ވަކިކުރަން ނިންމީ ހދ. ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް އެދި ހުށަހެޅި އަންހެނަކަށް ގުޅައި މެސެޖުކޮށް ހެދިކަން ޖޭއެސްސީގެ ތަހުޤީޤަށް ސާބިތުވުުމުންނެވެ.

މިމައްސަލަގައި ހިމެނޭ ދެމީހުންގެ ތެރެއިން ވަރިވާން ދިޔަ އަންހެން މީހާއަށް ގުޅައި، މެސެޖުކޮށް ހުށަހަޅާފައިވާ މައްސަލައާ ގުޅޭގޮތުން ޝަރީޢަތުގެ ބޭރުން އެކި ވާހަކަތައް ދައްކައި ފައިވެއެވެ.

އަދި ރަޙްމަތްތެރިކަން ބާއްވަން ހުށަހަޅައި، ދެމަފިރިކަމުގެ ގުޅުމުގެ ޒާތީ މައުލޫމާތު އަހައި، މި ނޫން ވެސް ޒާތީ އެކި މެސެޖުތައްކޮށް، ކުރާ މެސެޖުތައް ޑިލީޓްކޮށްފައި ބެހެއްޓުމަށް އެދި މެޖިސްޓްރޭޓް ޢަލީ އާދަމް މުވާސަލާތު ކޮށްފައިވާކަން، ތަޙުޤީޤަށް ލިބިފައިވާ ސްކްރީންޝޮޓްތަކުންނާއި، ބަޔާންތަކުން އަދި އިސްމެޖިސްޓްރޭޓް ޢަލީ އާދަމްގެ އިޢުތިރާފުން ސާބިތުވެފައިވެއެވެ.