ޕާކިސްތާނުގެ ސުޕްރީމް ކޯޓުން އިމްރާން ޚާން އަމިއްލަ ހޮސްޕިޓަލަކަށް ބަދަލުކުރަން އަމުރުކޮށްފި
ލިޔުންތެރިޔާ
އަބްދުﷲ ހުސައިން
ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ލޮލުގެ ފަރުވާއަށްޓަކައި އިސްލާމްއާބާދުގެ އަމިއްލަ ހޮސްޕިޓަލަކަށް ކުރިއަށް އޮތް ދެ ދުވަހުގެ ތެރޭގައި ބަދަލުކުރުމަށް އެ ޤައުމުގެ އެންމެ މަތީ ކޯޓުން އަންގައިފިއެވެ.
ސްޕްރީމް ކޯޓުގެ މި އަމުރާއެކު 2023 ވަނަ އަހަރުގެ އޮގަސްޓް ފަސް ވަނަ ދުވަހުން ފެށިގެން ބަންދުގައި ހުރި ޚާން ޖަލުގެ ބޭރުގައި ދިގު މުއްދަތެއް ހޭދަކުރާނެ ފުރަތަމަ ފުރުޞަތު މި އަމުރާ އެކު ލިބިގެންދާނެއެވެ. އަމިއްލަ ހޮސްޕިޓަލެއްގައި ފަރުވާ ހޯދުމަށް އިމްރާންޚާން އެދުމާ ގުޅިގެން ޖަލު އިދާރާތަކުން ކޯޓަށް މަޢުލޫމާތު ދީފައިވަނީ، އޭނާގެ ލޮލުގެ ފެނުން ރަނގަޅުވަމުން އަންނަ ކަމަށެވެ. އެހެން ނަމަވެސް ކޯޓުން ނިންމީ ހޮސްޕިޓަލަށް ބަދަލުކުރުމަށެވެ.
ސެޕްޓެމްބަރު 16 ގައި ތާވަލުކޮށްފައިވާ ދެން އޮންނަ އަޑުއެހުމާ ޖެހެންދެން ޕީޓީއައިގެ ލީޑަރު ހޮސްޕިޓަލުގައި ބެހެއްޓުމަށް ކޯޓުން ވަނީ އަންގާފައެވެ.. މި ނިންމުމާ އެކު ގާތްގަނޑަކަށް މަހެއްހާ ދުވަހު ޞިއްޙީ ބެލުމުގެ ދަށުގައި ޖަލުން ބޭރުގައި ޚާން ހުންނާނެއެވެ.
މި އަމުރާ ގުޅޭ ގޮތުން ސުޕްރީމް ކޯޓުން ސާފުކޮށް ބުނެފައިވަނީ މިއީ ޚާން މިނިވަންކުރުމުގެ އަމުރެއް ނޫން ކަމަށެވެ. އޭނާގެ މައްޗަށް ކޮށްފައިވާ ޙުކުމްތައް ބާޠިލް ނުކުރާ ކަމަށާއި ހަމައެކަނި ޞިއްޙީ ޙާލަތަށް ރިޢާޔަތްކޮށް ނެރުނު އަމުރެއް ކަމަށް ކޯޓުން ބަޔާންކޮށްފައިވެއެވެ. މީގެ އިތުރުން ޚާންގެ ޞިއްޙީ ޙާލަތު ސިޔާސީ ހަތިޔާރެއްގެ ގޮތުގައި ބޭނުންނުކުރުމަށް ޕީޓީއައިއާއި ޚާންގެ ސަޕޯޓަރުންނަށް ކޯޓުން ވަނީ އިންޒާރު ދީފައެވެ.
ޕާކިސްތާނުގެ ތާރީޚަށް ބަލާއިރު ޖަލުގައި ތިބި ސިޔާސީ ޝަޚްޞިއްޔަތުންނަށް ޞިއްޙީ ސަބަބުތަކަށްޓަކައި ދެވުނު ލުއިތަކަށް ފަހު ޤާނޫނީ ނުވަތަ ސިޔާސީ ބޮޑެތި ލުއިތައް ލިބިފައިވާ ޙާލަތްތައް ފެނިފައިވެއެވެ. ތިން އަހަރަށް ވުރެ ދިގު މުއްދަތެއް ބަންދުގައި ހޭދަކުރުމަށް ފަހު ޚާން ޖަލުން ބޭރަށް ނުކުތުމަކީ އޭނާގެ ދިގުލައި ގޮސްފައިވާ ޤާނޫނީ ހަނގުރާމައިގައި ފާހަގަކޮށްލެވޭ ބޮޑު ކުރިއެރުމެއް ކަމުގައި ގިނަ ފަރާތްތަކުން ދެކެއެވެ. ސެޕްޓެމްބަރު 16 ވަނަ ދުވަހުގެ އަޑުއެހުމަށް ފަހު ކޯޓުން ދެން ނިންމާ ނިންމުމަކަށް ޕާކިސްތާނުގެ ގިނަ ރައްޔިތުންގެ ނަޒަރު ވަނީ ހުއްޓިފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
