"މާލޭ މައްސަލަތައް ހައްލު ކުރެވޭނީ ރައީސާއެކު މަސައްކަތް ކޮށްގެން؛ އެމަނިކުފާނަކީ އެ މައްސަލަތައް ދަންނަ ބޭފުޅެއް"

އަދުގެ ސަރުކާރުގެ ރައީސުލްޖުމްހޫރިއްޔާ ކަމުގެ މަގާމުގައި ހުންނެވީ މާލޭގެ ޙާލަތު ވަރަށް ގާތުން ދެކެވަޑައިގެންފައިވާ ބޭފުޅެއް ކަމަށާ، އެމަނިކުފާނާއި ގުޅިގެން، މަސައްކަތް ކުރާނެ މޭޔަރަކު އިންތިޚާބުވެވަޑައިގެންފި ނަމަ، މާލެ ސިޓީ އަށް މިވަގުތު ދިމާވެފައިވާ މައްސަލަތައް ހައްލު ކުރެވޭނެ ކަމަށް، މާލޭ މޭޔަރ ކަމަށް ސަރުކާރު ހިންގާ މައި ޕާޓީ، ޕީއެންސީގެ ޓިކެޓްގައި ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ރޭ "ވަގުތު" ޓީވީގެ "ތަފްސީލީ" ޕްރޮގްރާމްގައި ވާހަކަ ދައްކަވަމުން ޢާޒިމާ ވަނީ އޭނާގެ މޭޔަރ ކަމުގައި މާލެ ސިޓީއާއި މެދު ގެންގުޅުއްވާ ތަޞައްވުރާއި ގުޅޭ ތަފްސީލް ހާމަކުރައްވާފައެވެ.

އެގޮތުން ޢާޒިމާ ވިދާޅުވީ، އަދުގެ ސަރުކާރުގެ ރައީސުލްޖުމްހޫރިއްޔާ ކަމުގެ މަގާމުގައި ހުންނެވީ މާލޭގެ މޭޔަރ ކަން ކުރެއްވި ބޭފުޅެއް ކަމަށެވެ. އަދި ރައީސުލްޖުމްހޫރިއްޔާ ޑރ މުހައްމަދު މުޢިއްޒު މާލޭ މޭޔަރ ކަން ކުރެއްވި އިރު، މާލެސިޓީ ތަރައްގީ ކުރައްވާނެ ގޮތުގެ ސްޓްރެޓެޖިކް އެކްޝަން ޕްލޭން އެއް އެކުލަވައި ލައްވާފައިވާ ކަމަށާ, އެމަނިކުފާނުގެ މިސަރުކާރުގައި ވެސް މާލެ ސިޓީގެ ތަރައްޤީއަށް ގިނަ ކަންކަން ހިމަނުއްވާފައިވާ ކަމަށެވެ.

އެހެންކަމުން، ޢާޒިމާ ވިދާޅުވީ، އޭނާ މޭޔަރ ކަމަށް އިންތިޚާބުވެ ވަޑައިގެންފި ނަމަ، މަސައްކަތްތައް ބައްޓަން ކުރައްވާނީ، މާލެ ސިޓީގެ ސްޓެރެޓެޖިކް އެކްޝަން ޕްލޭންގެ ތަންފީޒު ނުވެ އޮތްބައި ތަންފީޒުކުރައްވައި، ރައީސް ޑރ.މުޢިއްޒުގެ ވަޢުދުފުޅުތަކުގެ ތެރެއިން މާލެސިޓީ އަށްް ޚާއްސަބައި ފުއްދުމަށްޓަކައި ސަރުކާރާއި ގުޅިގެން މަސައްކަތް ކުރައްވަން ކަމަށެވެ.

މިއާއެކު ޢާޒިމާ ވަނީ، އައު ސަރުކާރުން މާލެސިޓީއަށް ވެފައިވާ ވަޢުދުތައް ފުއްދުމަށްޓަކައި، ސަރުކާރު ތަމްސީލުކުރާ މޭޔަރަކު ހުރުމުގެ މުހިންމު ކަމަށް އަލި އަޅުވާލައްވާފައެވެ.

އެގޮތުން ޢާޒިމާ ވިދާޅުވީ، އައު ގާނޫނު އަސާސީއާއެކު، ކައުންސިލްތައް އުފެދި، ސިޓީ ކައުންސިލްތަކުގައި މޭޔަރުން އިންތިޚާބު ކުރަން ފެށިފަހުން، މާލެ ސިޓީ ގައި ސަރުކާރާއި އެއް ފިކުރެއް ނުވަތަ އެއް ޕާޓީއެއްގެ، މޭޔަރ އެއް އިންތިޚާބުވެވަޑައިގެންފައި ނުވާ ކަމަށެވެ.

އޭގެ ސަބަބުން، އެ ސިޓީގެ ތަރައްޤީއާ މެދު މޭޔަރ ގެންގުޅުއްވާ ތަސައްވުރާއި ސަރުކާރާއި ފުށުއަރައި، ގިނަ ގޮންޖެހުންތަކެއް ކުރިމަތިވާ އިރު، އެކަމުގެ ހުރިހާ ދައްޗަކާއި އުނދަގުލެއް ކުރިމަތިވަނީ ރައްޔިތުންނަށް ކަން ޢާޒިމާ ފާހަގަކުރެއްވި އެވެ.

ސަރުކާރާއި މޭޔަރ އާއި ދޭތެރޭގައި އެއް ވިސްނުންތަކެއް ނެތިފައި، އެއް އަމާޒެއް ނެތީ ކަމަށް ވަންޏާ އެ ސަފާ ކުރޭ މާލެ (ރައްޔިތުން) ވަރަށް ބޮޑަށް.... އެކަމު ސަރުކާރާއި އެކުގައި ހުރި މީހަކު އިންތިޚާބުވެއްޖެ ކަމަށްވަންޏާ އެކަން (މައްސަލަތައް ހައްލު) ކުރެވެން ވާނެ އަޅުގަނޑުމެންނަށް. މިހާރު ރައީސް ކަމާއި ހަވާލުވެ އެ ހުންނެވީ މާލޭ މޭޔަރ ކަން ކުރެއްވި ބޭފުޅެއް. ކުރިން ހައުސިންގް މިނިސްޓްރީ ގައި ހުންނެވީ. އެހެންވީމާ، ގިނަ މަސައްކަތް ތަކާއި ހަވާލުވެފައި، މާލޭގެ ހުރި ބޮޑެތި މައްސަލަތައް އަންޑަސްޓޭންޑް ވެފައި، އެ މައްސަލަ ތަކުގައި އަމިއްލައަށް މަސައްކަތް ކުރެއްވިފައިހުރި ބޭފުޅަކު ރައީސްކަމުގެ ގޮނޑިއަށް އިށީނދެވަޑައިގަތީމާ، އެބޭފުޅާކާއެކު މަސައްކަތް ކުރާނެ މީހަކު ނުކުމެއްޖެއްޔާ މާލެއަށް މައްސަލަތައް ހައްލުވާންޖެހޭނެ. މިފަހަރު އަޅުގަނޑުމެންނަށް މިކަން ނުވިއްޔާ، ދެން ނުވެސް ކުރެވޭނެ.

ޢާއިޝަތު ޢާޒިމާ ޝަކޫރު

ޢާޒިމާ ވިދާޅުވީ، ކެންޕެއިންގެ ތެރެއިންވެސް އެނޫން ގޮތް ގޮތުންވެސް އެކި ވިސްނުމުގެ ތަފާތު ބޭފުޅުންނާއި ބައްދަލުވާ ކަމަށާ، އެ އެންމެނަކީ، އަދި މާލޭގައި ދިރިއުޅޭ އެންމެނަކީވެސް އޭނާއަށް ވޯޓު ލެވޭނެ މީހުންވެސް ނޫން ކަމަށެވެ. އެހެން ނަމަވެސް، މޭޔަރ ކަމަށް ވަޑައިގަންނަވަނީ ޚިދުމަތްކުރައްވަން ކަމަށްވާއިރު، އޭނާގެ މޭޔަރ ކަމުގައި އެއްވެސް ތަފާތު ކުރުމެއްނެތި މާލެސިޓީ ގައި ދިރިއުޅޭ މާލޭ މީހުންނާއި އެނޫން މީހުންގެ އިތުރުން މާލެއަށް ޒިޔާރަތް ކުރާ، އެންމެނަށްވެސް، ފަސޭހަ، ހިތްހަމަޖެހިގެން، ރައްކާތެރިކަމާއި އެކު އުޅެވޭނެ ތަނަކަށް މާލެ ހައްދަވާނެ ކަމަށެވެ.