ހުޅުމާލެ ފޭސް 3 އިން ބިން ލިބުނު މީހުންނަށް ފުށިދިއްގަރުފަޅުން ބިން ދޫކުރަން ނިންމި ވާހަކައަކީ ދޮގެއް: ފަޒުލް

ބިންވެރިޔާ ސްކީމުން ހުޅުމާލެ ފޭސް 3 އިން ބިން ލިބުނު މީހުންނަށް ފުށިދިއްގަރުފަޅުން ބިން ދޫކުރަން ނިންމި ވާހަކައަކީ ހަގީގަތާއި ހިލާފު ވާހަކައެއް ކަމަށް އާބަންކޯގެ މެނޭޖިން ޑިރެކްޓަރ ފަޒުލް ރަޝީދު ވިދާޅުވެއްޖެއެވެ.

ފަޒުލް މިފަދައިން ވިދާޅުވީ ހުޅުމާލެ ފޭސް 3 އިން ބިން ލިބުނު ފަރާތްތަކަށް ފުށިދިއްގަރުފަޅުން ބިން ދޫކުރަން ނިންމާފައިވާކަމަށް ބުނެ ބައެއް މީޑީއާތަކުން ރިޕޯޓުކުރަމުންދާތީ އެކްސްގައި ކުރެއްވި ޕޯސްޓެއްގައެވެ.

ބައެއް މީޑިޔާތަކުގައި ރިޕޯޓު ކުރާގޮތުން ހުޅުމާލެ ފޭސް 3 އިން ބިން ލިބިފައިވާ މީހުންނަށް ފުށިދިއްގަރުފަޅުން ބިން ދޫކުުރުމަށް ނިންފައިވާ ކަމަށާއި، އެ ބިންތައް ފުށިދިއްގަރުފަޅަށް ބަދަލު ކުރާގޮތަށް ޕްލޭން ކުރުމަށް އަންގާފައިވާ ކަމަށެވެ. އެހެންނަމަވެސް ފަޒުލް ވަނީ މިވާހަކަތައް ދޮގު ކުރައްވާފައެވެ.

މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލު ގެނައުމުގެ ގޮތުން ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުން ހުޅުމާލެ ފޭސް-3 އިން 63 ހެކްޓަރުގެ ބިން ހިއްކުމަށް ވަނީ ނިމާފައެވެ. އަދި  އެސަރުކާރުން ވަނީ ފޭސް 3 އިން ބިން ވެސް ދޫކޮށްފައެވެ. މިއަހަރުގެ ސެޕްޓެންބަރު މަހުގެ ތެރޭގައި މި ސަރަހައްދު ހިއްކަންފެށި ނަމަވެސް މިހާރު ވަނީ ވަގުތީ ގޮތުން މަސައްކަތް ހުއްޓާލާފައެވެ.