މާލެ ސަރަހައްދުގައި ދިރިއުޅޭ އެންމެންނަށް ބޯހިޔާވަހިކަން ފަހިކޮށްދިނުމަކީ މި ސަރުކާރުގެ އަމާޒެއް: މިނިސްޓަރު ހައިދަރު

މި ފަސް އަހަރު ނިމެންވާއިރަށް މާލެ ސަރަހައްދުގައި ދިރިއުޅޭ އެންމެހައި ރައްޔިތުންނަށް ބޯހިޔާވަހިކަން ފަހިކޮށްދިނުމަކީ މި ސަރުކާރުގެ އަމާޒެއް ކަމަށް ހައުސިންގ މިނިސްޓަރު ޑރ. އަލީ ހައިދަރު މުހައްމަދު މިއަދު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ ފަހި ދިރިއުޅުން ކޯޕަރޭޝަން (އެފްޑީސީ) ގެ "އަމާން ދޯދި" ގެ މޮޑެލް އެޕާޓްމެންޓް ދައްކާލުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

"އަމާޒަކީ އަޅުގަނޑުމެންގެ ފަސް އަހަރުގެ ދައުރު ނިމެންވާއިރަށް މާލެ ސަރަހައްދުގައި ބޯހިޔާވަހިކަން ލިބިފައިނުވާ އެއްވެސް އާއިލާއެއް އެއްވެސް ގޭބީސީއެއް ނެތުން. އެ އަމާޒަށް އަޅުގަނޑުމެން މަސައްކަތް ކުރާނަން"

މިނިސްޓަރު ޑރ. ހައިދަރު ވިދާޅުވި އެވެ.

މީގެ އިތުރުން މިނިސްޓަރު ވިދާޅުވީ 4،000 މީހަކަށް އެޕާޓްމެންޓް ލިބޭއިރު، ކުރިއަށް އޮތްތަނުގައި ރައީސް ޑރ. މުހައްމަދު މުއިއްޒުގެ ބޯހިޔާވަހިކަމުގެ ވައުދުފުޅުގެ ތެރެއިން އެފަދަ އިތުރު މަޝްރޫއުތައް ފަށާނެ ކަމަށެވެ.

ހުޅުމާލޭގެ އިތުރުން ގުޅިފަޅާއި ގިރާވަރުފަޅުން ވެސް ކުރުމުއްދަތެއްގައި ގެދޮރުވެރިކަމުގެ ސިޔާސަތު ހާސިލުވާނެކަމުގެ ޔަގީންކަން ދެއްވާ މިނިސްޓަރު ޑރ. ހައިދަރު ވިދާޅުވީ ކުރިއަށް އޮތް 20 އަހަރަށް ބޭނުންވާ ބޯހިޔާވަހިކަން ހަމަޖެއްސުމަށް ފުށިދިއްގަރުފަޅު ތަރައްގީކުރައްވާނެ ކަމަށެވެ.

އޭނާ ވިދާޅުވީ ފުށިދިއްގަރުފަޅު ހިއްކައިގެން ބޯހިޔާވަހިކަން ފަހިކޮށްދިނުމަކީ ރައީސް ޑރ.މުއިއްޒުގެ ވައުދުފުޅެއް ކަމަށާއި އެ މަޝްރޫއިން ދަރިންގެ ދަރިންނަށް ވެސް ބޯހިޔާވަހިކަން ކަށަވަރުކުރެވޭނެ ކަމަށެވެ.

މާލެ ސަރަހައްދުގައި ދިރިއުޅޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ އަށް މި މަޝްރޫއުތަކުގެ ސަބަބުން ލުޔެއް ލިބޭނެކަމަށް ވެސް މިނިސްޓަރު ވިދާޅުވިއެވެ.

ފުށިދިއްގަރުފަޅު ހިއްކައި، އެތަނުން ރައްޔިތުންނަށް ބިން ދޫކުރުމަކީ ރައީސް ޑރ. މުއިއްޒުގެ އެންމެ ބޮޑު ބޯހިޔާވަހިކަމުގެ މަޝްރޫއެވެ. އެ މަޝްރޫއު ދައުލަތުގެ އަންނަ އަހަރުގެ ބަޖެޓުގައި ހިމެނި ނަމަވެސް އެކަން ވަނީ ކޮމިޓީ މަރުހަލާގައި އެމްޑީޕީ މެންބަރުން އިސްވެ ތިއްބަވާ އުނިކުރައްވާފައެވެ.