ވަރލްޑްކަޕްގައި އެންމެގިނަ ލަނޑު ޖެހުމުގެ ރެކޯޑް އެމްބާޕޭއަށް

ފީފާ ވަރލްޑްކަޕް ތާރީހުގައި މިހާތަނަށް އެންމެ ގިަނ ލަނޑުޖެހި ކުޅުންތެރިޔަކަށް ފްރާންސްގެ އެމްބާޕޭ ވެއްޖެއެވެ.

މީގެ ކުރިން ވަރލްޑްކަޕްގައި އެންމެގިނަ ލަނޑު ޖެހުމުގެ ރެކޯޑް އޮތީ 21 ގޯލާއެކު އާޖެންޓީނާގެ ލިއޮނެލް މެސީގެ އަތުގައެވެ. ވަރލްޑްކަޕްގައި މިހާތަނަށް އެންމެގިނަ ލަނޑުޖެހި ކުޅުންތެރިޔާގެ ރެކޯޑް އެމްބާޕޭ ހޯދާފައިވަނީ ރޭ އިންގްލޭންޑާ ދެކޮޅަށް ކުޅުނު މެޗްގައި ޖެހި ދެ ލަނޑާއެކުގައެވެ. މިހާތަނަށް ވަރލްޑްކަޕްގެ ތިން މުބާރާތެއްގައި ކުޅުނު 22 މެޗްގައި އެމްބާޕޭ ވަނީ ޖުމްލަ 22 ލަނޑު ޖަހާފައެވެ.

އެމްބާޕޭގެ އެންމެ ފުރަތަމަ ވަރލްޑްކަޕަކީ 2018 ވަނަ އަހަރު ރަޝިއާގައި ބޭއްވި ވަރލްޑްކަޕް މުބާރާތެވެ. އެފަހަރުގެ މުބާރާތުގައި އެމްބާޕޭ ވަނީ 4 ލަނޑު ޖަހާފައެވެ. އެއަށްފަހު، 2022 ވަނަ އަހަރު ޤަތަރުގައި ބެއްވި މުބާރާތުގައި އޭނާ ވަނީ 8 ގޯލް ޖަހާފައެވެ.

ވަރލްޑްކަޕްގައި އެންމެ ގިނަ ލަނޑުޖެހި ކުޅުންތެރިޔާގެ މަގާމް އެމްބާޕޭ ހޯދިއިރު، މިފަހަރުގެ މުބާރާތުގެވެސް އެންމެ ގިނަ ލަނޑުޖެހި ކުޅުންތެރިޔާއަށްދޭ އެޑިޑާސް ގޯލްޑަން ބޫޓުގެ ރޭހުގެ އެންމެ ކުރީގައި އުޅެނީވެސް އެމްބާޕޭއެވެ. މިފަހަރުގެ ވަރލްޑްކަޕްގައި އެމްބާޕޭ ވަނީ 10 ލަނޑު ކާމިޔާބުކޮށް 4 އެސިސްޓް ހަދާފައެވެ.

އެމްބާޕޭގެ ފަހަތުން ދެވަނައަށް އެންމެ ގިނަ ލަނޑު ޖެހި ކުޅުންތެރިޔަކީ މެސީއެވެ. މިފަހަރުގެ މުބާރާތުގައި މެސީ ޖެހި ލަނޑުގެ އަދަދު އުޅެނީ 8 ގައެވެ. މެސީއަށް އެމްބާޕޭ ހަދާފައިވާ ރެކޯޑްތައް މުގުރާލުމުގެ ފުރުސަތު އަދި އެބައޮތެވެ. ވަރލްޑްކަޕް ފައިނަލްމެޗްގައި ސްޕެއިނާ ދެކޮޅަށް ކުޅޭ މެޗްގައި މެސީ ތިން ލަނޑު ޖަހައިފިނަމަ ރަންބޫޓުގެ އިތުރުން ވަރލްޑްކަޕްގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމް މެސީއަށް ލިބޭނެއެވެ.