އަލުން މަޖިލިސް ފަށައި އިރުކޮޅެއް ނުވަނީސް ނިޒާމު ގެއްލި، އަނެއްކާވެސް މެދުކަނޑާލައިފި!

މަޖިލީހުގެ މިއަދުގެ ޖަލްސާ ކުރިއަށް ނުގެންދެވިގެން މެދުކަނޑާލުމަށްފަހު އަލުން ފަށައިގެންވެސް ކުރިއަށް ނުގެންދެވި, މަޖިލީހުގެ ނިޒާމް ގެއްލިގެން އަނެއްކާވެސް މެދު ކަނޑާލައިފި އެވެ.

ރައްޔިތުންގެ މަޖިލީހުގެ ޖަލްސާ މިއަދު ފުރަތަމަ ފެށުމަށްފަހުވެސް މެދުކަނޑާލަން ޖެހުނީ، ޗޯރޭ އޭ ގޮވައި މެންބަރުން ނިޒާމީ ނުކުތާ ނަންގަވައި، ބޭއަދަބީ ބަހުން އެއް މެންބަރެއް އަނެއް މެންބަރާއި މުޚާތަބު ކުރައްވައި، ގަޔަށް ބޮލަށް އަރާ ހިސާބަށް ދިޔުމުންނެވެ.

އެގޮތުން، ކުޑަހުވަދޫ ދާއިރާގެ މެންބަރު އާމިރު ވަނީ، ޖަލްސާ ކުރިއަށް ގެންދާނެ ގޮތަކާއި މެދު ހުރިހާ ސިޔާސީ ޕާޓީތަކާއި އަމިއްލަ މެންބަރުން މަޝްވަރާ ކުރެއްވުމަށްފަހު ކުރިއަށް ގެންދިޔުމަށް ޖަލްސާ މެދު ކަނޑާލައިފައެވެ.

އެއަށްފަހު އަލުން ޖަލްސާ ފަށައި، ކުއްލި މައްސަލަ ހުށަހެޅުމުގެ ފުރުސަތު މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ދެއްވައި މައްސަލަ ހުށަހަޅަން ފެށުމާއި އެކުގައި، ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވަނީ ނިޒާމީ ނުކުތާ ނަންގަވައި، ޖަލްސާގެ އެޖެންޑާ ސާފު ނުވާކަން ފާހަގަކުރައްވައި، ޖަލްސާ ނުގެންދެވޭނެ ކަމަށް ވިދާޅުވެފައެވެ.

"ރައްޔިތުންގެ މަޖިލީހުގެ ގަވާއިދުގައި ވަރަށް ސާފުކޮށް، އެބަ އޮވޭ ލިޔެފައި، 54 ވަނަ މާއްދާގެ (ށ) ގައި، އަޅުގަނޑު ދަންނަވާލާނަން، ޖަލްސާގެ އެޖެންޑާގައި ހިމަނާނީ އެ ޖަލްސާއެއްގައި ނިންމުމަށްއެދި، ނުވަތަ ކުރުމަށްްއެދި, ހުށަހަޅާ ކަންކަމޭ. އަދި އެކަންކަން ސާފުކޮށް އެނގޭނޭ މިންވަރަކަށް ނޫނޭ މި އިނީ، 6.1 (ކޮމިޓީތައް އެކުލަވާލަން) އެޖެންޑާގައި ހިމަނާފައި. އެޖެންޑާ އަކީ ސާފުކޮށް އެގެން އޮތް އެއްޗެއް ނޫނޭ. އެހެންވީމާ އެ މާއްދާއިން އެ ޖެންޑާ ނުނަގައި ދެން މަޖިލިސް ކުރިއަށް ގެންދެވޭނެ ގޮތެއް ނެތޭ. އެއީ ސާފު ނޫން ވީމާ."

މެދު ހެންވޭރު ދާއިރާގެ މެންބަރު ޢަލީ އާޒިމް

އާޒިމްގެ ނިޒާމީ ނުކުތާ ރިޔާސަތުން ބަލައިނުގެންނެވުމާއި ގުޅިގެން އޭނާ އާއި އެނޫންވެސް މެންބަރުން މަޖިލީހުގެ ތަޅުމުގައި ހަޅޭލަވައި އަޑުގަދަކުރައްވަމުން ވަނީ ގޮސްފައެވެ.

އަދި އޭގެ އިރުކޮޅެއް ފަހުން އަނެއްކާވެސް އާޒިމް ނިޒާމީ ނުކުތާ ނަންގަވައި، ހޯރަފުށީ ދާއިރާގެ މެންބަރު ސަލީމް މަޖިލީހުގެ ތަޅުމުގައި ހުންނަވައި މެންބަރުން ކަންކަން ކުރައްވަމުންދާ ގޮތުގެ ވީޑިއޯ ކުރައްވައި، ޓީވީ ޗެނަލަށް ފޮނުވާ ކަމަށް ވިދާޅުވެ، އެކަމާއި ނުރުހުން ފާޅުކުރައްވާފައި ވެއެވެ. ނަމަވެސް ސަލީމް ވަނީ އެފަދައިން ކަން ނުކުރައްވާ ކަމަށް ވިދާޅުވެފައެވެ.

އެއަށްފަހު ވެސް، ދާދިފަހުން އެމްޑީޕީން ކެނޑުނު އަމިއްލަ މެންބަރުންގެ ގޮތުގައި ތިއްބެވި މެންބަރުން ވަނީ ނިޒާމީ ނުކުތާ ނަންގަވައި، ކޮމިޓީތައް އެކުލަވާލުމާއި ގުޅިގެން އެފަރާތްތަކާއި އެއްވެސް މަޝްވަރާއެއް ނުކުރައްވައި، އެކަން އެޖެންޑާ ކުރައްވާފައިވާ ކަން ފާހަގަކުރައްވާފައެވެ.

އެއާއެކު އަމިއްލަ މެންބަރުންނާއި އިދިކޮޅު މެންބަރުން ގޮނޑިންތެދުވެ، ރިޔާސަތުގެ ކުރިމަތީގައި ވަނީ އަޑުގަދަކުރައްވަން ފައްޓަވާފައެވެ.

އޭގެ ސަބަބުން ޖަލްސާ ކުރިއަށް ނުގެންދެވި، ޖަލްސާ ކުރިއަށް ގެންދާނެ ގޮތަކާއި މެދު ސިޔާސީ ޕާޓީތަކުގެ ވެރިންގެ މެދުގައި މަޝްވަރާ ކުރެއްވުމަށް ޖަލްސާވަނީ މެދުކަނޑާލާފައެވެ.