އެފްޑީސީއިން އަމާން ދޯދި އެކްސްޕީރިއަންސް ޔުނިޓްތައް ރަސްމީކޮށް އިފްތިތާހުކޮށްފި

ފަހި ދިރިއުޅުން ކޯޕަރޭޝަން (އެފްޑީސީ)އިން "އަމާން ދޯދި" އެކްސްޕީރިއަންސް ޔުނިޓްތައް ރަސްމީކޮށް އިފްތިތާހުކޮށްފިއެވެ.

އިއްޔެ ހަވީރު އަމާން ދޯދި ޓަވަރު 16ގައި ބޭއްވި ރަސްމިއްޔާތެއްގައި އަމާން ދޯދީގެ އެކްޕީރިއަންސް ޔުނިޓްތައް ރަސްމީކޮށް އިފްތިތާހުކޮށްދެއްވީ މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑރ.ޢަލީ ޙައިދަރު އަޙްމަދެވެ.

މި ރަސްމިއްޔާތުގައި ވާހަކަދައްކަވަމުން ފަހި ދިރިއުޅުން ކޯޕަރޭޝަންގެ މެނޭޖިންގ ޑިރެކްޓަރ ހަމްދާން ޝަކީލް ވަނީ، އެފްޑީސީއިން އިމާރާތްކުރަމުންދާ 4000 ހާއުސިންގ ޔުނިޓްތައް ހަލުވި ސްޕީޑެއްގައި ނިންމައި، ފްލެޓް ލިބުނު ރައްޔިތުންނަށް އެ ފްލެޓްތައް ހަވާލުކުރުމަށް އެފްޑީސީއިން ހާއްސަ އިސްކަމެއްދީގެން މަސައްކަތްކުރަމުންދާ ކަމަށް ވިދާޅުވެފައެވެ.

އިއްޔެ ބޭއްވި މި ރަސްމިއްޔާތުގައި، މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދާއި، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑޮކްޓަރ ޢަބްދުالله މުއްތަލިބާއި، މިނިސްޓަރ އޮފް ސްޓޭޓް ފޮރ ފިނޭންސް ޙުސައިން ޝާމް އާދަމްއާއި، އާބަންކޯގެ ރިއަލް އެސްޓޭޓް މެނޭޖްމެންޓް ޑިރެކްޓަރ ޝާޒިމް ސައީދުގެ އިތުރުން، ސްޓެލްކޯގެ ޑެޕިއުޓީ މެނޭޖިންގ ޑިރެކްޓާރ ޢަބްދުالله ނާޒިރް އަދި އެފްޑީސީގެ ބޯޑު މެމްބަރު ނަޖީލް އަހްމަދު ބައިވެރިވެވަޑައިގެންނެވިއެވެ.

އަމާން ދޯދި އެކްޕީރިއަންސް ޔުނިޓްތައް ރަސްމީކޮށް އިފްތިތާހުކޮށްފައިވާއިރު، އަމާން ދޯދީގެ ހައުސިން ޔުނިޓްތައް ތަރައްގީކުރަނީ 16 ޓަވަރަށް ބަހާލައިގެންނެވެ. މި ޓަވަރުތަކުގައި ހިމެނެނީ ދެ ކޮޓަރީގެ 600 ޔުނިޓާއި ތިން ކޮޓަރީގެ 1400 ހައުސިން ޔުނިޓެވެ. ދެ ކޮޓަރީގެ ޔުނިޓްތަކުގައި ހުންނާނީ 650 އަކަފޫޓު ކަމަށްވާއިރު ތިން ކޮޓަރީގެ ޔުނިޓްތަކުގައި ހުންނާނީ 900 އަކަފޫޓެވެ.

އެފްޑީސީގެ ދަށުން ޖުމްލަ 4000 ހައުސިން ޔުނިޓް ތަރައްގީކުރަމުން އަންނައިރު، މި ޔުނިޓްތައް ހަވާލުކުރާނީ ޒަރޫރީ ފިނިޝިންގްގެ މަސައްކަތް ނިންމާފައި ކަމަށް އެ ކުންފުނިން ބުނެއެވެ.

އެގޮތުން، ފްލެޓްތައް ހަވާލުކުރާއިރު، ފަންކާ، ކުޑަދޮރު، ދޮރު، ޓައިލްސްހަރުކޮށް، ކުލަލައި، ފާހަނަތައްޓާއި މޫނު ދޮންނަ ތަށިވެސް ހަރުކޮށްފައި ހުންނާނެކަން ފާހަގަކޮށްފައިވެއެވެ.

އެފްޑީސީން "އަމާން ދޯދި" އެކްސްޕީރިއަންސް ޔުނިޓްތައް އާންމުންނަށް މިހާރު ހުޅުވާލާފައިވާއިރު، އެކަމުގެ މަޤްސަދަކީ، ފްލެޓްތައް ހަވާލުކުރުމުގެ ކުރިން، ޒަމާނީ ގެތައް ފަރުމާކުރެވޭނެ ތަފާތު ގޮތްތައް އާންމުންނަށް ދައްކުވައިދިނުން ކަމަށް އެ ކުންފުނިން ބުނެއެވެ.

އެފްޑީސީން ބުނީ، ހެޔޮ އަގެއްގައި ދެމެހެއްޓެނިވި އިޖްތިމާއީ ބޯހިޔާވަހިކަން ފޯރުކޮށްދިނުމަކީ އެކުންފުނިން ވަރަށް ބޮޑު އަހަމިއްޔަތުކަމެއްދޭ ކަމެއް ކަމަށެވެ.

އަމާން ދޯދި އެކްސްޕީރިއަންސް ޔުނިޓްތަކަކީ އެފްޑީސީ-އެންބީސީސީ ހައުސިން މަޝްރޫއުގެ ތެރެއިން ދޯދި ޓަވަރު 16 ގެ 2 ވަނަ ފަންގިފިލާގައި ހުންނަ ޔުނިޓްތަކެކެވެ. މި ޔުނިޓްތައް އެފްޑީސީގެ އެކްސްޕީރިއަންސް ޔުނިޓް ބުކިންގ ޕޯޓަލް މެދުވެރިކޮށް ބުކްކޮސްލެވޭނެވެއެވެ.