ވާދަވެރި ކުޅުމަކަށްފަހު ޑޯޓްމަންޑް ބަލިކޮށް ރެއާލް ޗެންޕިއަންކަން ހޯދައިފި

ޔުއެފާ ޗެންޕިއަންސް ލީގު ފައިނަލުގައި ހޮނިިހިރު ދުވަހުގެ ރޭ ވާދަވެރި ކުޅުމަކަށްފަހު 2-0 ގެ ނަތީޖާއަކުން ބޮރޫޝިއަ ޑޯޓްމަންޑް ބަލިކޮށް ރެއާލް މެޑްރިޑުން މުބާރާތުގެ ޗެންޕިއަންކަން ހޯދައިފިިއެވެ.

އިގިރޭސިވިލާތުގެ ވެރިރަށް ލަނޑަނުގެ ވެމްބްލީ ސްޓޭޑިއަމްގައި ކުޅުނު މިމެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެ ރެއާލް މެޑްރިޑް ކުޅުނު ނަމަވެސް މިހާފުގައި ލަނޑުޖަހާނެ ރަނގަޅު ފުރުސަތުތަކެއް ތަނަވަސްކުރީ ޑޯޓްމަންޑުންނެވެ.

އެގޮތުން ފުރަތަމަ ހާފުގެ 21 ވަނަ މިނެޓުގައި އެޓީމުގެ ޒުވާން ފޯވާޑް ކަރީމް އެޑެޔޭމީ އަށް ލިބުނު ހުސް ފުރުސަތެއްގައި ރެއާލްގެ ކީޕަރު ކޯޓުއާ ކައިރިން ނައްޓާލުމަށްފަހު ކުރިއަށް ފޮނުވާލި ބޯޅި ރެއާލްގެ ތަޖުރިބާކާރު ޑިފެންޑަރު ޑެނީ ކަވަހާލް ވަނީ ހުޝިއާރުކަމާއެކު ދިފާއުކޮށްފައެވެ. އަދި އޭގެ ދެމިނެޓު ފަހުން އެޓީމު ތަޖުރިބާކާރު ފޯވާޑް ނިކޮލަސް ފުލްކުރޫގް އަށް ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މީގެއިތުރުން ފުރަތަމަ ހަފުގެ 41 ވަނަ މިނެޓުގައި ރެއާލްގެ ޕެނަލްޓީ އޭރިއާ ބޭރުން ލިބުނު ފުރުސަތެއްގައި ޑޯޓްމަންޑްގެ މިޑްފީލްޑަރު މާސެލޯ ސަބިޓްޒާ ތިރިތިރިން ފޮނުވާލި ބާރު ހަމަލާ ކޯޓުއާ ދިފާއުކުރިއިރު، ފުރަތަމަ ހާފުގެ ކުޅުން ނިމިގެން ދިޔައީ ރެއާލް މެޑްރިޑަށް ޑޯޓްމަންޑްގެ ގޯލާއި އަމާޒުކޮށް އެންމެ ހަމަލާއެއް ފޮނުވާނުލެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ރެއާލް މެޑްރިޑުން ވަނީ އެޓީމުގެ ކުޅުނުް ރަނގަޅުކޮށް އެޓޭކުތައް އިތުރަށް ވަރުގަދަކިޮށްފައެވެ. ނަތީޖާއެއްގެ ގޮތުން މިހާފުގައި ރެއާލް މެޑްރިުޑުން ވަނީ ޑޯޓްމަންޑުގެ ގޯލާއި އަމާޒުކޮށް ރަނގަޅު ހަމަލާތަކެއް ފޮނުވާލާފައެވެ. އެގޮތުން ޑޯޓްމަންޑުގެ ޕެނަލްޓީ އޭރިއާ ބޭރުން ލިބުނު ހިލޭޖެހުމެއްފައި ޓޯނީ ކުރޫސް ފޮނުވާލި ހަމަލާގެ އިތުރުން، އެޓީމަށް ލިބުނު ކޯނަރެއްގައި މުޅިން ހުސްކޮށްހުރެ ކަވަހާލް ބޮލުން ފޮނުވާލި ހަމަލާ ފާހަގަކޮއްލެވެއެވެ.

މީގެ އިތުރުން މިހާފުގައި ޑޯޓްމަންޑުން އެންމެ ހުސް ފުރުސަތެއް ލިބުނީ ފޯވާޑް ފުލްކުރޫގް ބޮލުން ފޮނުވާލި ބާރު ހަމަލާ ރެއާލްގެ ކީޕަރު ކޯޓުއާ ވަނީ ހުޝިއާރުކަމާއެކު ދިފާއުކޮށްފައެވެ.

ރެއާލް މެޑްރިޑުން މެޗުގެ ލީޑު ހޯދި ލަނޑު ދެވަނަ ހާފުގެ 74 ވަނަ މިނެޓުގައި ކާމިޔަބުކޮށްދިނީ ޑިފެންޑަރު ޑެނީ ކަވަހާލް އެވެ. މިއީ އެޓީމަށް ލިބުނު ކޯނަރެއްގައި ޓޯނީ ކުރޫސް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ނުވަ މިނެޓު ފަހުން ރެއާލްގެ ބްރެޒިލް ފޯވާޑް ވިނީޝިއަސް ޖޫނިއާރ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މިއީ ޑޯޓްމަންޑުގެ ފަހަތުން ހެދުނު ގޯހެއްގެ ފައިދާނަގައި އެޓީމުގެ އިގިރޭސި މިޑްފީލްޑަރު ޖޫޑް ބެލިންގްހަމް މުޅިން ހުސްކޮއްލާފައި ޖައްސާލި ބޯޅައެއް ގޯލުގެ ކަނަށް އަމަޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ. އަދި މިއީ މިމުބާރާތުގެ ޗެންޕިއަންކަން ރެއާލް މެޑްރިޑުން ހޯދި 15 ވަނަ ފަހަރެވެ.