ވާދަވެރި ކުޅުމަކަށްފަހު އޭދަފުށި ބަލިކޮށް، ގަމުން ޗެރިޓީ ޝީލްޑް ދިފާއުކޮށްފި

ގޯލްޑަން ފުޓްސަލް ޗެލެންޖް 2025 ފެށުމުގެ ގޮތުން ކުޅުނު"ޗެރިޓީ ޝީލްޑް" މެޗު ވާދަވެރި ކުޅުމަކަށްފަހު 1-0 ގެ ނަތީޖާއަކުން ބ.އޭދަފުށި ބަލިކޮށް ލ. ގަމުން ކާމިޔާބުކޮށްފިއެވެ.

މުބާރާތް ފެއްޓުމުގެ ގޮތުން މިރޭ ހުޅުމާލޭ ރެހެންދި ފުޓްސަލް ދަނޑުގައި ބޭއްވުނު ކުލަގަދަ ރަސްމިއްޔާތު ޝަރަފްވެރިކޮށްދެއްވީ ސޮނީ ސްޕޯޓްސްގެ ޑިރެކްޓަރު މުހައްމަދު ކަލީމެވެ. އަދި މިރަސްމިއްޔާތުގައި މުބާރާތުގެ ރަސްމީ ލަވަ ހުށަހަޅައިދިނުމުގެ އިތުރުން ރަސްމީ ބޯޅަ ދައްކާލައިފައިވެއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، ގަމުން މެޗުގެ ލީޑުހޯދީ ދެވަނަ ހާފުގެ 31 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮއްދިނީ އަބްދުﷲ ޖުނައިދު އެވެ. މިއީ އޭދަފުށީގެ ޕެނަލްޓީ އޭރިއާ ބޭރުން އެޓީމަށް ލިބުނު ހިލޭޖެހުމެއްގައި ކެޕްޓަން އަންމަޑޭ ތަނަވަސްކޮށްދިން ފުރުސަތެއްގައި ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ލ.ގަން ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ލ.ގަމުގެ އަބްދުﷲ ޖުނައިދު އެވެ.

މިއީ ގަމުން ގޯލްޑަން ފުޓްސަލް ޗެރިޓީ ޝީލްޑް ޖެހިޖެހިގެން ކާމިޔާބުކުރި ދެވަނަ ފަހަރެވެ. އެގޮތުން މިދިޔަ އަހަރު އެޓީމުން ޗެރިޓީ ޝީލްޑް ކާމިޔާބުކުރީ ތ. ތިމަރަފުށި ބަލިކުރުމަށްފަހު އެވެ. އަދި މިދިޔަ އަހަރުގެ ގޯލްޑަން ފުޓްސަލް ޗެލެންޖް ފައިނަލުގައި މިދެޓީމު ކުޅުނުއިރު، ވާދަވެރި ކުޅުމަކަށްފަހު ޗެންޕިއަންކަން ހޯދީ އޭދަފުށިން ނެވެ. އަދި މިރޭގެ މެޗަށްފަހު ގޯލްޑަން އެސޯސިއޭޝަންގެ ފަރާތުން 25،000 ރުފިޔާ އަދި ގަމު ޓީމުގެ ފަރާތުން 25،000 ރުފިޔާ ފަލަސްތީނުގެ ރައްޔިތުންނަށް ހަދިޔާ ކޮށްފައިވެއެވެ

މީގެ އިތުރުން މިއަހަރުގެ ގޯލްޑަން ފުޓްސަލް ޗެލެންޖުގައި 129 ޓީމަކުން ބައިވެރިވެފައިވާއިރު، މުބާރާތުގައި ޖުމްލަ 320 މެޗު ކުޅުމަށް ވަނީ ހަމަޖެހިފައެވެ.