ކެލާ ފަޅުގައި ރިސޯޓެއް އަޅާ، ލޯކަލް ޓުއަރިޒަމް ފުޅާކުރާނަން: ޑރ މުއިއްޒު

ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ހއ ކެލާގެ ފަޅުތެރޭގައި ރިސޯޓެއް ހަދާ، އެ ރަށަކީ ލޯކަލް ޓުއަރިޒަމް ފުޅާކުރާނެ ރަށެއްކަމުގައި ހައްދަވާނެކަމަށް، އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައި ވަނީ ތިލަދުންމައްޗަށް އެމަނިކުފާނު ކުރައްވާ ކެމްޕޭނު ދަތުރުފުޅުގައި މިއަދު ހއ ކެލާއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަފުޅު ދައްކަވަމުންނެވެ.

ޑރ މުއިއްޒު ވިދާޅުވީ ރަށުގައި ތިބެގެން އާމްދަނީ ލިބޭނެ ރަނގަޅު ވަޒީފާތައް ނެތުމުން، ކެލާގެ ގިނަ ޒުވާނުން ވަޒީފާ އަދާކުރަމުންދަނީ ރަށުން ބޭރުގައި ކަމަށެވެ. އެހެންކަމުން އެ މައްސަލަ ދާއިމީގޮތެއްގައި ޙައްލުކޮށްދިނުމަށް ކެލާގެ ފަޅުގައި ރިސޯޓެއް ހަދާދެއްވާނެ ކަމަށާއި، އަދި އެ ރަށަކީވެސް ޓުއަރިޒަމްގެ އެކި ހަރަކާތްތައް ހިންގޭނެ ރަށެއްގެ ގޮތުގައި ހައްދަވާދެއްވާނެ ކަމަށެވެ.

"މިރަށުގެ ފަޅުގައި ޓުއަރިޒަމަށް ފުރުސަތު ހުޅުވާލާ، މި ދެންނެވީ ރިސޯޓު ތަރައްގީކޮށްދީ އަދި މި ރަށުގެ ބިމުގައި ވެސް އެކި ގޮތްގޮތުން ޓުއަރިޒަމްގެ ގޮތުން ކުރިއަށް ދެވޭނެ މަގުތައް ފަހިކޮށްދެވިގެން ދާނެ"

ޑރ މުއިއްޒު

ޑރ މުއިއްޒު އިތުރަށް ވިދާޅުވީ ޓުއަރިޒަމަށް މިހާރު ޚާއްސަ ކުރެވިފައިވާ ބިމުން އެރަށުގެ ރައްޔިތުންނަށް ފައިދާވާ ގޮތަށް ކަންކަން ބަދަލުކޮށްދެއްވާނެ ކަމުގެ ޔަގީންކަން ވެސް ދެއްވާ ކަމަށެވެ. އޭގެ އިތުރުން ޑރ މުއިއްޒު ވިދާޅުވީ ޓުއަރިޒަމްގެ ސިނާއަތުގައި މަސައްކަތް ކުރުމަށް ބޭނުންވާ ފަރާތްތަކަށް، އެ ވިޔަފާރިތައް ކުރުމަށް ބޭނުންވާނެ ލުއި ލޯނު ޕީޕީއެމް-ޕީއެންސީގެ ވެރިކަމެއްގައި ފޯރުކޮށްދޭނެ ކަމަށެވެ.

ކެލާއަށް ޑރ މުއިއްޒުގެ ވައުދުވެލެއްވި އިތުރުކަންކަން

ދަނޑުވެރިކަން ކުރާ ސަރަހައްދަށް ކަރަންޓުގެ ވަސީލަތް ފޯރުކޮށްދިނުން

ބަނދަރާއި އެކު 4 ހެކްޓަރުގެ ބިން ހިއްކާ އިތުރުކުރުން

ކެލާގައި މަސްވެރިކަމުގެ ސިނާއަތް ތައާރަފުކުރުން

ބޯހިޔާވަހިކަން ކަށަވަރުކޮށްދިނުން

ޑރ މުއިއްޒު ވިދާޅުވީ އެކަންކަން ކުރެވުމުގެ ސަބަބުން ރައްޔިތުންގެ ފުދުންތެރިކަން އިންތިހާއަށް އިތުރުވެގެންދާނެ ކަމަށެވެ.

އެމަނިކުފާނު ވެލައްވާ ވައުދުތައް ފުއްދަވާދެއްވާނެ ކަމުގެ ޔަގީންކަން ދެއްވާ ކަމަށާއި، ރައްޔިތުން އިތުބަރުކުރައްވާ ޕްރޮގްރެސިވް ކޮންގްރެސް ކޯލިޝަނަށް ފުރުސަތު ދެއްވުމަށް ޑރ މުއިއްޒު ވަނީ އެދިވަޑައިގެންފަ އެވެ.