އާރަށު މައްސަލައިގެ އިސްތިއުނާފު އަވަސްކޮށްދިނުމަށް ރައީސް ޔާމީން އެދިވަޑައިގެންފި!

ވ. އާރަށުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފުކޮށް މިހާރު އެ ކޯޓުގައި ފަށާފައިވާ މައްސަލަ އަވަސްކޮށްދެއްވުމަށް ރައީސް ޔާމީން އެދިވަޑައިގެންފި އެވެ.

އާރަށު މައްސަލައިގެ އިސްތިއުނާފީ އަޑުއެހުމެއް އިއްޔެ ހައިކޯޓުގައި ވަނީ ކުރިއަށް ގެންގޮސްފަ އެވެ.

މިއަދުގެ އަޑުއެހުމުގައި ފުރުސަތެއް ހޯއްދަވާ ވާހަކަދައްކަވަމުން ރައީސް ޔާމީން ވަނީ އެމަނިކުފާނުގެ ފަރާތްޕުޅުން ހައިކޯޓަށް ހުށައަޅާފައިވާ އިސްތިއުނާފު އަވަސްކޮށްދިނުމަށް އެދިވަޑައިގެންފަ އެވެ.

"މިއީ ހަމަ އިސްތިއުނާފުގެ މައްސަލައަކަށް ވާތީއާއި އެކީ އަޅުގަނޑުގެ ވަރަށް ބޮޑު އިލްތިމާސެއް ތަންކޮޅެއް ވަގުތު ދިގުކޮށް ނަމަވެސް ތަންކޮޅެއް ފްރިކުއެންޓުކޮށް އަވަސް އަވަހަށް ގެންގޮސްދެއްވައިފިއްޔާ އަޅުގަނޑު ވަރަށް ޝުކުރުވެރިވާނަން"

ރައީސް ޔާމީން

ރައީސް ޔާމީން ވިދާޅުވީ ދަށު ކޯޓުގައި މިހާރުވެސް އެމަނިކުފާނުގެ މައްސަލައެއް އޮތް އިރު އެ މައްސަލަ ވަރަށް ދިގުކޮށް ގެންދާ ކަމަށެވެ.

އެ މައްސަލައަކީ އެހާ އަވަސް އަރުވާލައިގެން ކުރިއަށް ގެންދަން ޖެހޭ މައްސަލައެއް ކަމަށް ދައުލަތުން ވެސް ނުދެކޭއިރު، އަދި އެ މައްސަލަ މިހާރު ކުރިއަށް ގެންދާ ގޮތުން އެމަނިކުފާނުގެ ފަރާތްޕުޅުން ހުށައަޅާފައިވާ އިސްތިއުނާފީ މައްސަލައަށް ހުރަސްއެޅި އެމަނިކުފާނުގެ އިސްތިއުނާފީ ހައްގުތަކަށް ހުރަސްއެޅިގެން ދާތީ، އެކަމަށް ރިއާޔަތްކޮށް ހައި ކޯޓުން، އެފަދައިން ނުވާނެ ފަދަ ގޮތަކަށް އަޑުއެހުންތައް ކުރިއަށް ގެންގޮސްދެއްވުމަށް ރައީސް ޔާމިން ވަނީ އެދިވަޑައިގެންފަ އެވެ.

ރައީސް ޔާމީންގެ އިތުރުން އެމަނިކުފާނުގެ އިސް ޤާނޫނީ ވަކީލު ޑރ މުޙައްމަދު ޖަމީލު އަޙުމަދު ވެސް ވަނީ ހައި ކޯޓުގައި އޮތް އިސްތިއުނާފީ މައްސަލަ އަވަށްކޮށްދެއްވުމަށް އެދިވަޑައިގެންފަ އެވެ. އަދި އެ މައްސަލަ އަވަސްކުރުމަކީ ރައީސް ޔާމިނަށް އިންސާފު ހޯދުމަށް މުހިންމު ކަމެއްކަން އެމަނިކުފާނު ފާހަގަކުރެއްވި އެވެ.

"ދަށު ކޯޓުގައި މިހާރު ކަންތައްތައް ކުރައްވަމުންދާ ގޮތަށް ބަލާއިރު، އަޅުގަނޑުމެން މުޅިން އެގްސޯސްޓު ވާ ގޮތަށް އެ ކަންތައް ކުރައްވަނީ. އަޅުގަނޑުމެންނަކީ ވެސް ވަރަށް ބޮޑު ހުވައެއް ކޮށްގެން މީހެއްގ ދިފާއުގައި މަސައްކަތްކުރާ ބަޔަކަށް ވާތީ އަޅުގަނޑު ވަރަށް އަދަބުވެރިކަމާއެކު ފަނޑިޔާރު އަރިހުން އެދެން މި އިސްތިއުނާފު ކުރިއަށް ގެންދެވޭނެ ގޮތަކަށް ތަރުތީބުކޮށްދެއްވުން"

ޑރ ޖަމީލު

ރައީސް ޔާމީންގެ ފަރާތްޕުޅުން ހުށައަޅާފައިވާ ކަންކަމާއި ގުޅިގެން މިއަދުގެ ޝަރީއަތް ނިންމަވާލައްވަމުން އިސް ގާޒީ ވިދާޅުވީ އަންނަ ހަފްތާގައި މި މައްސަލައިގެ އަޑުއެހުމެއް ތާވަލުކުރައްވާނެ ކަމަށެވެ.