22 ގަޑިއިރު ހެކިބަސް ނެގީ ވަކީލުންނާއި ބައްދަލު ކުރުމުގެ ފުރުސަތު ނުދީ: ރައީސް ޔާމީން

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅިގެން ކްރިމިނަލް ކޯޓުގައި ކުރިއަށް ގެންދާ ޝަރިއަތުގައި 22 ގަޑިއިރުގެ ހެކިބަސް ނަގާފައިވާއިރު، ރައީސް ޔާމިނަށް އެމަނިކުފާނުގެ ވަކީލުންނާއި ބައްދަލުކުރުމަށް އެންމެ ފުރުސަތެއް ދެއްވާފައި ނުވާކަމަށް އެމަނިކުފާނު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައިވަނީ ކުށުން ބަރީއަވުމަށް ނުވަތަ ދިފާއުވުމަށް ރައީސް ޔާމީނަށް ގާނުނު އަސާސީން ލިއްބައިދޭ ހައްގުތަކަށް ބެއްލެވުމެއް ނެތި ދަށު ކޯޓުގައި އޮތް ފުއްގިރި މައްސަލަ އަވަސް އަރުވާލައިގެން ކުރިއަށް ގެންދާތީ އޮތް ކަންބޮޑުވުންތައް ހައިކޯޓުގެ ފަނޑިޔާރުންނާއި ހިއްސާ ކުރައްވަމުންނެވެ.

ހައިކޯޓުގައި ބުރާސްފަތި ދުވަހު އާރަށު މައްސަލައިގެ އިސްތިއުނާފު އަޑުއެހުމެއް ބާއްވާފައިވާއިރު، ރައީސް ޔާމިން ވަނީ އެމަނިކުފާނުގެ ފަރާތްޕުޅުން އެ ކޯޓަށް ހުށައަޅާފައިވާ މައްސަލަ އަވަސްކޮށްދެއްވުމަށް އެދިވަޑައިގެންފަ އެވެ.

އަދި އެމަނިކުފާނުގެ އިސްތިއުނާފީ ހައްގަށް ހުރަސްއެޅޭ ގޮތަށް ދަށު ކޯޓުގައި އޮތް މައްސަލަ ކުރިއަށް ގެންދާއިރު، އެކަމަށް ހައިކޯޓުން ބައްލަވާ، ހައިކޯޓުގައި އޮތް މައްސަލައަށް ބުރޫ ނާރާނެ ފަދަ ގޮތަކަށް އެމަނިކުފާނުގެ ޝަރީއަތްތައް ކުރިއަށް ގެންގޮސްދެއްވުމަށް އިލްތިމާސް ކުރައްވާފަ އެވެ.

"ޕްރޮސެކިއުޝަނުން އަޅުގަނޑުމެންގެ ހާޒިރުގައި ވިދާޅުވީ ޕްރޮސެކިއުޝަނަކުން މި މައްސަލައިގަ (ފުއްގިރި މައްސަލައިގަ) ވަކި ގޮތެއް ނެތޭ އަޅުގަނޑުމެންނަށް އެކަށީގެންވާ ވަސީލަތާއި ފުރުސަތާއި ލިބެންވާނެކަމަށް އަޅުގަނޑުމެން ޕްރޮސެކިއުޝަނަށް ދެންނެވިން. މިދިޔަ ހަފްތާގައި 22 ގަޑިއިރުގެ ހެކިބަސް ނަގާ ނިމުނުއިރު އަޅުގަނޑަކާއި އަޅުގަނޑުގެ ވަކީލުންނާއި ބައްދަލުކުރުމުގެ ބައިގަޑިއިރުގެ ފުރުސަތެއް ވެސް ނުލިބޭ"

ރައީސް ޔާމީން

ރައީސް ޔާމީން މިވަގުތުވެސް ގެންދަވަނީ އެމަނިކުފާނުގެ މައްޗަށް އާރަށުގެ މުއާމަލާތާއި ގުޅުވާ އުފުލާފައިވާ ދައުވާތައް ސާބިތުވާކަމަށް ކަނޑައަޅާ އިއްވި ނުހައްގު ހުކުމް ތަންފީޒުކުރައްވަމުން ނެވެ.

މި ވެރިކަމުގައި އެމަނިކުފާނު 900 އަށް ވުރެ ގިނަ ދުވަސް ޖަލުގައި ހޭދަކުރައްވާފައިވާއިރު، އާރަށު މައްސަލަ ހައިކޯޓުން ނިމި އެމަނިކުފާނު މިނިވަންވާނެ ކަމުގެ ޔަގީންކަން އެމަނިކުފާނުގެ ޤާނޫނީ ވަކީލުން ދެއްވައެވެ.

މިހާތަނަށް އެ މައްސަލައާއި ގުޅިގެން ކުރިއަށް ގެންގޮސްފައިވަނީ ޔޫސުފް ނައީމުގެ ފަރާތްޕުޅުން ހުށައަޅާ އިސްތިއުނާފީ ނުކުތާތަށް ހުށައެޅުމެވެ.

ދެން އޮންނާނީ ރައީސް ޔާމިނުގެ ފަރާތްޕުޅުން ހުށައަޅާ އިސްތިއުނާފީ ނުކުތާތައް ހުށައަޅާ ވާހަކަދެއްކުމެވެ.

އާރަށު މައްސަލައިގައި ދަށު ކޯޓުގައި ހަދާފައިވާ ބޮޑެތި ގޯސްތައް އެމަނިކުފާނުގެ ފަރާތްޕުޅުން ހައިކޯޓަށް ހުށައަޅާފައި ވާނެ ކަމަށާއި، އަދި އަޑުއެހުންތައް ކުރިއަށް ދާއިރު، އެކަން ރައްޔިތުންނަށް ތިލަވެގެންދާނެކަމަށް އެމަނިކުފާނުގެ އިސް ގާނޫނީ ވަކީލު ޑރ މުޙައްމަދު ޖަމީލު އަޙުމަދު ވެސް ވަނީ ވިދާޅުވެފަ އެވެ.