އަމީނީ މަގުގެ ސެގްމެންޓް 8 ގައި މިހާރު ކުރިއަށް ދަނީ ދުވާރުގެ މަސައްކަތް: އާރްޑިސީ

މި ހަފްތާ ތެރޭގައި ފެށުނު އަމީނީ މަގު ސެގްމެންޓް އަށެއްގައި މިހާރު ކުރިއަށް ދަނީ ހޮޅި އަޅައި ނިމުނު ސަރަހައްދުގައި ކޭބަލްޓްރޭ މަސައްކަތާއި ދުވާރުގެ މަސައްކަތް ކަމަށް ރޯޑް ޑިވިލޮޕްމެންޓް ކޯޕަރޭޝަން (އާރްޑީސީ) އިން ބުނެފިއެވެ.

އަމީނީމަގުގެ ސެގްމެންޓް 4،5،6 އަދި 7 ނިންމައި، މިހާރު ހުޅުވާލާފައެވެ. އެއީ ސްޓެލްކޯއާ ހަމައިން ފެށިގެން ރަށްދެބައި ހިނގުމާ ހަމައަށެވެ.

އާރްޑީސީން ބުނީ، ސެގްމެންޓް 8 ގެ މަސައްކަތް ކުރުމަށްޓަކައި ރައްދެބައި ހިނގުމާއި އަމީނީ މަގާއި ގުޅޭ ކަންމަތިން ފެށިގެން އަމީނީމަގާއި ނިކަގަސް މަގާއި ގުޅޭ ކަންމައްޗާ ހަމައަށް މަސައްކަތް ކުރުމަށް ބަންދު ކުރެވިފައި ވާކަމަށެވެ.

މިހާތަނަށް، އެ ސަރަހައްދުގެ މަގުގައި އަޅަންޖެހޭ ފެނާއި ނަރުދަމާގެ ހޮޅިތައް އެމްޑަބްލިޔުއެސްސީއާއި ހަމައަށް އަޅާ ޑީވޯޓަރިންގް ނިޒާމުގެ އެއް އައުޓްފޯލްގެ މަސައްކަތާއި ނަރުދަމާ ނިޒާމުގެ ޕަމްޕިންގް ލައިންގެ މަސައްކަތްވެސް ވަނީ ނިންމާލާފައެވެ.

ޒަމާނީ ފެންވަރަށް އަމީނީ މަގު ތަރައްގީ ކުރުމުގެ މަސައްކަތް މާލޭ ސިޓީ ކައުންސިލުން ނެގުމަށްފަހު ޕްލޭނިން މިނިސްޓްރީއިން އެ މަސައްކަތް ހަވާލުކުރީ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އާ އެވެ. އެ މަސައްކަތް އާރުޑީސީއާއި ހަވާލުކޮށްފައި ވަނީ މި ދިޔަ ސެޕްޓެމްބަރު މަހުގައެވެ. އާރުޑީސީއާއި އެ މަސައްކަތް ހަވާލުކުރީ 7 މަސްތެރޭ އަމީނީ މަގުގެ މަސައްކަތް އެއްކޮށް ނިންމާލުމަށެވެ.

އެހެން ނަމަވެސް މަގު ނުހެދި ގިނަ ލިގުލައިގެން ދިއުމާއި ގުޅިގެން ބޮޑެތި ފާޑުކިޔުންތަކެއް ސަރުކާރާއި އާރުޑީސީއަށްވެސް އަމާޒުވަމުން ދިއުމާއި ގުޅިގެން އަމީނީ މަގުގައި ތާރު އެޅުމުގެ މަސައްކަތް އެފަހުން ހަވާލުކުރީ އެމްޓީސީސީއާއެވެ.

އަމީނީ މަގު ޒަމާނީ ފެންވަރަކަށް ހެދުމަށް ޕްލޭނިން މިނިސްޓްރީއިން އާރުޑީސީއާއި ހަވާލުކޮށްފައި ވަނީ 84 މިލިއަން ރުފިޔާއަށެވެ. އެއާއެކު އާރުޑީސީއިން އަމީނީ މަގު ހެދުމުގެ މަސައްކަތް 210 ދުވަހުގެ ތެރޭގައި ފުރިހަމަ ކުރަން ޖެހޭނެއެވެ.

ޒަމާނީ ފެންވަރަށް އަމީނީ މަގު ހަދާ ނިމޭއިރު، އެ މަގަކީ މާލޭގެ ބޮޑެތި މަގުތަކުގެ ތެރެއިން ވަރަށް ހިތްގައިމު މަގަކަށް ވެގެންދާނެކަމަށް އާރުޑީސީއިން ވަނީ ބުނެފައެވެ. އަދި މަގު ހަލާކުވުމުގެ ސަބަބުން މަގު ބޭނުން ކުރާ ފަަރާތްތަކަށް އުފުލަން ޖެހުނު ތަކުލީފު އެހިސާބުން އެއްކޮށް ފިލައިގެން ދާނެކަމަށްވެސް އާރުޑީސީއިން ވަނީ ބުނެފައެވެ.