ޑްރަގް ކެފޭއެއް ހިންގި އެޕާޓްމެންޓުން ހައްޔަރުކުރި ހަ މީހުން 30 ދުވަހަށް ބަންދުކޮށްފި
ކެފޭއެއްގެ ގޮތުގައި މަސްތުވާތަކެތި ވިއްކައި ބޭނުންކުރަމުންދިޔަ އެޕާޓްމެންޓެއް ބަލައިފާސްކޮށް ހައްޔަރުކުރި ހަ މީހެއްގެ ބަންދަށް ކްރިމިނަލް ކޯޓުން މިއަދު 30 ދުވަސް ޖަހައިފިއެވެ.
ފުލުހުން ބުނި ގޮތުގައި އެ ހަ މީހުން ހައްޔަރުކޮށްފައިވަނީ މަސްތުވާތަކެތި ގެންގުޅުމާއި ބޭނުންކުރުމުގެ އިތުރުން، މަސްތުވާތަކެތީގެ ވިޔަފާރިކުރުމާއި ޓްރެފިކްކުރުމުގެ ތުހުމަތުގައެވެ. އެ ތަނުގައި ކެފޭއެއްގެ އުސޫލުން މަސްތުވާތަކެތި ވިއްކައި، އެ ތަކެތި ބޭނުންކުރުމަށް އިންތިޒާމު ހަމަޖައްސާފައިވާ ކަމަށް ފުލުހުން ބުނެއެވެ.
އެ މީހުން ތިބި އެޕާޓްމެންޓުން ގިނަ އަދަދެއްގެ މަސްތުވާތަކެތި ފެނިފައިވާއިރު-، ފައިސާ އާއި، މަސްތުވާތަކެތި ކިރުމަށް ބޭނުންކުރާ އާލާތެއްވެސް އެތަނުނ ްވަނީ ފެނިފައެވެ. އަދި އެތަނުން މަސްތުވާތަކެތީގެ އިތުރުން، ފައިސާ ވެސް ހުރިކަމަށް ފުލުހުން ވަނީ ބުނެފައެވެ.
ހައްޔަރުކުރި ބައެއް މީހުން އެ ތަނުން އަބަދުވެސް ވަދެ ނުކުމެ ހަދާ ކަމުގެ ހެކިބަސް ލިބިފައިވާ ކަމަށް ވެސް ފުލުހުން ކޯޓަށް ހާމަކޮށްފައިވެއެވެ.
ތުހުމަތުގައި ކޯޓަށް ގެންދިޔަ މީހުން ބުނެފައިވަނީ، އެޕާޓްމެންޓުން ފެނުނު މަސްތުވާތަކެއްޗާ އެމީހުންނަށް އެއްވެސް ގުޅުމެއް ނެތް ކަމަށާއި، ކުރެވިފައިވާ ތުހުމަތުތަކަށް އިންކާރުކުރާ ކަމަށެވެ. ނަމަވެސް ފުލުހުން ހުށަހެޅި ހެކިތައް ބަލައި، ހަ މީހުން ވެސް 30 ދުވަހަށް ބަންދުގައި ބަހައްޓަން ކޯޓުން އަމުރުކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
