ޔޫކްރެއިންގެ ރައީސް ވޯލްޑްކަޕް ފައިނަލް މެޗުގެކުރިން މުހާތަބުކުރުމުގެ ފުރުސަތު ފީފާއިން ދިމުމަށް ދެކޮޅުހަދައިފި

ވޯލްޑް ކަޕްފައިނަލުގައި އާޖެންޓީނާ އާއި ފްރާންސް ބައްދަލުކުރާ މެޗުގެ ކުރިން ސުލްހައިގެ މެސެޖެއް ދިނުމަށް ޔޫކްރެއިންގެ ރައީސް ވޮލޮޑިމީރް ޒެލެންސްކީ ހުށަހެޅުއްވި ހުށަހެޅުމަށް ފީފާއިން ދެކޮޅު ހަދައިފިއެވެ.

2022 ވަނަ އަހަރުގެ ފެބްރުއަރީ މަހު ރަޝިއާއިން ޔޫކްރެއިންއަށް އަރައިގަތް ފަހުން ޔޫރަޕްގެ ޤައުމުތަކުގައި ބައްވާ އެކިއެކި އިވެންޓްތަކުގައި  ޔޫކްރޭނަށް ތާއީދުކުރާ މެސެޖްތަކާއި ބެނާތައް ފެންނަން ހުރެއެވެ. ނަމަވެސް މިފަހަރުގެ ވޯލްޑް ކަޕްގައި ފީފާއިން ވަނީ ގަތަރުގައި ސިޔާސީ އަދި އިޖުތިމާއީ އެއްވެސް ކެމްޕެއިން ކުރުން މަނާކޮށްފަ އެވެ.

ވޯލްޑް ކަޕްގެ ކުރިން ފީފާގެ ރައީސް ޖިއާނީ އިންފަންޓީނޯ ވަނީ ވޯލްޑް ކަޕްގެ މުއްދަތަށް ޔޫކްރެއިންގައި ހަނގުރާމަ ހުއްޓާލުމަށް އެދިވަޑައިގެންފަ އެވެ. އަދި ވޯލްޑް ކަޕް ކޮލިފައިންގެ ޕުލޭއޮފް ގައި ކުޅުމުގެ ފުރުސަތު ރަޝިއާއަށް ލިބިފައި ވަނިކޮށް ފީފާއިން ވަނީ ފުޓްބޯޅައިގެ ހުރީހާ ހަރަކާތަކުން އެޤައުމު ސަސްޕެންޑްކޮށްފައެވެ.

ރަޝިއާގެ ބަދަލުގައި ޕޮލެންޑަށް ފުރުސަތު ދިންއިރު، މިހާރު ހިނގަމުންދާ ހަނގުރާމައިގެ ސަބަބުން ޔޫކްރެއިންގެ މެޗުތައް ވެސް ވަނީ ލަސްކުރަންޖެހުނެވެ.

ސީއެންއެން އިން ރިޕޯޓްކޮށްފައިވާގޮތުގައި ވޯލްޑްކަޕްގެ ފައިނަލް މެޗުގެ ކުރިން ގަތަރުގެ ސްޓޭޑިއަމްގައި ޒެލެންސްކީ ތަގުރީރު ކުރައްވަން ބޭނުންވަނީ ވީޑިއޯ ލިންކް މެދުވެރިކޮށެވެ. ސީއެންއެން ރިޕޯޓްގައި ވާގޮތުން ފީފާ އާއި ޔޫކްރެއިންއާ ދެމެދު މަޝްވަރާތައް އަދިވެސް ކުރިއަށް އެބަދެ އެވެ.

ޔޫރަޕްގެ ހަތް ގައުމެއްގެ ކެޕްޓަނުން އެލްޖީބީޓީކިއު ޕްލަސް ކޮމިއުނިޓީއަށް ތާއީދުކޮށް "ވަން ލަވް" އާމްބޭންޑް އެޅުން މަނާކުރުމާ ގުޅިގެން މީގެ ކުރިން އެ ޖަމިއްޔާއަށް ހުޅަގުގެ މީޑިއާތަކުން ވަނީ ބޮޑެތި ފާޑުކިއުންތަކެއް އަމާޒުވެފައެވެ. ނަމަވެސް ހުކުރު ދުވަހު ބޭއްވި ނިއުސް ކޮންފަރެންސެއްގައި އިންފަންޓީނޯ ވިދާޅުވީ ފީފާއިން ގަތަރުގައި ބައެއް "ސިޔާސީ ވާހަކަތައް" ހުއްޓާލީ "އެންމެންގެ މަސްލަހަތައް" ބެލުމައްފަހު ކަމަށެވެ.