މީހުން ތަކެއް ރަހީނު ކުރި މައްސަލާގައި ހައްޔުކުރި ކުއްޖާ އާއިލާއާ ހަވާލުކޮށްފި

މާލޭގެ ގެއެއްގައި ތިން ފިރިހެނުން ރަހީނުކޮށް އަނިޔާކުރި މައްސަލައިގައި ހައްޔަރު ކުރި 18 އަހަރު ނުފުރޭ ކުއްޖާ ބަންދުން ދޫކޮށްލައި އާއިލާއާ ހަވާލުކޮށްފިއެވެ.

ހެންވޭރު އަބަދަށް އުފާ މަގުގައި ހުރި ގެއެއްގައި ބަޔަކު ރަހީނުކޮށްފައި ތިބި ކަމަށް އިއްޔެ ފުލުހުންނަށް ލިބުނު މައުލޫމާތަކާ ގުޅިގެން ފުލުހުން އެޓެންޑްވެ، ބާރުގެ ބޭނުން ކޮށްގެން އެތަނުގެ ތެރެއަށް ވަދެފައިވާ ކަމަށް އިއްޔެ ފުލުހުން ބުނެފައިވެއެވެ.

އަދި ރަހީނު ކޮށްފައި ތިބި ދިވެހި ތިން ފިރިހެނުން ސަލާމަތް ކޮށްފައިވާ ކަމަށްވެސް ބުނެފައިވެއެވެ.

"އެމީހުންނަށް އެކި ވަރުގެ އަނިޔާ ކޮށްފައިވޭ" ފުލުހުން ބުންޏެވެ.

މީގެ އިތުރުން ފުލުހުން ބުނީ، ޑޮކްޓަރަށް ދެއްކުމަށް އެމީހުން ވަނީ މިހާރު އައިޖީއެމް ހޮސްޕިޓަލަށް ގެންގޮސްފައި ކަމަށެވެ.

މި މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައި ވަނީ ދިވެހި ފިރިހެނަކާއި 18 އަހަރުން ދަށުގެ ފިރިހެން ކުއްޖަކު ކަމަށް ފުލުހުން ބުންޏެވެ.

އެކަމާއި ގުޅިގެން އިތުރު މައުލޫމާތު ދެއްވަމުން ފުލުހުން މިއަދު ބުނީ، އެ މައްސަލާގައި ހައްޔަރުކުރި މީހާގެ ބަންދަށް 15 ދުވަސް ކްރިމިނަލް ކޯޓުން ޖަހާފައިވާ ކަމަށާ، ނަމަވެސް، 18 އަހަރު ނުފެރޭ ކުއްޖާ އޭނާގެ އާއިލާ އާއި ހަވާލުކޮށްފައިވާ ކަމަށެވެ.