ކެބިނެޓްގެ 33 ޕަސެންޓް ދެއްވުމުން އެނގިގެންދިޔައީ އަންހެނުންނަށް ޚާއްސަ ސަމާލުކަމެއް ދެއްވާނެކަން: ރޮޒެއިނާ

ކެބިނެޓްގެ 33 ޕަސެންޓް އަންހެނުންނަށް ދެއްވުމުން އެނގިގެންދިޔައީ އަންހެނުންނަށް ޚާއްސަ ސަމާލުކަމެއް ރައީސް ޞާލިޙް ދެއްވާނެކަން ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.

ރޮޒެއިނާ މިހެން ވިދާޅުވީ އިއްޔެ އެމްޑީޕީ އިން އަންހެނުންގެ އަޑުގެ ނަމުގައި ކުރިއަށް ގެންދިޔަ މެނިފެސްޓޯ ވޯކްޝޮޕްގައި ވާހަކަ ދައްކަވަމުންނެވެ.

"މިފަސް އަހަރަކީ އަންހެނުންގެ އަޑު އެހުމުގަ މީގެކުރިއަށް ވުރެ ބޮޑަށް ސަރުކާރުން ސަމާލުކަމެއް ދެއްވައިގެން މަސައްކަތްކުރި ފަސްއަހަރުގެ ގޮތުގައި ފާހަގަވޭ، އަޅުގަނޑުމެންނަށް އެކަން ފުރަތަމަވެސް ފާހަގަ ވެގެންދިޔައީ ރައީސުލް ޖުމަހޫރިއްޔާ ފުރަތަމަ  ކެބިނެޓް އެކުލަވާލެއްވި ހިސާބުންވެސް، އަލަށް ދިވެހި ރާއްޖޭގަ ކަނޑައެޅިގެން 33 ޕަސެންޓް އަންހެންބޭފުޅުންނަށް ކަނޑައެޅިގެން ދިޔަތަން ފެނިގެން ދިޔައީ، މިހިސާބުންވެސް އަޅުގަނޑުމެންނަށް އެނގުނު އަޅުގަނޑުމެންގެ ރައީސުލް ޖުމްހޫރިއްޔާއަކީ އަޅުގަނޑުމެން އަންހެނުންނަށް ޚާއްސަ ސަމާލުކަމެއް ދީގެން މަސައްކަތް ކޮށްދެއްވާނެ ބޭފުޅެއްކަން" ރޮޒެއިނާގެ ވާހަކަފުޅުގައި ވިދާޅުވެފައިވެއެވެ.

ރޮޒެއިނާގެ ވާހަކައިގައި އިތުރަށް ވިދާޅުވީ ކެބިނެޓް އެކުލަވައި ލުމަށްފަހު ކަމަކަށް ފަހު ކަމެއް ނިންމަވަމުން ގެންދެވީ އަންހެނުންގެ ހިއްސާއާއި އެކުގައި ކަމަށެވެ.

މިއަދު ޓްވިޓަރ ގައި ވޯކްޝޮޕްގައި ކުރިއަށްގެންދިޔަ ޕްރެޒެންޓޭޝަންގެ މައުލޫމާތު ހިއްސާ ކުރައްވައި ކޮށްފައިވާ ޓްވީޓެއްގައި ރޮޒެއިނާ ވިދާޅުވެފައި ވަނީ  މިސަރުކާރު އައިރު ކޯޓުތަކުގައި ތިބި އަންހެން ފަނޑިޔާރުންގެ ޢަދަދަކީ 10 ކަމަށާއި މިއަދާއި ހަމައަށް އެޢަދަދު 26 އަށް އިތުރުކުރެވިފައި ވާކަމަށެވެ.

އަދި ޖުޑިޝަލް ދާއިރާގައި އަންހެނުންނަށް އޮތް ފުރުސަތުތައް އިތުރުކުރުމަށް ގިނަ މަސައްކަތްތަކެއް އެބަކުރެވޭ ކަމަށް ރޮޒެއިނާ ވިދާޅުފައިވެއެވެ.

"އެމީހަކު ހުރި  ރަށަކުން ޝަރީޢަތުގައި ބައިވެރިވުމުގެ ފުރުސަތު މިއަދު މިވަނީ ތަނަވަސް ކޮށްދެވިފައި، ކޯޓަށް ހާޒިރުވާން ރަށްދޫކޮށް ފުރައިގެން ދާން ޖެހުމަކީ، ހާއްސަކޮށް އަންހެނުންނަށް، ވަރަށް ދަތިކަމެއް، މިއަދު އެތަކުލީފާއި ބުރަ އުފުލާކަށް ނުޖެހޭ" ރޮޒެއިނާ ކުރައްވާފައިވާ އެހެން ޓްވީޓެއްގައި ވެއެވެ.

އިއްޔެ ކުރިއަށްދިޔަ މެނިފެސްޓޯ ވޯކްޝޮޕްގައި ފަސްޓްލޭޑީ ފަޒްނާ އަޙްމަދުވެސް ވަނީ ބައިވެރިވެ ވަޑައިގެންފައެވެ.

އެމްޑީޕީގެ އަންހެނުންގެ ރޫޙުގެ އިތުރުން އެމްޑީއޭ ގެ އަންހެނުންގެ ގޮފީގެ މެމްބަރުންވެސް މި ވޯކްޝޮޕްގައި ބައިވެރިވެފައިވެއެވެ.
މިއަދު އެމްޑީޕީގެ މެނިފެސްޓޯ ވޯކްޝޮޕް ކުރިއަށް ގެންދިޔުމަށް ހަމަޖެހިފައިވަނީ ޒުވާނުންނަށެވެ.