އަޅުގަނޑުމެން މިދަނީ ވެރިކަމާ ހަވާލުވާން: އިދިކޮޅު

އިދިކޮޅު ޕީޕީއެމް/ޕީއެންސީން ތައްޔާރުވަމުން ދަނީ ވެރިކަމާ ހަވާލުވާން ކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފިއެވެ.

އިދިކޮޅު ކޯލިޝަނުން މިއަދު ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވީ، ކޮންމެ ދުވަހަކު އެކިއެކި ވުޒާރާތަކަށާއި މިނިސްޓްރީތަކަށް އަދި މުއައްސަސާތަކަށް އިދިކޮޅުގެ ފަރާތުން ޓީމުތައް ދާނެ ކަމަށާއި އަދި ބޭނުންވާ މައުލޫމާތު އެއްކޮށް،  މައުލޫމާތު ހޯދައި، ކަންކަމަށް ފާރަވެރިވާނެ ކަމަށެވެ.

"އެނގިވަޑައިގަންނަވާނެ މި ސަރުކާރު މިދަނީ ނިމެން. ރައީސް ޞާލިހަކަށް އަބަދު މިފަދަ އަނިޔާވެރި ވެރިކަމެއް ކުރުމަށްޓަކާ ވެރިކަމުގެ ހުންގާނުގަ ހިއްޕަވައިގެނެއް ނުހުންނެވޭނެ. މުއައްސަސާތަކުގަ ތިއްބެވި މުވައްޒަފުންވެސް ވިސްނާވަޑައިގަންނަވަންވީ އަޅުގަނޑުމެން ވެރިކަމާ ހަވާލުވާންކަން މިދަނީ. އެހެންވީމަ އެބޭފުޅުންގެ ފަރާތުންވެސް މިކަމަށް ދެއްވަން ޖެހޭ ހުރިހާ އެއްބާރުލުމަކާ އެހީތެރިކަމެއް ދެއްވުމަކީ މި ޓީމުތަކުގެ ފަރާތުން އަޅުގަނޑުމެން ވަރަށް ބޮޑަށް އެދޭ އެދުމެއް" ހީނާ ވިދާޅުވިއެވެ.

ހީނާ ވިދާޅުވީ ގާނޫނާ ހިލާފަށް މި ސަރުކާރުން އިންތިހާބާ ދިމާކޮށް ނުވަތަ މިއޮތް މުއްދަތުގެ ތެރޭގައި ކުރައްވާ އަމުރަށް ވުޒާރާތަކުގެ މުވައްޒަފުން އެއްބާރުލުން ނުދިނުމަށް އެދޭ ކަމަށެވެ.

ޖުމުލަ 31 ޓީމަކަށް ބަލާހައިގެން 31 ލީޑަރުން ހިމެނޭ ގޮތަށް، ޓީމްތަކުގެ މަސައްކަތް ކުރިއަށް ދާނެ ގޮތް އޮޅުންފިލުވައިދެމުން ހީނާ ވިދާޅުވީ ކޮމެޓީތަކުގެ ކަންކަމުގައި ވިލަރެސްކޮށް އެންމެ އިސްކޮށް ހުންނަވާނީ ޕީއެންސީގެ ޕީޖީ ލީޑަރ އާދަމް ޝަރީފް އުމަރު ކަމަށެވެ.

މިއީ ގާނޫނުގައިވާ، މައުލޫމާތު ހޯދާ ލިބިގަތުމުގެ ހައްގުގެ ދަށުން ކުރިއަށް ގެންދާ ހަރަކާތެއް ކަމަށް އިދިކޮޅުން ފާހަގަ ކުރިއެވެ.