އޮމްބަޑްސްޕަރސަންގެ އޮފީހުގެ ލިޔެކިޔުންތައް ފިނޭންސް މިނިސްޓްރީއާ ހަވާލުކުރަން އަންގައިފި

އިންތިގާލީ އިންސާފުގެ ގާނޫނު ދަށުން އުފައްދާފައިވާ ”އިންތިގާލީ އިންސާފުގެ އޮމްބަޑްސްޕަރސަންގެ އޮފީސް“ ގެ މަސައްކަތްތަކަށް ކަނޑައަޅާފައިވާ މުއްދަތު ހަމަވުމުން އެ އޮފީހުގެ ލިޔެކިޔުންތައް ފިނޭންސް މިނިސްޓްރީއާ ހަވާލުކުރަން އަންގައިފިއެވެ.

އިންތިގާލީ އިންސާފުގެ އޮމްބަޑްސްޕަރސަންގެ އޮފީހުން ރޭ ނެރުނު ބަޔާނެއްގައި ބުނީ އެ އޮފީހުގެ މުއްދަތު އިއްޔެ ހަމަވެފައިވާ ކަމަށެވެ.

އެހެންކަމުން އެ އޮފީސް އުވިގެންދާއިރު އޮފީހުގެ ހަރު މުދަލާއި އެހެނިހެން ހުރިހާ ލިޔެކިޔުމެއް ފިނޭންސް މިނިސްޓްރީއާ ހަވާލުކުރަން އަންގާފައިވާ ކަމަށެވެ.

އިންތިގާލީ އިންސާފުގެ އޮމްބަޑްސްޕަރސަންގެ އޮފީސް އުފެއްދެވީ 2020 ނޮވެމްބަރު 17 ގައެވެ.

އެ އޮފީހުގެ މުއްދަތު 2022 ނޮވެމްބަރު 17 އަށް ހަމަވުމުން އިއްޔެއާ ހަމައަށް މުއްދަތު އިތުރުކުރީ އެ އޮފީހުން ތަހުގީގު ކުރި ބައެއް މައްސަލަތައް ފުރިހަމަކުރުމަށްޓަކައި މުއްދަތު އިތުރުކޮށްދިނުމަށް އޮމްބަޑްސްޕަރސަނުން އެދިލައްވާފައިވާތީއެވެ.

މިއީ 1953 ވަނަ އަހަރުގެ ޖެނުއަރީން ފެށިގެން 2018 ވަނަ އަހަރުގެ ނޮވެމްބަރުމަހުގެ 17 އާއި ދެމެދު ހިނގައިދިޔަ މުއްދަތުގެ ތެރޭގައި ނިޒާމީ ސިފައެއްގައި ރޭވިގެން ދައުލަތުގެ މުއައްސަސާއަކުން ނުވަތަ އެއިން ތަނެއްގެ އިސް ހިންގުންތެރިއަކު ރައްޔިތުންގެ އިންސާނީ ހައްގުތަކާއި އަސާސީ މިނިވަންކަމާއި ޚިލާފަށް ހިންގާފައިވާ އަމަލުތައް ބެލުމަށް ގާއިމުކުރި އޮފީހެކެވެ.

އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަކީ، އަމިއްލަ ނަމުގައި ދަޢުވާކުރުމާއި، ދަޢުވާ ލިބިގަތުމުގެ ބާރު ލިބިފައިވާ، އަމިއްލަ ނަމުގައި މުޢާމަލާތުކުރުމުގެ ހައިސިއްޔަތު ލިބިފައިވާ އަދި ވަކި ސިއްކައެއް އޮންނަ މުސްތަޤިއްލު ޤާނޫނީ ޝަޚްޞެކެވެ.